ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងនូវការកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរួមគ្នារវាងក្រសួងអប់រំ យុវជន និងកីឡា គណកម្មាធិការជាតិអូឡាំពិកកម្ពុជា គណកម្មាធិការជាតិប៉ារ៉ាឡាំពិកកម្ពុជា សហព័ន្ធកីឡាជាតិ និងក្រសួងស្ថាប័នពាក់ព័ន្ធ ដែលបានសហការគ្នាយ៉ាងល្អនូវក្នុងការលើកកម្ពស់វិស័យកីឡាជាតិនាពេលបច្ចុប្បន្នឲ្យមានការរីកចម្រើនគួរជាទីមោទនៈ និងទទួលបានការចាប់អារម្មណ៍ និងការចូលរួមយ៉ាងខ្លាំងពីសំណាក់មហាជនគ្រប់ទិសទី ព្រមទាំងបានបង្ហាញនូវមោទនភាពជាតិ លើឆាកជាតិ និងអន្តរជាតិផងដែរ។
ក្នុងឱកាសអញ្ជើញជាអធិបតីក្នុងពិធីបើកកម្មវិធីប្រកួតកីឡាជាតិ លើកទី៤ និងកីឡាជាតិជនពិការ លើកទី២ នៅពហុកីឡាដ្ឋានជាតិអូឡាំពិក នៅរាត្រីថ្ងៃទី៣០ ខែតុលា ឆ្នាំ២០២៤នេះ សម្តេចធិបតី ហ៊ុន ម៉ាណែត បានមានប្រសាសន៍ថា នៅក្នុងអាណត្តិទី៧ នៃរដ្ឋសភា រាជរដ្ឋាភិបាលកម្ពុជា នូវតែបន្តយកចិត្តទុកដាក់ និងគនិងគាំទ្រដល់ការអនុវត្ត ការកំណែទម្រង់វិស័យកីឡា ទាំងការអភិវឌ្ឍហេដ្ឋារចនាសម្ព័ន្ធកីឡា ការបង្កើនសមិទ្ធផលកីឡា ដើម្បីឲ្យមានការទាក់ទាញការគាំទ្រកាន់តែខ្លាំងក្លៀវក្លា ពិសេសការទទួលបានជោគជ័យក្នុងការប្រកួតទាំងលក្ខណៈជាតិ និងអន្តរជាតិ។
សម្តេចធិបតី បានបន្តថា ការរៀបចំការប្រកួតកីឡាជាតិ លើកទី៤ និងកីឡាជាតិជនពិការ លើកទី២ នាពេលនេះ ជាឱកាសថ្មីមួយទៀតដែលបានបង្ហាញអំពីការរីកចម្រើន និងការអភិវឌ្ឍវិស័យកីឡានៅកម្ពុជា និងជាការត្រៀមរួចរាល់សម្រាប់រៀបចំការប្រកួតកីឡាយុវជនអាស៊ី លើកទី៥ និងយុវជនអាស៊ីប៉ារ៉ាហ្គេម លើកទី៦ នៅឆ្នាំ២០២៩ខាងមុខ។ ម្យ៉ាងវិញទៀតការរៀបចំព្រឹត្តិការណ៍កីឡាបានផ្ដល់អត្ថប្រយោជន៍ច្រើនដល់សង្គម ដូចជា៖ នយោបាយការទូតសេដ្ឋកិច្ចវប្បធម៌, ការលើកកម្ពស់មុខមាត់ជាតិ, ទីផ្សារពាណិជ្ជកម្ម និងការទាក់ទាញភ្ញៀវទេសចរណ៍ជាដើម ដែលជាការខិតខំប្រឹងប្រែងរបស់កម្ពុជា និងមួយជំហានទៀតក្នុងការបង្ហាញឲ្យឃើញនូវកម្លាំងសាមគ្គីជាតិ និងកម្លាំងសេដ្ឋកិច្ចកម្ពុជា។
សម្តេចធិបតី នាយករដ្ឋមន្ត្រី បានបន្ថែមថា ជាការពិតវិស័យកីឡា បានចូលរួមយ៉ាងសំខាន់ក្នុងការរឹតចំណងមិត្តភាព សាមគ្គីភាព និងកិច្ចសហប្រតិបត្តិការទាំងក្នុងតំបន់ និងអន្តរជាតិ។
ឆ្លៀតក្នុងឱកាសនេះ សម្តេចធិបតី ហ៊ុន ម៉ាណែត បានវាយតម្លៃខ្ពស់ចំពោះក្រសួងអប់រំ យុវជន និងកីឡា ក្នុងការដាក់ចេញនូវវិធានការកែទម្រង់សុីជម្រៅលើវិស័យកីឡា អប់រំកាយ តាមរយៈការបន្តការជួសជុលកែលម្អហេដ្ឋារចនាសម្ព័ន្ធកីឡា ការធ្វើប្រតិភូកម្មការងារ និងការផ្ដល់ការគាំទ្រថវិកាដល់ សហព័ន្ធកីឡាជាតិ ដើម្បីធ្វើការបណ្តុះបណ្តាលធនធានមនុស្សជំនាញកីឡា និងការកែទម្រង់ការប្រកួតកីឡាជាដើម។
សម្តេចធិបតី បានបញ្ជាក់ថា សមិទ្ធផលឆ្នាំ២០២៣កន្លងទៅ ខណៈដែលព្រះរាជាណាចក្រកម្ពុជា ធ្វើជាម្ចាស់ផ្ទះ នៃការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ កម្ពុជាទទួលបាននូវជោគជ័យយ៉ាងធំធេង ព្រមទាំងទទួលបានការកោតសរសើរពីប្រទេសក្នុងតំបន់អាស៊ាន និងពិភពលោក ទៅលើទិដ្ឋភាពនៃរៀបចំការប្រកួត និងទទួលមេដាយពីការប្រកួតសរុប ២៨២គ្រឿង ដោយឈរលើលេខរៀងទី៤ នៅក្នុងចំណោម ១១ប្រទេស ក្នុងតំបន់អាស៊ាន និងអាស៊ានប៉ារ៉ាហ្គេម លើកទី១២ កម្ពុជាទទួលបានមេដាយសរុប ៧៣គ្រឿង ដោយឈរលើលេខរៀងទី៨ នៅក្នុងចំណោម ១១ប្រទេស ក្នុងតំបន់អាស៊ាន។
សម្តេចធិបតី នាយករដ្ឋមន្ត្រី បានបញ្ជាក់បន្តទៀតថា កាលពីថ្មីៗនេះ ការរៀបចំការប្រកួតកីឡាយុទ្ធគុនចម្រុះខ្មែរបុរាណ ពានរង្វាន់សម្តេចមហាបវរធិបតី ក៏បានរៀបចំឡើងក្នុងគោលបំណងបណ្ដុះ គួររំលេចក្បាច់គុនបុរាណខ្មែរគ្រប់ទម្រង់ និងគ្រប់ទីកន្លែងសម្រាប់ផ្តល់នូវឱកាសសម្តែងបន្ថែមទៀតដល់កូនខ្មែរជំនាន់ក្រោយបានស្គាល់ឲ្យកាន់តែច្បាស់ពីប្រវត្តិនៃក្បាច់គុនរបស់បុព្វបុរសខ្លួន។
ជាមួយគ្នានេះ សម្តេចធិបតី ហ៊ុន ម៉ាណែត បានគូសបញ្ជាក់ថា រាជរដ្ឋាភិបាល បានបង្កើតគណៈកម្មាការស្រាវជ្រាវគម្ពីរអាថ៌កំបាំងយុទ្ធគុនដូនតាខ្មែរ ដើម្បីគួររំលេចដួងព្រលឹងក្បាច់គុនបុរាណខ្មែរឲ្យងើបឡើងវិញ និងចងក្រងទុកជាឯកសារសម្រាប់មនុស្សជំនាន់បានស្វែងយល់ ៕
