បណ្តាប្រទេសសហភាពអឺរ៉ុបនៅក្នុង UNIFIL យល់ព្រមបង្កើនសម្ពាធផ្នែកនយោបាយ និងការទូតលើអ៊ីស្រាអែល

រ៉ូម៖ ប្រទេសចំនួន១៦ នៃសហភាពអឺរ៉ុប (EU) ដែលផ្តល់ជំនួយដល់កងកម្លាំងបណ្តោះអាសន្នរបស់អង្គការសហប្រជាជាតិ នៅក្នុងប្រទេសលីបង់ (UNIFIL) បានយល់ព្រមបង្កើនសម្ពាធផ្នែកនយោបាយ និងការទូតលើប្រទេសអ៊ីស្រាអែល ដើម្បីជៀសវាងឧប្បត្តិហេតុបន្ថែមទៀតដែលពាក់ព័ន្ធនឹងបេសកកម្មនេះ។

ការសម្រេចចិត្តនេះត្រូវបានសម្រេចបន្ទាប់ពីសន្និសីទវីដេអូដែលដឹកនាំដោយរដ្ឋមន្ត្រីការពារជាតិអ៊ីតាលី លោក Guido Crosetto និងសមភាគីបារាំង លោក Sebastien Lecornu កាលពីថ្ងៃពុធ ចំពេលមានការប៉ះទង្គិចកាន់តែខ្លាំងឡើងរវាងកងកម្លាំងការពារអ៊ីស្រាអែល (IDF) និងក្រុម Hezbollah នៅភាគខាងត្បូងប្រទេសលីបង់។

សន្និសីទវីដេអូនេះពាក់ព័ន្ធនឹងប្រទេសសំខាន់ៗរបស់សហភាពអឺរ៉ុប រួមមាន អៀរឡង់ អាល្លឺម៉ង់ អេស្បាញ អូទ្រីស និងក្រិក ក្នុងចំណោមប្រទេសដទៃទៀត។

ប្រទេសទាំងនេះបានថ្កោលទោសជារួមចំពោះការវាយប្រហារលើមូលដ្ឋាន UNIFIL ដែលបានបង្កគ្រោះថ្នាក់ដល់សុវត្ថិភាពរបស់បុគ្គលិកជាង ១០,០០០នាក់ដែលមកពី ៤៨ប្រទេស ហើយបានជំរុញឱ្យអ៊ីស្រាអែលចាត់វិធានការបង្ការដើម្បីធានាកុំឱ្យមានឧប្បត្តិហេតុបែបនេះកើតឡើងទៀត។

ក្រសួងការពារជាតិអ៊ីតាលីបានឲ្យដឹងនៅក្នុងសេចក្តីថ្លែងការណ៍មួយថា សេចក្តីសន្និដ្ឋានសំខាន់នៃកិច្ចប្រជុំគឺ ឆន្ទៈរួមក្នុងការអនុវត្តសម្ពាធនយោបាយ និងការទូតបំផុតលើអ៊ីស្រាអែល ដើម្បីកុំឱ្យមានឧប្បត្តិហេតុកើតឡើងបន្តទៀត។ ទន្ទឹមនឹងនេះ សេចក្តីថ្លែងការណ៍ក៏បានសង្កត់ធ្ងន់ថា ក្រុមហេសបូឡា មិនអាចប្រើប្រាស់បុគ្គលិក UNIFIL ជាខែលក្នុងបរិបទនៃជម្លោះនោះទេ។

ការអំពាវនាវនេះបានធ្វើឡើងបន្ទាប់ពីការវាយប្រហារជាបន្តបន្ទាប់របស់ IDF ទៅលើទីតាំង UNIFIL នៅភាគខាងត្បូងប្រទេសលីបង់ ចាប់តាំងពីថ្ងៃទី៩ ខែតុលា ដែលបណ្តាលឱ្យមានរបួសដល់កងរក្សាសន្តិភាពជាច្រើននាក់។

ទោះបីជាអ៊ីស្រាអែលបានស្នើឱ្យ UNIFIL ដកកងទ័ពរបស់ខ្លួនក្នុងចម្ងាយ ៥គីឡូម៉ែត្រពីព្រំដែនអ៊ីស្រាអែល-លីបង់ ដែលមានន័យថាចាកចេញពីទីតាំង UNIFIL ទាំងអស់នៅលីបង់ភាគខាងត្បូង ប្រទេសទាំងអស់ដែលរួមចំណែកក្នុងបេសកកម្មបានបដិសេធ។

កាលពីថ្ងៃពុធ បណ្តាប្រទេសសហភាពអឺរ៉ុបបានរំលឹកឡើងវិញនូវការប្តេជ្ញាចិត្តរបស់ពួកគេក្នុងការរក្សាវត្តមាន UNIFIL ដែលមានស្ថិរភាពនៅក្នុងតំបន់ និងបានអះអាងថាការផ្លាស់ប្តូរណាមួយចំពោះអនាគតនៃបេសកកម្មគួរតែត្រូវបានសម្រេចរួមគ្នាដោយអង្គការសហប្រជាជាតិ។