ភ្នំពេញ៖ នៅព្រឹកថ្ងៃទី១៦ ខែតុលា ឆ្នាំ២០២៤ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន យុវនិតិសម្បទា និងលោកជំទាវ បានអញ្ជើញបើកពិធីព្រឹត្តិការណ៍ប្រណាំងទូក «ង» នៅខេត្តព្រៃវែង ដើម្បីអបអរក្នុងឱកាសចេញព្រះវស្សា និងព្រះរាជពិធីបុណ្យអុំទូកបណ្ដែតប្រទីប និងសំពះព្រះខែ ដែលនឹងឈានចូលមកដល់នាពេលខាងមុខនេះ។
ពិធីនេះមានការចូលរួមពីឯកឧត្តម ស្បោង សារ៉ាត ប្រធានក្រុមប្រឹក្សាខេត្ត និងឯកឧត្តម សួន សុម៉ាលីន អភិបាលខេត្តព្រៃវែង និងលោកជំទាវ ព្រមទាំងលោក លោកស្រី ដែលជាក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង អភិបាលក្រុង ស្រុក ប្រធានមន្ទីរ អង្គភាពជុំវិញខេត្ត មន្ត្រីរាជការក្នុងខេត្ត និងប្រជាពលរដ្ឋនៅក្នុងខេត្តយ៉ាងច្រើនកុះករ មកលើកទឹកចិត្តទូកមកពីបណ្តាក្រុង ស្រុករបស់ខ្លួនផងដែរ។
ក្នុងនោះឱកាសនោះ ឯកឧត្តមរដ្ឋមន្ត្រី ជា សុមេធី បានថ្លែងជំរុញដល់កីឡាករទាំងអស់ ត្រូវខិតខំប្រឹងប្រែងឲ្យអស់ពីសមត្ថភាព ដើម្បីដណ្ដើមយកជ័យលាភីចំណាត់ថ្នាក់ល្អជូនដល់ទូករបស់ខ្លួន។
ឯកឧត្តមរដ្ឋមន្ត្រី បានបន្តថា កីឡាករនាំមកនូវមិត្តភាព សាមគ្គីភាពសុខភាពល្អ កីឡារស់នៅក្នុងប្រទេសមានសុខសន្តិភាព ដូច្នេះសូមនាំគ្នាថែរក្សានូវសុខសន្តិភាព និងសមិទ្ធផលដែលមានស្រាប់ ព្រមទាំងបន្តកសាងនូវសមិទ្ធផលថ្មីៗជាបន្តបន្ទាប់ទៀតផងដែរ។
សូមបញ្ជាក់ថា ទូក «ង» ខ្នាតអន្តរជាតិទាំងអស់ចំនួន៤៧ទូក ក្នុងនោះចំណុះពិត ១,០៣៤នាក់ ចំណុះត្រៀម ២៨២នាក់ និងទូកងខ្នាតវែងសរុបទាំងអស់ចំនួន ១៦ទូក ដែលមានចំណុះពិត ១,១៩៣នាក់ ចំណុះត្រៀម ២៣០នាក់។ ទូក «ង» សរុបទាំងខ្នាតវែងនិងខ្នាតអន្តរជាតិមានចំនួន៦៣ទូក ដែលមានចំណុះពិត និងចំណុះត្រៀមសរុបទាំងអស់ចំនួន ២,៧៤៩នាក់។
ជាមួយគ្នានេះ ចំពោះដំណើរការនៃការប្រណាំងមានរយៈពេល២ថ្ងៃ គឺថ្ងៃទី១ អុំចំនួន៤ជើង។ ព្រឹកអុំចំនួន២ជើងប្ដូរខ្សែទឹក និងពេលរសៀលអុំចំនួន២ជើងប្ដូរខ្សែទឹកដូចគ្នា នឹងថ្ងៃទី១៧ខែតុលា គឺអុំចំនួន១ជើង និងពេលរសៀលអុំមួយជើងទៀត ដោយប្ដូរខ្សែទឹក វគ្គផ្ដាច់ព្រ័ត្របិទកម្មវិធី។ នៅពេលរាត្រីក៏មានការតាំងពិព័រណ៍លក់ផលិតផល បាញ់កាំជ្រួច និងមានការប្រគុំតន្រ្តី បង្កភាពសប្បាយរីករាយផងដែរ ៕
