ប្រធានក្រុមប្រឹក្សាខេត្តសៀមរាប ជំរុញដល់អាជ្ញាធរគ្រប់ជាន់ថ្នាក់ពង្រឹងការផ្តល់សេវាជូនពលរដ្ឋ ពិសេសការធ្វើអត្តសញ្ញាបណ្ណគំរូថ្មី

ភ្នំពេញ៖ ក្នុងឱកាសដឹកនាំកិច្ចប្រជុំសាមញ្ញលើកទី៥ របស់ក្រុមប្រឹក្សាខេត្តសៀមរាប អាណត្តិទី៤ នៅថ្ងៃទី១៤ ខែតុលា ឆ្នាំ២០២៤ ឯកឧត្តម លី សំរិទ្ធ ប្រធានក្រុមប្រឹក្សាខេត្ត បានជំរុញដល់អាជ្ញាធរគ្រប់ជាន់ថ្នាក់ ត្រូវខិតខំពង្រឹងការងារផ្តល់សេវាសាធារណៈជូនប្រជាពលរដ្ឋឱ្យបានឆាប់រហ័ស ជាពិសេសការងារធ្វើអត្តសញ្ញាណបណ្ណគំរូថ្មី។

លោកឧត្តមសេនីយ៍ត្រី ណុប សារ៉ាក់ ស្នងការរងនគរបាលខេត្តសៀមរាប បានឱ្យដឹងថា ការងារផ្តល់សេវាអត្តសញ្ញាណបណ្ណគំរូថ្មី ជូនប្រជាពលរដ្ឋក្នុងខេត្តសៀមរាប ក្រុមការងារបានបោះពុម្ពជូនពលរដ្ឋជាង ៩ម៉ឺនសន្លឹក និងចែកទៅតាមបណ្តាប៉ុស្តិ៍រដ្ឋបាលឃុំសង្កាត់ទាំងអស់ ដើម្បីចែកជូនដល់ប្រជាពលរដ្ឋ។ យ៉ាងការចែកក៏នៅមានភាពយឺតយ៉ាវនៅតាមមូលដ្ឋានមួយចំនួន ដោយសារប្រជាពលរដ្ឋខ្លះបានចាកចេញទៅរកការងារធ្វើនៅក្រៅមូលដ្ឋាន ក៏ជាមូលហេតុដែលការងារផ្តល់អត្តសញ្ញាណបណ្ណនេះនៅសេសសល់។

ឆ្លងកាត់កិច្ចប្រជុំ ឯកឧត្តម លី សំរិទ្ធ បានវាយតម្លៃខ្ពស់ ចំពោះការអនុវត្តការងាររបស់មន្ទីរអង្គភាពជំនាញ ដែលមានលក្ខណៈល្អប្រសើរ ប៉ុន្តែក៏នៅមានបញ្ហាមួយចំនួនដែលត្រូវត្រួតពិនិត្យឡើងវិញ ជាពិសេសការងារអត្តសញ្ញាណកម្ម។ ចំពោះការងារនេះ ជាការងារមួយដែលយើងត្រូវខិតខំបន្ថែមទៀត ព្រោះថា ទោះបីជាពលរដ្ឋខ្លះលោកចាកចេញពីមូលដ្ឋានក៏នៅមានក្រុមគ្រួសាររបស់គាត់ ដែលយើងអាចផ្ញើទុកនៅជាមួយបានផងដែរ។ ដូច្នេះឯកឧត្តមបានជំរុញឱ្យខិតខំធ្វើកិច្ចការនេះបន្ថែមទៀត។

សូមជម្រាបថា កិច្ចប្រជុំសាមញ្ញលើកទី៥ របស់ក្រុមប្រឹក្សាខេត្តសៀមរាប អាណត្តិទី៤ នៅព្រឹកមិញនេះ ប្រព្រឹត្តិទៅដោយមានការចូលរួមពី លោក លី សារី អភិបាលរងខេត្ត រួមនឹងវត្តមានឯកឧត្តមលោកជំទាវសមាជិកក្រុមប្រឹក្សាខេត្ត ថ្នាក់ដឹកនាំមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំង៣។ កិច្ចប្រជុំបានលើកយករបៀបវារៈចំនួន៣៖ ទី១.ពិនិត្យ ពិភាក្សា និងអនុម័តលើសេចក្ដីសម្រេចព្រាងកំណត់ហេតុកិច្ចប្រជុំសាមញ្ញលើកទី៤ របស់ក្រុមប្រឹក្សាខេត្ត កាលពីថ្ងៃទី១៦ ខែកញ្ញា ,ទី២.ពិនិត្យ ពិភាក្សា និងអនុម័តលើសេចក្ដីព្រាងរបាយការណ៍ប្រចាំខែកញ្ញា ឆ្នាំ២០២៤ ស្ដីពីការអនុវត្តការងាររបស់រដ្ឋបាលខេត្ត និងទី៣.ពិនិត្យ ពិភាក្សា និងអនុម័តលើសេចក្ដីសម្រេចស្ដីពីការបង្កើតក្រុមការងារ និងរបៀបរបបចុះមូលដ្ឋានរបស់ក្រុមប្រឹក្សាខេត្ត អាណត្តិទី៤ ៕