ក្រុមក្មេងទំនើង ១៣នាក់ ដែលគប់កញ្ចក់រថយន្ត លើផ្លូវជាតិលេខ៣ ត្រូវនគរបាលខេត្តតាកែវ ក្របួចបាន និងកំពុងកសាងសំណុំរឿងបញ្ជូនទៅសាលាដំបូង

ភ្នំពេញ៖ ក្រុមក្មេងទំណើងចំនួន ១៣នាក់ ត្រូវបានកងកម្លាំងសមត្ថកិច្ចនគរបាលខេត្តតាកែវ ធ្វើការឃាត់ខ្លួនបានកាលពីថ្ងៃទី១ ខែតុលា ឆ្នាំ២០២៤នេះ និងកំពុងកសាងសំណុំរឿងបញ្ជូនទៅសាលាដំបូងខេត្តតាកែវ ដើម្បីធ្វើការផ្ដន្ទាទោសឲ្យខានតែបាន បន្ទាប់ពីក្រុមក្មេងទំណើងទាំងនេះបានធ្វើសកម្មភាពជិះម៉ូតូជាក្រុម ប្រដាប់ដោយដំបងជ្រុង និងដុំឥដ្ឋ គប់មកលើរថយន្តរបស់ប្រជាពលរដ្ឋដែលកំពុងធ្វើដំណើរនៅលើកំណាត់ផ្លូវជាតិលេខ៣ ចន្លោះបង្គោលគីឡូម៉ែត្រលេខ ៤៧-៤៨ ស្ថិតនៅភូមិច្បារមន ឃុំកុមារាជា ស្រុកបាទី ខេត្តតាកែវ កាលពីវេលាម៉ោង ១៩និង៣៥នាទី នៅថ្ងៃទី ២៨ ខែកញ្ញា ឆ្នាំ២០២៤ បណ្ដាលរថយន្តម៉ាកឡង់គ្រីស័រមួយគ្រឿងបែកផ្ទៃកញ្ចក់ខាងមុខ តែមិនបង្កឲ្យមានអ្នករងរបួសឡើយ ។

លោកឧត្តមសេនីយ៍ត្រី ហ៊ិន សុខេង ស្នងការរងទទួលផែនព្រហ្មទណ្ឌនៃស្នងការនគរបាលខេត្តតាកែវ បានឲ្យដឹងថា ក្រោយពីទទួលបានពាក្យបណ្ដឹងរបស់ប្រជាពលរដ្ឋថា មានករណីគប់កញ្ចក់រថយន្តនៅលើកំណាត់ផ្លូវជាតិលេខ ៣ ភ្លាមនោះលោកឧត្ដមសេនីយ៍ទោ ម៉ែន លី ស្នងការនៃស្នងការដ្ឋាននគរបាលខេត្តតាកែវ បានបញ្ជាឲ្យរូបលោកដឹកនាំកំលាំងការិយាល័យជំនាញ សហការណ៍ការជាមួយនិងកំលាំងអធិការនគរបាល ៣ស្រុកដែលមានភូមិសាស្ត្រនៅជាប់និងផ្លូវជាតិលេខ៣ រួមមានស្រុកបាទី ស្រុកសំរោង និងស្រុកត្រាំកក់ ចុះពិនិត្យកន្លែងកើតហេតុ និងសិក្សាពីសកម្មភាពរបស់ក្រុមក្មេងទំនើងទាំងនោះ តាមរយៈកាមេរ៉ាសុវត្តិភាពរបស់ម្ចាស់រថយន្ត ត្រូវធ្វើយ៉ាងណាស្វែងរក និងចាប់ខ្លួនក្រុមក្មេងទំណើងទាំងនេះអោយខានតែបាន គឺមិនត្រូវបណ្ដែតបណ្ដោយឲ្យសកម្មភាពរបស់ក្មេងទំនើងកំពុងប្រព្រឹត្តនេះរួចខ្លួនបានឡើយ ។

លោកស្នងការរងបន្តរថា ក្រោយពិនិត្យកន្លែងកើតហេតុសិក្សារួច រូបលោកបានបែងចែកកងកម្លាំទៅតាមគោលដៅ ដែលបានកំណត់ ហើយបានកំណត់មុខសញ្ញាជនសង្ស័យជាក្មេងទំនើងទាំងនេះបានដោយជោគជ័យ។ ក្នុងនោះកម្លាំងនគរបាលយើងបានធ្វើការឃាត់ខ្លួនក្រុមក្មេងទំណើងទាំងនេះជាបន្តរបន្ទាប់ចំនួន ១៣នាក់ ក្រោយពួកគេធ្វើសកម្មភាពបាន៣ថ្ងៃ ជនសង្ស័យរួមមាន៖ ទី១ឈ្មោះ ស៊ុំ កុម្ភៈ ភេទប្រុស អាយុ១៥ឆ្នាំ, ទី២ឈ្មោះ ធន ថុនា ភេទប្រុស អាយុ១៧ឆ្នាំ, ទី៣ ឈ្មោះ ឆន ចាន់ណាក់ ភេទប្រុស អាយុ ១៧ឆ្នាំ, ទី៤ឈ្មោះ ពុំ ផានិត ភេទប្រុស អាយុ១៧ឆ្នាំ, ទី៥ឈ្មោះ នាង បញ្ញា ភេទប្រុស អាយុ១៤ឆ្នាំ, ទី៦ឈ្មោះ ផាន សុធា ហៅបឿក ភេទប្រុស អាយុ ១៦ឆ្នាំ អ្នកទាំង៦នេះ មានទីលំនៅក្នុងស្រុកបាទី ខេត្តតាកែវ និងទី៧ ឈ្មោះ យ៉េន សុវណ្ណសាក់ ភេទប្រុស អាយុ ១៨ឆ្នាំ, ទី៨ ឈ្មោះ ភុំ រ៉ាយុ ភេទប្រុស អាយុ ១៦ឆ្នាំ, ទី៩ ឈ្មោះ ចន ស៊ីណា ភេទប្រុស អាយុ ១៦ឆ្នាំ, ទី១០ ឈ្មោះ ចក់ ពិសា ភេទប្រុស អាយុ១៥ឆ្នាំ, ទី១១ ឈ្មោះ ផាត សុភា ភេទប្រុស អាយុ ១៤ឆ្នាំ, ទី១២ ឈ្មោះ អូន រាជសី ភេទប្រុស អាយុ១៧ឆ្នាំ និងទី, ១៣ ឈ្មោះ ស៊ឹង ប៊ុនឡុង ភេទប្រុស អាយុ ២៤ឆ្នាំ អ្នកទាំង ៧នាក់នេះ មានទីលំនៅ ស្រុកគងពិសី ខេត្តកំពង់ស្ពឺ ។ ក្រោយធ្វើការសាកសួរក្រុមក្មេងទំណើងទាំងនោះបានសារភាពថា ពួកគេពិតជាបានធ្វើសកម្មភាពគប់កញ្ចក់រថយន្តខាងលើពិតប្រាកដមែន ហើយនៅព្រឹកថ្ងៃទី៣ ខែតុលា ឆ្នាំ២០២៤នេះ កម្លាំងសមត្ថកិច្ចបានកំពុងកសាងសំណុំរឿងបញ្ជូនជនសង្ស័យទាំង ១៣នាក់ រួមជាមួយវត្ថុតាំងទៅសាលាដំបូងហើយ ៕