ភ្នំពេញ៖ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា តំណាងរាស្រ្តមណ្ឌលខេត្តស្វាយរៀង និងជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ បានអញ្ជើញជាអធិបតី ក្នុងកម្មវិធីរាត្រីគ្រងមកុដ កញ្ញាឯកចក្កវាឡកម្ពុជា (Miss Universe Cambodia 2024) បវរកញ្ញាចក្កវាឡកម្ពុជា២០២៤ នៅស្ថានីយ CTN ឬស្សីកែវ រាជធានីភ្នំពេញ នារាត្រីថ្ងៃព្រហស្បតិ៍ ទី២៩ ខែសីហា ឆ្នាំ២០២៤។
នៅក្នុងពិធីនោះផងដែរ សម្តេចកិត្តិសង្គហបណ្ឌិត ក៏បានអញ្ជើញបំពាក់ឈៀង និងការបំពាក់មកុដផ្ទេរដំណែងបវរកញ្ញាចក្កវាឡកម្ពុជាឆ្នាំ២០២៣ ពីកញ្ញា ចន សុទីម៉ា ជូនដល់ អ្នកនាង ប្រាសាទ ដាវីន ដែលបានក្លាយជា បវរកញ្ញាចក្កវាឡកម្ពុជាឆ្នាំ២០២៤។
គួររំលឹកផងដែរថា អ្នកនាង ប្រាសាទ ដាវីន ជាស្ត្រីដែលជាម្តាយដំបូងគេម្នាក់ដែលបានចូលរួមប្រកួតបវរកញ្ញាចក្កវាឡកម្ពុជាឆ្នាំ២០២៤។ អ្នកនាងជាស្ត្រីដ៏ឆ្នើមមួយរូបដែលមហាជនបានស្គាល់ជាតារាបង្ហាញម៉ូតដ៏ប៉ិនប្រសប់ និងមានឈ្មោះបោះសម្លេងជាច្រើនឆ្នាំកន្លងមកនេះ។ លើសពីនេះកាលពីឆ្នាំ២០២៣ អ្នកនាងជាស្ត្រីទីមួយបង្អស់ដែលបានតំណាងឲ្យកម្ពុជាចូលរួមប្រកួតក្នុងកម្មវិធីស្រ្តីជាសកលឆ្នាំ២០២៣ (Universal Woman 2023) នៅទីក្រុងឌូបៃ ប្រទេសអារ៉ាប់រួម ទទួលបានចំណាត់ថ្នាក់លំដាប់រងទី៤។ អ្នកនាងក៏ជាអ្នកគ្រប់គ្រងកម្មវិធីបុរសឯកមិត្តភាពកម្ពុជាឆ្នាំ២០២៣ (Mister Friendship Cambodia 2023) ដែលបានបញ្ជូន លោក លាវ វេងហួរ ទៅប្រកួតលើឆាក បុរសឯកមិត្តភាពអន្តរជាតិឆ្នាំ២០២៣ (Mister Friendship International 2023) នៅប្រទេសថៃ ហើយទទួលបានជ័យលាភីលេខ១ ប្រចាំកម្មវិធីផងដែរ។
លើសពីនេះ ឆ្នាំ២០២៤កម្ពុជាធ្វើជាម្ចាស់ផ្ទះកម្មវិធីស្រ្តីជាសកលឆ្នាំ២០២៤ (Universal Woman 2024) ដែលអ្នកនាង ប្រាសាទ ដាវីន ជាអ្នកគ្រប់គ្រង និងនាំយកមកដោយផ្ទាល់ ដែលមានបេក្ខភាពប្រមាណជាង ៥០ ប្រទេសចូលរួម។ ទន្ទឹមនឹងនេះ អ្នកនាងក៏ជាអ្នកគ្រប់គ្រងបេក្ខភាពតំណាងឲ្យប្រទេសកម្ពុជាផងដែរ ដែលមាន កញ្ញា Brianna Mai ជាអ្នកតំណាង ហើយយើងក៏ទទួលបានជ័យលាភីលំដាប់រងទី៣ ប្រចាំឆ្នាំផងដែរ៕
