រដ្ឋមន្ត្រីក្រសួងផែនការ កោតសរសើរនិងវាយតម្លៃខ្ពស់ ចំពោះថ្នាក់ដឹកនាំនិងមន្ត្រីរាជការនៃមន្ទីរផែនការខេត្តកំពង់ឆ្នាំង ដែលបានបំពេញភារកិច្ចយ៉ាងសកម្ម និងសម្រេចបានលទ្ធផលសំខាន់ៗជាច្រើន

ភ្នំពេញ៖ នាព្រឹកថ្ងៃទី២៧ ខែកក្កដា ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ អមដោយគណៈប្រតិភូក្រសួងផែនការ អញ្ជើញជួបសំណេះសំណាល និងសួរសុខទុក្ខថ្នាក់ដឹកនាំនិងមន្ត្រីរាជការនៃមន្ទីរផែនការខេត្តកំពង់ឆ្នាំង។ ពិធីនេះមានការអញ្ជើញចូលរួមពី លោក សាន់ យូ អភិបាលរងខេត្តកំពង់ឆ្នាំង តំណាងឯកឧត្តមអភិបាលនៃគណៈអភិបាលខេត្តកំពង់ឆ្នាំង ឯកឧត្តមរដ្ឋលេខាធិការ អនុរដ្ឋលេខាធិការ លោកអគ្គនាយករង លោកអនុប្រធាននាយកដ្ឋាន លោក លោកស្រី សហការីអមដំណើរឯកឧត្តមរដ្ឋមន្ត្រីអញ្ជើញចូលរួម។

ថ្លែងក្នុងសុន្ទរកថាស្វាគមន៍ និងរបាយការណ៍ គោរពជូនគណៈអធិបតីនិងអង្គពិធីទាំងមូល លោក ឌឹម ឌន ប្រធានមន្ទីរផែនការខេត្តកំពង់ឆ្នាំង បានលើកឡើងអំពី៖ (១) ទីតាំងភូមិសាស្រ្ត និងប្រជាសាស្ត្រនៃខេត្តកំពង់ឆ្នាំង (២) តួនាទីភារកិច្ច រចនាសម្ព័ន្ធដឹកនាំ និងស្ថានភាពមន្ត្រីរាជការនៃមន្ទីរផែនការខេត្តកំពង់ឆ្នាំង (៣) លទ្ធផលការងារដែលមន្ទីរផែនការសម្រេចបានក្នុងរយៈពេល១ឆ្នាំកន្លងទៅ (៤) បញ្ហាប្រឈម និង (៥) សំណូមពរ។

មានមតិសំណេះសំណាលក្នុងពិធី ឯកឧត្តមរដ្ឋមន្ត្រី បានពាំនាំនូវប្រសាសន៍ផ្តាំផ្ញើសួរសុខទុក្ខរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត មកដល់ថ្នាក់ដឹកនាំនិងមន្ត្រីរាជការទាំងអស់នៃមន្ទីរផែនការខេត្តកំពង់ឆ្នាំង។

ជាមួយគ្នានេះ ឯកឧត្តមរដ្ឋមន្ត្រី បានកោតសរសើរនិងវាយតម្លៃខ្ពស់ ចំពោះលោកប្រធានមន្ទីរ ព្រមទាំងថ្នាក់ដឹកនាំនិងមន្ត្រីរាជការនៃមន្ទីរផែនការខេត្តកំពង់ឆ្នាំងទាំងអស់ ដែលបានបំពេញភារកិច្ចយ៉ាងសកម្ម និងសម្រេចបានលទ្ធផលសំខាន់ៗជាច្រើន ជាពិសេសការពង្រឹងរចនាសម្ព័ន្ធដឹកនាំ លើកកម្ពស់សមភាពយេនឌ័រ និងប្រសិទ្ធភាពការងារ ជាមួយនឹងយន្តការវាយតម្លៃមន្ត្រីរាជការ រាប់ចាប់ពីមន្ត្រីរហូតដល់ប្រធានមន្ទីរ។

មានប្រសាសន៍ក្នុងពិធី ឯកឧត្តមរដ្ឋមន្ត្រី បានចែករំលែកនូវវឌ្ឍនភាពការងារ សមិទ្ធផល និងកំណែទម្រង់នានា ដែលក្រសួងផែនការសម្រេចបានក្នុងរយៈពេល១ឆ្នាំកន្លងមក។ ផ្សារភ្ជាប់នឹងការងារកំណែទម្រង់ ឯកឧត្តមរដ្ឋមន្ត្រី បានថ្លែងអំពីយន្តការត្រួតពិនិត្យវាយតម្លៃមន្ត្រីរាជការ ដែលក្រសួងផែនការបាននិងកំពុងអនុវត្តផងដែរ។ ក្នុងពិធី ឯកឧត្តមរដ្ឋមន្ត្រី បានថ្លែងអំពី (១) ការរៀបចំកម្មវិធីវិនិយោគសាធារណៈ៣ឆ្នាំរំកិល (២) ការរៀបចំផែនការយុទ្ធសាស្ត្រអភិវឌ្ឍន៍ជាតិ (៣) ការតាមដានការអនុវត្តកម្មវិធីសកម្មភាពនៃសន្និសីទអន្តរជាតិស្ដីពីប្រជាជននិងអភិវឌ្ឍន៍ (៤) ការចាកចេញរបស់កម្ពុជាពីចំណាត់ក្រុមប្រទេសអភិវឌ្ឍន៍តិចតួច និងយុទ្ធសាស្ត្រអន្តរកាលដោយរលូន និង (៥) ការអនុវត្តគោលដៅអភិវឌ្ឍន៍ប្រកបដោយចីរភាពកម្ពុជា។ ជាមួយនឹងការងារប្រជាជននិងការអភិវឌ្ឍ ឯកឧត្តមរដ្ឋមន្ត្រី បានលើកឡើងអំពីការគិតគូររបស់ក្រសួងផែនការ លើការងារគោលនយោបាយជាតិប្រជាជន សំដៅទាញយកជាអតិបរមានូវភាគលាភប្រជាសាស្ត្រ ទី១ ទី២ និងទី៣។

ឯកឧត្តមរដ្ឋមន្ត្រី បានផ្ដោតការយកចិត្តទុកដាក់ខ្ពស់ លើការងារអាហារូបត្ថម្ភ ដែលក្នុងនោះរួមមាន ការបញ្ចូលជាតិអីយ៉ូដ សារជាតិដែក និងវីតាមីន ទៅក្នុងអាហារ ដែលជាកិច្ចការដ៏សំខាន់ក្នុងការលើកកម្ពស់សុខុមាលភាពប្រជាជន ជាពិសេសកុមារ ដែលចាំបាច់ត្រូវការអាហារូបត្ថម្ភពេញលេញ សម្រាប់ការលូតលាស់ប្រកបដោយភាពរឹងមាំ និងសុខភាពល្អ។

ឆ្លៀតក្នុងឱកាសនេះ ឯកឧត្តមរដ្ឋមន្ត្រី បានលើកឡើងពីអត្ថប្រយោជន៍ដ៏មហាសាលរបស់ព្រែកជីកហ្វូណន-តេជោ ដែលជាគំនិតផ្តួចផ្ដើមដ៏ឧត្តុង្គឧត្តមរបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាអតីតនាយករដ្ឋមន្ត្រី ព្រមទាំងកិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា ឡាវ វៀតណាម (CLV-DTA)។

ឯកឧត្តមរដ្ឋមន្ត្រី បានគូសបញ្ជាក់ថា កិច្ចសហប្រតិបត្តិការតំបន់ត្រីកោណអភិវឌ្ឍន៍នេះ ពុំមែនជាការកាត់ដី ឬដាក់រួមគ្នា ដូចក្រុមប្រឆាំងជ្រុលនិយម បានបំភ្លៃនោះឡើយ។

ឯកឧត្តមរដ្ឋមន្ត្រី ជំនឿជាក់ថា ថ្នាក់ដឹកនាំនិងមន្ត្រីរាជការនៃមន្ទីរផែនការខេត្តកំពង់ឆ្នាំងទាំងអស់ ពិតជាបានស្ដាប់នូវប្រសាសន៍របស់សម្ដេចតេជោ និងប្រមុខរាជរដ្ឋាភិបាល ហើយនឹងចូលរួមផ្សព្វផ្សាយនិងពន្យល់បន្ត ដល់បងប្អូន និងអ្នកជុំវិញខ្លួន ឱ្យបានស្វែងយល់កាន់តែច្បាស់ និងជៀសផុតពីការបោកបញ្ឆោតរបស់ក្រុមប្រឆាំងជ្រុលនិយម ដែលមានចេតនាបំផ្លិចបំផ្លាញសន្តិភាព និងកេងផលចំណេញពីបងប្អូនប្រជាពលរដ្ឋ៕