រដ្ឋមន្ត្រីការពារជាតិហ្វីលីពីន លើកឡើងថា ប្រទេសចិន ជាអ្នករំខានដ៏ធំបំផុត នៃសន្តិភាពអន្តរជាតិនៅក្នុងតំបន់

ម៉ានីល៖ រដ្ឋមន្ត្រីការពារជាតិហ្វីលីពីន បានលើកឡើងនៅថ្ងៃអង្គារទី២៧ ខែសីហាថា ប្រទេសចិនគឺជាអ្នករំខានដ៏ធំបំផុតនៃសន្តិភាពអន្តរជាតិនៅក្នុងតំបន់។ រដ្ឋាភិបាលហ្វីលីពីនក៏បានថ្កោលទោសចិន កាលពីថ្ងៃចន្ទចំពោះសកម្មភាពឈ្លានពានដដែលៗ គ្មានវិជ្ជាជីវៈ និងខុសច្បាប់នៅសមុទ្ទចិនខាងត្បូង បន្ទាប់ពីការប៉ះទង្គិចគ្នា និងឧបទ្ទវហេតុជាច្រើននៅលើអាកាស និងនៅសមុទ្ទកាលពីសប្តាហ៍មុន។

រដ្ឋមន្ត្រីការពារជាតិហ្វីលីពីន លោក ហ្គីលប៊ឺតូ តេអូដូរ៉ូ (Gilberto Teodoro) បានប្រាប់សន្និសីទយោធាប្រចាំឆ្នាំ នៃបញ្ជាការរបស់សហរដ្ឋអាម៉េរិក នៅឥណ្ឌូប៉ាស៊ីហ្វិកថា រដ្ឋធានីម៉ានីល មានការយកចិត្តទុកដាក់យ៉ាងខ្លាំងចំពោះការការពារអធិបតេយ្យភាពរបស់ខ្លួន។ លោកបាន​ជំរុញ​ប្រទេស​ដៃគូ​ឱ្យ​ថ្កោលទោសសកម្មភាព​ខុសច្បាប់​របស់​ចិន​នៅ​សមុទ្ទ​ចិន​ខាងត្បូង។ ការលើកឡើងរបស់ប្រមុខការពារជាតិហ្វីលីពីន កើតឡើងបន្ទាប់ពីក្រុមប្រឹក្សាដែនសមុទ្ទជាតិរបស់ប្រទេសហ្វីលីពីន បានបញ្ជាក់ថា យន្តហោះរបស់ចិន បានធ្វើសមយុទ្ធគ្មានសុវត្ថិភាពប្រឆាំងនឹងយន្តហោះស៊ីវិលដែលកំពុងល្បាតនៅលើតំបន់ Scarborough shoal និងថ្មប៉ប្រះទឹក Subi។ កាលពីថ្ងៃអាទិត្យចុងសប្តាហ៍កន្លងទៅ នាវារបស់ចិន ក៏បានរារាំង វាយឆ្មក់ និងប្រើកាណុងបាញ់ទឹក ប្រឆាំងនឹងនាវានេសាទហ្វីលីពីន ខណៈពេលដែលវាកំពុងបំពេញបេសកកម្មផ្គត់ផ្គង់អ្នកនេសាទហ្វីលីពីននៅតំបន់ Sabina shoal។ ក្រុមប្រឹក្សាដែនសមុទ្ទថា សកម្មភាពទាំងនេះ គឺគួរឱ្យព្រួយបារម្ភ។

ក្រុមប្រឹក្សាដដែលនេះ បានលើកឡើងថា សកម្មភាពទាំងនេះចោទជាសំណួរអំពីការប្តេជ្ញាចិត្តរបស់ប្រទេសចិន ក្នុងការបន្ធូរបន្ថយស្ថានការណ៍នៅក្នុងតំបន់ និងបង្កើតបរិយាកាសអំណោយផលសម្រាប់ការសន្ទនា និងការពិគ្រោះយោបល់។ ហ្វីលីពីនបានបន្ថែមថា ខ្លួននឹងបន្តការទូតក្នុងការគ្រប់គ្រងបញ្ហាដែនសមុទ្ទ ហើយបានជំរុញឱ្យប្រទេសចិនត្រឡប់ទៅរកផ្លូវនៃកិច្ចសន្ទនាស្ថាបនាលើបញ្ហាសមុទ្ទចិនខាងត្បូង។ ផ្ទុយពីការលើកឡើងរបស់ភាគីហ្វីលីពីន ឆ្មាំសមុទ្ទចិនអះអាងថា នាវាហ្វីលីពីនមិនអើពើនឹងការព្រមានម្ដងហើយម្ដងទៀត ហើយបានចូលទៅជិតដោយចេតនា និងបានបុកទូកអនុវត្តច្បាប់របស់ប្រទេសចិន។

កាលពីថ្ងៃចន្ទ ឧប្បត្តិហេតុមួយទៀតបានកើតឡើងជុំវិញតំបន់ដូចគ្នា នៅពេលដែលនាវាឆ្មាំឆ្នេរសមុទ្ទហ្វីលីពីន (PCG) ពីរគ្រឿងត្រូវបានបង្ខំឱ្យបោះបង់បេសកកម្មរបស់ពួកគេក្នុងការដឹកជញ្ជូនគ្រឿងផ្គត់ផ្គង់ដល់នាវិកនៅលើនាវាឆ្មាំឆ្នេរសមុទ្ទមួយផ្សេងទៀតនៅតំបន់ Sabina shoal។ ឆ្មាំឆ្នេរសមុទ្ទហ្វីលីពីន បានឱ្យដឹងថា ចិនបានដាក់ពង្រាយកម្លាំងហួសហេតុ ដែលមាននាវាចំនួន៤០គ្រឿង រួមទាំងនាវាចម្បាំងរបស់កងទ័ពជើងទឹកចំនួន៣ ដើម្បីរារាំងប្រតិបត្តិការផ្គត់ផ្គង់ឡើងវិញ។ ប៉ុន្តែឆ្មាំសមុទ្ទរបស់ចិន បានអះអាងថា ខ្លួនបានចាត់វិធានការឆ្លើយតបលើនាវាឆ្មាំឆ្នេរសមុទ្ទហ្វីលីពីនពីរគ្រឿងដែលរំលោភបំពានដោយខុសច្បាប់ចូលទៅក្នុងដែនទឹករបស់ខ្លួន ហើយបន្ទាប់មកបានចូលទៅជិតនាវាឆ្មាំឆ្នេរសមុទ្ទចិនក្នុងលក្ខណៈគ្រោះថ្នាក់។

គួរបញ្ជាក់ថា មហាយក្សចិនទាមទារអធិបតេយ្យភាពលើស្ទើរតែទាំងអស់នៃសមុទ្ទចិនខាងត្បូង រួមទាំងតំបន់ដែលទាមទារដោយហ្វីលីពីន កោះតៃវ៉ាន់ ម៉ាឡេស៊ី ឥណ្ឌូណេស៊ី វៀតណាម និងប្រ៊ុយណេ។ ក្រសួងសន្តិសុខរដ្ឋរបស់ប្រទេសចិន បានលើកឡើងនៅក្នុងសេចក្តីថ្លែងការណ៍មួយនៅថ្ងៃអង្គារថា អធិបតេយ្យភាពដែនដី និងសិទ្ធិ និងផលប្រយោជន៍ដែនសមុទ្ររបស់ចិននៅក្នុងសមុទ្ទចិនខាងត្បូង មានមូលដ្ឋានប្រវត្តិសាស្ត្រ និងច្បាប់គ្រប់គ្រាន់៕