នគរបាលច្រកទ្វារអាកាសយានដ្ឋានអន្តរជាតិភ្នំពេញ រៀបចំសណ្ដាប់ធ្នាប់ជូន គណៈប្រតិភូក្រសួងសុខាភិបាល អញ្ជើញត្រួតពិនិត្យកន្លែងអ្នកដំណើរមកដល់ និងអគារVIP ដើម្បីទប់ស្កាត់ជំងឺរាតត្បាតថ្មី Mpox ដែលកំពុងរាតត្បាតតាមបណ្ដាប្រទេសមួយចំនួន

ភ្នំពេញ៖ នាព្រឹកថ្ងៃអង្គារ ៨រោច ខែស្រាពណ៍ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី២៧ ខែសីហា ឆ្នាំ២០២៤នេះ នគរបាលច្រកទ្វារអាកាសយានដ្ឋានអន្តរជាតិភ្នំពេញ បានរៀបចំសណ្ដាប់ធ្នាប់ជូន គណៈប្រតិភូក្រសួងសុខាភិបាល ដឹកនាំដោយលោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងមន្ត្រីជំនាញមួយចំនួន អញ្ជើញត្រួតពិនិត្យកន្លែងអ្នកដំណើរមកដល់ និងអគារVIP ដើម្បីទប់ស្កាត់ជំងឺរាតត្បាតថ្មី Mpox ដែលកំពុងរាតត្បាតតាមបណ្ដាប្រទេសមួយចំនួន។

ការចុះត្រួតពិនិត្យនោះ មានការចូលរួមពីឯកឧត្ដម នាយកអាកាសយានដ្ឋានអន្តរជាតិភ្នំពេញ រដ្ឋលេខាធិការអាកាសចរណ៍ស៊ីវិល ឯកឧត្ដម ឧត្ដមសេនីយ៍ឯក ស សេរីវិចិត្រ អគ្គនាយករង នៃអគ្គនាយកដ្ឋានអន្តោប្រវេសន៍ លោកនាយប៉ុស្តិ៍ អ្នកគ្រប់គ្រងអាកាសយានដ្ឋាន(ខាងក្រុមហ៊ុនSCA) និងកម្លាំងចូលរួមជាច្រើនរូបផងដែរ។

លោកជំទាវវេជ្ជបណ្ឌិត យក់ សម្បត្តិ បានបញ្ជាក់ថា ការចុះត្រួតពិនិត្យត្រួតពិនិត្យកន្លែងអ្នកដំណើរមកដល់ និងអគារVIP នាពេលនេះ ក្នុងគោលបំណងទប់ស្កាត់ជំងឺរាតត្បាតថ្មី Mpox ដែលកំពុងរាតត្បាតតាមបណ្ដាប្រទេសមួយចំនួនដែលគួរឲ្យព្រួយបារម្ភ។ ម្យ៉ាងវិញទៀត ដើម្បីការងារនិងទប់ស្កាត់ឲ្យបានទាន់ពេល នៅអាកាសយានដ្ឋានអន្តរជាតិភ្នំពេញត្រូវរៀបចំតម្លើងម៉ាស៊ីនវាស់កំដៅ តាមដានអ្នកដំណើរដែលមានសីតុណ្ហភាពខុសប្រក្រតី យកមកទៅពិនិត្យបន្ត ៕