ឧបនាយករដ្ឋមន្ត្រី ហង់ជួន ណារ៉ុន ផ្តល់អនុសាសន៍ ១០ចំណុច ដើម្បីសម្រេចគោលដៅបណ្តុះបណ្តាល គ្រូបង្រៀនប្រកបដោយគុណភាព

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២៦ ខែសីហា ឆ្នាំ២០២៤ បានដឹកនាំក្រុមការងារ ចុះទស្សនកិច្ចពិនិត្យការបណ្តុះបណ្តាល និងសំណេះសំណាលការងារ នៅវិទ្យាស្ថានជាតិអប់រំ ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំ លោក លោកស្រី មន្ត្រីពាក់ព័ន្ធក្រោមឱវាទ គ្រូឧទ្ទេស លោកគ្រូ អ្នកគ្រូ និងបុគ្គលិកអប់រំនៃវិទ្យាស្ថានជាតិអប់រំ។

មុនឈានដល់កិច្ចប្រជុំសំណេះសំណាលជាមួយ គ្រូឧទ្ទេស លោកគ្រូ អ្នកគ្រូ និងបុគ្គលិកអប់រំ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានចុះពិនិត្យតាមថ្នាក់រៀនដែលកំពុងដំណើរការបង្រៀន និងបានចូលតាមថ្នាក់រៀនមួយចំនួន ដើម្បីសំណេះសំណាលជាមួយគរុនិស្សិតដោយផ្ទាល់។

ដើម្បីសម្រេចគោលដៅបណ្តុះបណ្តាលគ្រូបង្រៀនប្រកបដោយគុណភាព ឆ្លើយតបទៅនឹងយុទ្ធសាស្រ្តបញ្ចកោណ ដំណាក់កាលទី ១ ដែលផ្តោតលើការកសាងមូលធនមនុស្ស ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍មួយចំនួន ដូចជា៖
១. សូមពង្រឹង និងពង្រីកលទ្ធភាពក្នុងការបង្រៀនអនឡាញ ដើម្បីបង្កើនវិសាលភាពនៃឱកាសបណ្ដុះបណ្ដាល និងចែករំលែកបទពិសោធន៍ ចំណេះដឹងឱ្យកាន់តែទូលំទូលាយ ពិសេសទៅតាមបណ្ដាលខេត្តឆ្ងាយៗ
២. បន្តថែទាំហេដ្ឋរចនាសម្ព័ន្ធរូបវន្តឱ្យបានស្អាតជាប់ជានិច្ច ធានាបាននូវបរិស្ថានសិក្សាល្អជានិរន្តសម្រាប់គ្រប់ជំនាន់
៣. សូមពិចារណា បង្កើតឱ្យមានមុខវិជ្ជាឯកទេស និងឯកទេសរង
៤. គ្រូដែលចេញថ្មីត្រូវមានគុណភាពស្របតាមស្តង់ដាវិជ្ជាជីវៈគ្រូបង្រៀន និងមានសមត្ថភាពលើផ្នែក ICT ឯកទេសឌីជីថល និង ជំនាញសតវត្សទី២១

៥. សូមរៀបចំឯកសារឱ្យពេញលេញតាមមុខវិជ្ជាឯកទេស ដោយរៀបចំបណ្ណាល័យស្តង់ដា ឱ្យមានសៀវភៅគ្រប់ ហើយសូមតាមនាយកដ្ឋានសិក្សាកំណត់សៀវភៅដែលគរុនិស្សិតត្រូវអានជាកាតព្វកិច្ច និងអានជាជម្រើស
៦. ពិនិត្យមើលដំណើរការនៅបណ្ណាល័យ បន្ទប់ពិសោធវិទ្យាសាស្រ្ត ឯកសារយុទ្ធសាស្រ្ត កម្មវិធីសិក្សា ឯកសារបង្រៀន និងរៀន និងហេដ្ឋារចនាសម្ព័ន្ធរូប វ័ន្តនានា ក្នុងវិទ្យាស្ថាន
៧. ធ្វើការសិក្សា វាយតម្លៃគុណភាពអនុវត្តរបស់គ្រូបង្រៀនចេញថ្មី និងបញ្ហារបស់សាលារៀន និងផ្ដល់របាយការណ៍ដល់ក្រសួង ព្រមទាំង កែលម្អកម្មវិធីបណ្ដុះបណ្ដាលរបស់ខ្លួនឱ្យកាន់តែមានភាពឆ្លើយតប

៨. បណ្ដុះបណ្ដាលយ៉ាងណា ឱ្យគ្រូបង្រៀនដែលចេញពីវិទ្យាស្ថាន មាន សមត្ថភាពច្នៃប្រឌិតខ្ពស់ អាចដោះស្រាយបញ្ហាបាននៅសាលារៀនគោល ដៅដែលត្រូវទៅបម្រើការងារ ពិសេសអាចអនុវត្តវិធីសាស្រ្តបង្រៀន ថ្មី ដែល បានរៀនពីវិទ្យាស្ថាន បទបែនស្របតាមស្ថានភាពនិង បរិបទ របស់ សាលារៀនជាក់ស្ដែង
៩. គួររៀបចំជាសមាគមនិស្សិត ឬការជួបជុំផ្សារភ្ជាប់ទំនាក់ទំនង រវាងសិស្សចាស់ និងសិស្សថ្មី ដើម្បីជំរុញការចែករំលែកចំណេះដឹង និងបទពិសោធ ឈានទៅកែលម្អគុណភាពអប់រំ
១០.គ្រូបង្រៀនចេញថ្មីត្រូវមានសមត្ថភាពជួយក្រសួង ដើម្បីធ្វើកំណែទម្រង់ សាលារៀន មិនមែនឱ្យសាលារៀន ធ្វើកំណែទម្រង់ គ្រូបង្រៀនចេញថ្មីទេ។

ជាថ្មីម្តងទៀត ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានវាយតម្លៃខ្ពស់ ចំពោះការសម្រេចបានលើការកែលម្អហេដ្ឋារចនាសម្ព័ន្ធ ដែលនេះជាសមិទ្ធផលកេរ្តិ៍ដំណែលរួមរវាងក្រសួង និងវិទ្យាស្ថានជាតិអប់រំ និងបានថ្លែងអំណរគុណដល់ លោកនាយក គ្រូឧទ្ទេស លោកគ្រូ អ្នកគ្រូ បុគ្គលិកអប់រំ និងភាគីពាក់ព័ន្ធទាំងអស់ ដែលបានប្រឹងប្រែងយកអស់កម្លាំងកាយចិត្តបំពេញតួនាទីភារកិច្ចប្រកបដោយការ ទទួលខុសត្រូវខ្ពស់ និង ជូនពរឱ្យវិទ្យាស្ថានជាតិអប់រំរាជធានីភ្នំពេញ ក្លាយជាវិទ្យាស្ថានគរុកោសល្យគំរូនាពេលអនាគត។

គួរបញ្ជាក់ដែរថា វិទ្យាស្ថានជាតិអប់រំ មានតួនាទី និងភារកិច្ច ក្នុងការរៀបចំផែនការបណ្តុះបណ្តាល និងអភិវឌ្ឍវិជ្ជាជីវៈជាប្រចាំសម្រាប់គ្រូបង្រៀនកម្រិតឧត្តម និងមន្ត្រីគ្រប់គ្រងអប់រំគ្រប់លំដាប់ថ្នាក់ , បណ្តុះបណ្តាលបរិញ្ញាបត្រជាន់ខ្ពស់អប់រំ ឯកទេសគ្រប់គ្រងអប់រំ នាយកសាលា អធិការអប់រំ ផែនការអប់រំ គោលនយោបាយអប់រំ វិធីសាស្ត្របង្រៀន ប្រឹក្សាគរុកោសល្យ អភិវឌ្ឍវិជ្ជាជីវៈជាប្រចាំដល់ជួរគ្រូបង្រៀន និងមន្រ្តីអប់រំគ្រប់លំដាប់ថ្នាក់ តាមផែនការរបស់ ក្រសួងអប់រំ យុវជន និងកីឡា ស្រាវជ្រាវលើការរៀន បង្រៀន និងគ្រប់គ្រងអប់រំឱ្យស្របតាមតម្រូវការជាតិ តំបន់ និងអន្តរជាតិ កសាងធនធានមនុស្សឱ្យមានគុណភាព និងប្រសិទ្ធភាព សម្រាប់ការអភិវឌ្ឍវិស័យអប់រំ និង ប្រទេសជាតិ អភិវឌ្ឍសមត្ថភាពអ្នកសិក្សា និងប្រែក្លាយពួកគេឱ្យទៅជាគំរូល្អក្នុងសង្គម ព្រមទាំងមានការ ត្រិះរិះពិចារណា មានគុណធម៌ល្អប្រពៃ មានគំនិតច្នៃប្រឌិត និងមានការពង្រឹងគុណភាព និង សមត្ថភាពជាប្រចាំស្របទៅតាមតម្រូវការក្នុងសតវត្សទី២១៕