មនុស្ស១១នាក់ស្លាប់ និង១៤នាក់បាត់ខ្លួន បន្ទាប់ពីភ្លៀងធ្លាក់ខ្លាំង បានវាយប្រហារខេត្ត Liaoning ប្រទេសចិន

បរទេស៖ ភ្លៀងធ្លាក់ខ្លាំងបានបណ្តាលឲ្យមនុស្ស ១១នាក់ស្លាប់ និង ១៤នាក់ផ្សេងទៀតបាត់ខ្លួននៅក្នុងទីក្រុង Huludao ខេត្ត Liaoning ភាគឦសានប្រទេសចិន នេះបើតាមអាជ្ញាធរក្នុងតំបន់បានឲ្យដឹងកាលពីថ្ងៃសុក្រ។

ជុំចុងក្រោយនៃភ្លៀងធ្លាក់ខ្លាំងបានបណ្តាលឱ្យមានការខូចខាតយ៉ាងធ្ងន់ធ្ងរនៅក្នុង Huludao ជាពិសេសនៅក្នុងខោនធី Jianchang និងខោនធី Suizhong។ ផ្លូវថ្នល់ បណ្តាញអគ្គិសនី បណ្តាញទំនាក់ទំនង ផ្ទះសម្បែង និងដំណាំផ្សេងៗត្រូវបានរងផលប៉ះពាល់យ៉ាងខ្លាំង។

បច្ចុប្បន្ននេះ ផ្លូវថ្នល់ និងបណ្តាញទំនាក់ទំនងកំពុងត្រូវបានស្តារឡើងវិញជាបណ្តើរៗនៅក្នុងតំបន់ដែលរងផលប៉ះពាល់ ហើយកិច្ចខិតខំប្រឹងប្រែងកំពុងត្រូវបានធ្វើឡើងដើម្បីស្វែងរកអ្នកបាត់ខ្លួន។

យោងតាមស្ថិតិបឋម មនុស្សចំនួន ១៨៨,៧៥៧នាក់ នៅ Huludao ត្រូវបានរងផលប៉ះពាល់ ដោយមានការខាតបង់ចំនួន ១០.៣ពាន់លានយន់ (ប្រហែល ១.៤៤ពាន់លានដុល្លារអាមេរិក)។

បន្ថែមលើនេះ ផ្លូវជាតិ និងខេត្តសំខាន់ៗចំនួន៩ និងផ្លូវជនបទចំនួន២១០ ត្រូវបានអាក់ខានក្នុងកម្រិតផ្សេងៗគ្នា ក្នុងនោះស្ពានចំនួន១៨៧ ត្រូវបានខូចខាត។