អភិបាលខណ្ឌឫស្សីកែវ បើកវគ្គបណ្តុះបណ្តាល ស្ដីពីកំណែទម្រង់វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុវិស័យកម្ពុជា ឆ្នាំ២០៥០ និងការតម្រង់ទិសដល់ក្រុមប្រឹក្សាជាប់ឆ្នោតថ្មី

ភ្នំពេញ៖ លោក ជិន ប៊ុនធឿន អភិបាល នៃគណៈអភិបាលខណ្ឌឫស្សីកែវ នាព្រឹកថ្ងៃទី១៩ ខែសីហា ឆ្នាំ២០២៤នេះ បានអញ្ជើញបើកវគ្គបណ្តុះបណ្តាល
ស្ដីពីកំណែទម្រង់វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុវិស័យកម្ពុជាឆ្នាំ២០៥០ និងការតម្រង់ទិសដល់ក្រុមប្រឹក្សាជាប់ឆ្នោតថ្មី ។

មានមតិស្វាគមន៍ក្នុងឱកាសនោះ លោក ជុំ បាយ័នវិបុល ប្រធានក្រុមប្រឹក្សាខណ្ឌឫស្សីកែវ និងជាប្រធានសាខាសមាគមក្រុមប្រឹក្សាខណ្ឌ សង្កាត់ នៃខណ្ឌឫស្សីកែវ បានមានប្រសាសន៍ថា វគ្គបណ្តុះបណ្តាលស្តីពី កំណែទម្រង់វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុ វិស័យកម្ពុជាឆ្នាំ២០៥០ និងការតម្រង់ទិសដល់ក្រុមប្រឹក្សាជាប់ឆ្នោតថ្មី ដែលប្រព្រឹត្តទៅ រយៈពេលមួយព្រឹក មានគោលបំណងលើកកម្ពស់ឋានៈ និងអភិវឌ្ឍសមត្ថភាពដល់ក្រុមប្រឹក្សាខណ្ឌ សង្កាត់ ការពារផលប្រយោជន៍ និងគុណប្រយោជន៍ស្របច្បាប់របស់សមាជិកដែលជាក្រុមប្រឹក្សា តាមរយៈវគ្គបណ្តុះបណ្តាលនេះអាចពង្រឹងសម្ថតភាពបន្ថែម ពីការកសាងភាពជាដៃគូ ជាមួយ ក្រសួង ស្ថាប័នពាក់ព័ន្ធ ដើម្បីអភិវឌ្ឍមូលដ្ឋាន ពង្រឹងនីតិរដ្ឋ និងជម្រុញលទ្ធិប្រជាធិបតេយ្យនៅ កម្ពុជា។

ជាមួយគ្នានោះលោកប្រធានក្រុមប្រឹក្សាខណ្ឌឫស្សីកែវ ក៏បានជម្រាបជូនពីស្ថានភាពរបស់ក្រុមប្រឹក្សាខណ្ឌ សង្កាត់នៃខណ្ឌឫស្សីកែវ ដែលក្រុមប្រឹក្សាខណ្ឌ សង្កាត់ ទាំងអស់មានចំនួន ៨៦រូប ក្នុងនោះស្រី១៧រូប មាន ៣ គណបក្សនយោបាយ (គណបក្សប្រជាជនកម្ពុជាមានចំនួន ៧០រូប ស្រី១៧រូប, គណបក្សឆន្ទះខ្មែរមានចំនួន ១រូប ស្រីគ្មាន និងគណបក្សភ្លើងទៀនមានចំនួន ១៥ រូប ស្រីគ្មាន) ​​។

ឆ្លៀតក្នុងឱកាសដ៏វិសេសវិសាលនេះ លោក ជុំ បាយ័នវិបុល បានថ្លែងអំណរគុណយ៉ាងជ្រាល
ជ្រៅបំផុតចំពោះការជឿជាក់ និងការជឿទុកចិត្តដល់រូបលោក ក្នុងនាមជាប្រធានសាខាសមាគម និង ខិតខំអស់ពីកម្លាំងកាយចិត្តក្នុងកាបំពេញតួនាទីពង្រឹងស្ថាប័ន ឱ្យក្លាយជាអង្គភាពដ៏គួរឱ្យជឿទុក ដើម្បីធានាដល់ការលើកកម្ពស់ ភាពជាតំណាង ឱ្យក្រុមប្រឹក្សាខណ្ឌ សង្កាត់ ក្នុងខណ្ឌឫស្សីកែវ ដើម្បីផ្ដល់ការគាំទ្រ ការការពារ និងបម្រើផលប្រយោជន៍ស្របច្បាប់របស់សមាជិក។

ថ្លែងក្នុងឱកាសនោះដែរលោក ជិន ប៊ុនធឿន អភិបាលខណ្ឌឫស្សីកែវ បានថ្លែងកោតសរសើរ និងវាយតម្លៃខ្ពស់ចំពោះការរៀបចំវគ្គបណ្តុះបណ្ដាល ស្តីពីកំណែទម្រង់វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុ វិស័យកម្ពុជាឆ្នាំ២០៥០ និងការតម្រង់ទិសដល់ក្រុមប្រឹក្សាជាប់ឆ្នោតថ្មី រយៈពេលមួយព្រឹកនេះ ។

លោកអភិបាលខណ្ឌឫស្សីកែវមានប្រសាសន៍ថា វគ្គបណ្តុះបណ្ដាល ស្តីពីកំណែទម្រង់ វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុវិស័យកម្ពុជាឆ្នាំ២០៥០និងការតម្រង់ទិសដល់ក្រុមប្រឹក្សាជាប់ឆ្នោត នាឱកាសនេះ គឺជាសក្ខីភាពដែលឆ្លុះ បញ្ចាំងពីការអនុវត្ត យ៉ាងត្រឹមត្រូវនូវលក្ខន្តិកៈរបស់សមាគម ដែលជា”នីតិបុគ្គល” តំណាង ឱ្យសម្លេង និងជាអ្នកការពារផលប្រយោជន៍រួមរបស់ក្រុមប្រឹក្សាខណ្ឌ សង្កាត់ទាំងអស់ ក្នុងរាជធានីភ្នំពេញ ព្រមទាំងជាអ្នកអភិវឌ្ឍសមត្ថភាព និងបង្កើនប្រសិទ្ធភាពនៃការផ្ដល់ សេវាសាធារណៈ ដែលនឹងរួមចំណែកលើកកម្ពស់គុណភាព នៃជីវភាពរស់នៅ និងសុខុមាល ភាពរបស់ប្រជាពលរដ្ឋ តាមរយៈអភិបាលកិច្ចតាមបែបប្រជាធិបតេយ្យនៅមូលដ្ឋាន។