ប្រធានាធិបតីប៉ាឡេស្ទីន ម៉ាម៉ូដ អាបាស៖ ការទទួលស្គាល់ រដ្ឋប៉ាឡេស្ទីន ជាគន្លឹះ នៃសន្តិភាពក្នុងតំបន់
ហ្គាហ្សា៖ ប្រធានាធិបតីប៉ាឡេស្ទីនលោក ម៉ាម៉ូដ អាបាស បានឲ្យដឹងថា ប្រសិនបើគ្មានការទទួលស្គាល់ជាអន្តរជាតិរដ្ឋប៉ាឡេស្ទីនទេនោះ វានឹងមិនមានសន្តិភាព សាមគ្គីភាព និងវិបុលភាពនៅក្នុងតំបន់នោះទេ។
បន្ទាប់ពីជួបជាមួយប្រធានាធិបតីតួកគីលោក Recep Tayyip Erdogan កាលពីថ្ងៃពុធ ប្រធានាធិបតីប៉ាឡេស្ទីន បានធ្វើសុន្ទរកថា នៅក្នុងសភាតួកគីជាលើកដំបូង ចាប់តាំងពីជម្លោះហ្គាហ្សា បានផ្ទុះឡើងក្នុងខែតុលា ឆ្នាំមុន។
ក្នុងសុន្ទរកថា លោកបានកត់សម្គាល់ថា សង្គមអន្តរជាតិមិនគួរនៅស្ងៀមចំពោះជម្លោះនៅហ្គាហ្សានោះទេ។ លោកបានចង្អុលបង្ហាញថា សហរដ្ឋអាមេរិកបានប្រើប្រាស់អំណាច វេតូរបស់ខ្លួនចំនួនបីដងនៅក្នុងក្រុមប្រឹក្សាសន្តិសុខអង្គការសហប្រជាជាតិ ដើម្បីរារាំងដំណោះស្រាយ ទាក់ទងនឹងតំបន់ហ្គាហ្សា ហើយថាដំណោះស្រាយដែលបានអនុម័តទាក់ទងនឹងបញ្ហាប៉ាឡេស្ទីនមិនត្រូវបានអនុវត្តនោះទេ។
ប្រធានាធិបតីប៉ាឡេស្ទីនរូបនេះ បានបន្ដថា ការទទួលស្គាល់រដ្ឋប៉ាឡេស្ទីន គឺជាគន្លឹះនៃសន្តិភាព សាមគ្គីភាព និងវិបុលភាពនៃតំបន់។ លោកបានបន្ថែមថា លុះត្រាតែប្រជាជនប៉ាឡេស្ទីនសម្រេចបានឯកភាពជាតិ វាអាចពិបាកក្នុងការទទួលបានជ័យជម្នះចុងក្រោយ។
បច្ចុប្បន្ននេះរដ្ឋប៉ាឡេស្ទីនត្រូវបានទទួលស្គាល់ ដោយរដ្ឋសមាជិក ១៤៥ របស់អង្គការសហប្រជាជាតិ ប៉ុន្តែប្រទេសនេះនៅតែជាអ្នកសង្កេតការណ៍ របស់អង្គការសហប្រជាជាតិ ជំនួសឱ្យសមាជិកភាព។
ក្នុងអំឡុងសុន្ទរកថា របស់លោកប្រធានាធិបតីប៉ាឡេស្ទីនបានប្រកាសថា លោកនឹងទៅតំបន់ហ្គាហ្សា ដោយលើកឡើងថា ជីវិតរបស់លោក មិនមានតម្លៃជាងកុមារនៅទីនោះទេ៕
