អគ្គនាយកដ្ឋានរដ្ឋបាល កំពុងត្រៀមរៀបចំកិច្ចប្រជុំលើកទី១៣ ស្តីពីកិច្ចសហប្រតិបត្តិការ និងការអភិវឌ្ឍរវាងបណ្តាខេត្តជាប់ព្រំដែនកម្ពុជា-វៀតណាម និងគ្រោងរៀបចំកិច្ចប្រជុំអភិបាលខេត្តជាប់ព្រំដែនកម្ពុជា-ថៃ លើកទី៨
ភ្នំពេញ៖ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានលើកឡើងថា អគ្គនាយកដ្ឋានរដ្ឋបាល បាននឹងកំពុងត្រៀមរៀបចំកិច្ចប្រជុំលើកទី១៣ ស្តីពីកិច្ចសហប្រតិបត្តិការ និងការអភិវឌ្ឍរវាងបណ្តាខេត្តជាប់ព្រំដែនកម្ពុជា-វៀតណាម ដែលគ្រោងនឹងប្រព្រឹត្តទៅក្នុងអំឡុងខែសីហា ឆ្នាំ២០២៤ នៅរាជធានីភ្នំពេញ និងគ្រោងរៀបចំកិច្ចប្រជុំអភិបាលខេត្តជាប់ព្រំដែនកម្ពុជា-ថៃលើកទី៨ នាថ្ងៃទី២៨-៣០ ខែសីហា ឆ្នាំ២០២៤ នៅរាជធានីភ្នំពេញ។
ក្នុងឱកាសអញ្ជើញផ្ដល់កិច្ចសម្ភាសន៍ ស្ដីពី «វឌ្ឍនភាពការងាររបស់ អគ្គនាយកដ្ឋានរដ្ឋបាល ក្រសួងមហាផ្ទៃ» នាថ្ងៃទី១២ ខែសីហា ឆ្នាំ២០២៤នេះ ឯកឧត្ដម សួស ប្រាថ្នា បានមានប្រសាសន៍ឲ្យដឹងថា ដើម្បីលើកកម្ពស់ទំនាក់ទំនង និងកិច្ចសហប្រតិបត្តិការលើវិស័យនានាជាមួយខេត្ត ក្រុងនៃ បណ្តាប្រទេសជាមិត្ត និងអង្គការអន្តរជាតិ អគ្គនាយកដ្ឋានរដ្ឋបាល ក្រសួងមហាផ្ទៃបានគាំទ្រ សម្របសម្រួលឱ្យរដ្ឋបាលរាជធានី ខេត្តចំនួន ៣រួមមាន៖ រាជធានីភ្នំពេញ ខេត្តសៀមរាប និងខេត្តបន្ទាយមានជ័យ ចុះអនុស្សរណៈនៃការយោគយល់គ្នា និងកិច្ចព្រមព្រៀងស្តីពីការចងសម្ព័ន្ធមេត្រីភាពជាមួយខេត្ត ក្រុងនៃបណ្តាប្រទេសជាមិត្តចំនួន ៤រួមមាន៖ រាជធានីភ្នំពេញ និងខេត្តសៀមរាបជាមួយតំបន់ស្វយ័តជេជូ នៃសាធារណរដ្ឋ កូរ៉េ រាជធានីភ្នំពេញជាមួយទីក្រុងឆាងសា ខេត្តហ៊ូណាននៃសាធារណរដ្ឋប្រជាមានិតចិន និងខេត្តបន្ទាយ-មានជ័យជាមួយខេត្តវិញឡុង និងខេត្តដុងថាប់នៃសាធារណរដ្ឋសង្គមនិយមវៀតណាម។
ឯកឧត្ដមបន្ថែមថា ក្រៅពីនេះ អគ្គនាយកដ្ឋានរដ្ឋបាល ក្រសួងមហាផ្ទៃបានធ្វើការគាំទ្រ សម្របសម្រួលឱ្យរដ្ឋបាល ខេត្តព្រះសីហនុចូលជាសមាជិកបណ្ដាញសកលនិងថ្នាក់តំបន់របស់សមាគមអន្តរជាតិនៃអភិបាលក្រុងនិយាយភាសាបារាំង (AIMF) ព្រមទាំងបានជួយសម្របសម្រួលឱ្យរដ្ឋបាលខេត្តកំពង់ឆ្នាំង ចុះហត្ថលេខាលើកិច្ចព្រមព្រៀង អនុវត្តគម្រោងលើកកម្ពស់ជីវភាពប្រជាជនស្រុកកំពង់លែង ជាមួយអង្គការមូលនិធិសម្រាប់ការអភិវឌ្ឍន៍ និងជំនួយសង្គ្រោះអន្តរជាតិ(FIDR) សម្រាប់រយៈពេល៤ឆ្នាំ (២០២៤-២០២៨) ៕
