ភ្នំពេញ៖ យ៉ាងហោចណាស់មានយុវជន៥នាក់ ត្រូវបានកម្លាំងនគរបាលរាជធានីភ្នំពេញ ចាប់ខ្លួនបញ្ជូនទៅតុលាការ ក្រោយធ្វើសកម្មភាពចាប់រំលោភយុវតីម្នាក់ រហូតបានសម្រេច ប្រព្រឹត្តិកាលពីវេលាម៉ោង១៣ៈ០០នាទីថ្ងៃទី១០សីហា ឆ្នាំ២០២៤ នៅចំណុចផ្ទះជួល ភូមិអន្លងគង សង្កាត់ព្រៃស ខណ្ឌដង្កោ។
យោងតាមការឱ្យដឹងពីមន្ត្រីសមត្ថកិច្ច បានបញ្ជាក់ថា ជនសង្ស័យចំនួន០៥នាក់មានឈ្មោះ៖ ១.ឈ្មោះ សុជា សុវត្ត្រា, ២.ឈ្មោះ ម៉ៅ សុចាន់, ៣.ឈ្មោះ លាភ សុលាក់ អ្នកទាំងបីមានទីលំនៅភូមិអន្លងគងចាស់ សង្កាត់ព្រៃស ខណ្ឌដង្កោ រាជធានីភ្នំពេញ, ៤.ឈ្មោះ ឡន សុធី មានទីលំនៅភូមិម៉ឺន្ត្រា សង្កាត់ស្ពានថ្ម ខណ្ឌដង្កោ និង៥.ឈ្មោះ យឿន ណុច ទីលំនៅបន្ទប់ជួល ភូមិគោកឪឡឹក សង្កាត់ស្ពានថ្ម ខណ្ឌដង្កោ។
គួររម្លឹកថា កាលពីថ្ងៃកើតហេតុខាងលើ ជនសង្ស័យឈ្មោះ ឡន សុធី បានជិះម៉ូតូមកដឹកជនរងគ្រោះទៅផ្ទះជួលរបស់ជនសង្ស័យ ហើយបានធ្វើសកម្មភាពរំលោភ សេពសន្ថវៈបានសម្រេចម្ដងម្នាក់ៗ រួចដឹកជនរងគ្រោះត្រលប់មកផ្ទះវិញ។ រហូតដល់ថ្ងៃទី១១ ខែសីហា ឆ្នាំ២០២៤ វេលាម៉ោង៣ទាបភ្លឺ ជនរងគ្រោះមានអាការៈចូលបន្ទប់ទឹកញឹកញាប់ ម្ដាយជនរងគ្រោះក៏បានសួរនាំ ទើបជនរងគ្រោះប្រាប់ម្ដាយអំពីសកម្មភាពខាងលើឱ្យម្ដាយដឹង។ ពេលស្តាប់ឮកូនស្រីនិយាយប្រាប់រួច ម្ដាយជនរងគ្រោះ ក៏បានរាយការណ៍ទៅសមត្ថកិច្ច និងបានចុះទៅដល់កន្លែងកើតហេតុ ដើម្បីឃាត់ខ្លួនជនសង្ស័យ និងបក្ខពួកខាងលើតែម្ដង។
បច្ចុប្បន្នជនសង្ស័យទាំង៥នក់ ត្រូវបានសមត្ថកិច្ចនាំយកមក ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវិធីច្បាប់ ៕
