ពិធីបួងសួងរំលឹកដឹងគុណដូនតាបុព្វបុរសខ្មែរគ្រប់ប្រាសាទ និងប្រកាសសមាសភាពឧត្តមទីប្រឹក្សា និងទីប្រឹក្សាផ្ទាល់សម្ដេចមហាសង្ឃរាជ បួរ គ្រី
ភ្នំពេញ៖ នាថ្ងៃទី១០ ខែសីហា ឆ្នាំ២០២៤នេះ នៅមណ្ឌលព្រះកម្មដ្ឋាន ព្រះករុណាព្រះមហាក្សត្រ សីហមុនី ស្ថិតក្នុងសង្កាត់គោកចក ក្រុងសៀមរាប ខេត្តសៀមរាប មានរៀបចំពិធីបួងសួងរំលឹកដឹងគុណដូនតាបុព្វបុរសខ្មែរគ្រប់ប្រាសាទ និងព្រះរាជសង្ឃប្រកាស សមាសភាពចំនួន២រូប ជាឧត្តមទីប្រឹក្សា និងចំនួន២៨រូបជា ទីប្រឹក្សាផ្ទាល់សម្ដេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្ដេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា ដែលកម្មវិធីនេះរៀបចំឡើងដោយក្រុមហ៊ុន ញូ-ធី-រិច ឯ.ក ដោយមានការនិមន្តយាងពីសម្ដេចសង្ឃ ព្រះមេគណ មន្ត្រីសង្ឃ និងប្រជាពុទ្ធបរិស័ទជាច្រើនអង្គ/នាក់។
ក្នុងព្រះរាជឱកាសនោះ សម្ដេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី បានមានព្រះបន្ទូលថា ការប្រកាសនេះ កើតឡើងដោយសទ្ធាជ្រះថ្លាគ្រប់ៗគ្នាទាំងអស់ ឥតមានកើតឡើងដោយការបង្ខិតបង្ខំនោះទេ គឺចង់មកជួយបម្រើការងារក្នុងព្រះពុទ្ធសាសនា ក្នុងតួនាទីជាឧត្តមទីប្រឹក្សា និង ទីប្រឹក្សាផ្ទាល់ សម្ដេចព្រះមហាសង្ឃរាជ នៃគណៈធម្មយុត្តិកនិកាយ។ យើងដឹងហើយថា ព្រះពុទ្ធសាសនានៅកម្ពុជា គឺបានចាត់ទុកជាសាសនារបស់រដ្ឋ មានបាវចនាជាតិ សាសនា ព្រះមហាក្សត្រ។ សាសនាព្រះពុទ្ធតំណាងដោយនិកាយពីរ គឺធម្មយុត្តិកនិកាយ និងមហានិកាយ។
សម្ដេចព្រះមហាសង្ឃរាជ សូមឱ្យព្រះសង្ឃគ្រប់ព្រះអង្គ ដែលគង់នៅតាមទីអារាមនានា សូមរក្សាតម្លៃព្រះពុទ្ធសាសនាឱ្យមានសេចក្ដីថ្លៃថ្នូរ ចៀសវាងប្រតិបត្តិអ្វីខុសពីវិន័យសង្ឃ។ ជាមួយនោះឯកឧត្តម លោកជំទាវ លោក លោកស្រីចំនួន៣០រូប ដែលត្រូវបានប្រកាសជាឧត្តមទីប្រឹក្សា និងទីប្រឹក្សាផ្ទាល់សម្ដេច នាពេលនេះដែរ សូមយកតួនាទីខ្លួនទៅប្រព្រឹត្តិទង្វើដែលស្របទៅនឹងច្បាប់រដ្ឋ កុំយកតួនាទីទៅប្រើខុសផ្លូវ ដែលធ្វើឱ្យប៉ះពាល់ដល់វិស័យព្រះពុទ្ធសាសនានៃយើង។
ជាពិសេសត្រូវខិតខំចូលរួមឱ្យបានច្រើនទៅលើគ្រប់វិស័យក្នុងប្រទេសកម្ពុជាយើង ធ្វើយ៉ាងណាចូលរួមជួយឱ្យសង្គមជាតិមានការរីកចម្រើន ទាំងវិស័យអាណាចក្រ និងពុទ្ធចក្រ ស្របទៅនឹងមាគ៌ា ឈ្នះ ឈ្នះ របស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចតេជោ ហ៊ុន សែន ប្រធានព្រឹទ្ធសភា ដែលដឹកនាំប្រទេសឱ្យមានសុខសន្តិភាពមកដល់សព្វថ្ងៃនេះ និងបន្តដឹកនាំដោយ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាពេលបច្ចុប្បន្ននេះ។
ក្នុងឱកាសនោះដែរ ព្រះសង្ឃ រួមនឹងពុទ្ធបរិស័ទ បានធ្វើការបូជាទៀនធូប រំលឹកនឹកគុណដល់ដូនតាខ្មែរគ្រប់ប្រាសាទ ដែលបានបូជាកម្លាំងកាយចិត្ត ខិតខំកសាង និងថែរក្សាទឹកដីអង្គរ និងអភិវឌ្ឍន៍ប្រទេសជាតិយើងឱ្យមានការរីកចម្រើនលូតលាស់ រុងរឿង ឥតឈប់ឈរមកដល់សព្វថ្ងៃនេះ និងសូមពរជ័យ សិរីសួស្ដីកើតមានដល់ថ្នាក់ដឹកនាំ និងប្រជាពលរដ្ឋខ្មែរ។ ហើយក្នុងកម្មវិធីក៏មានការរៀបចំពិធីរាប់បាត្រព្រះសង្ឃ ដើម្បីឧទ្ធិសកុសលដល់បុព្វបុរស និងបុព្វការីគ្រប់ជំនាន់ផងដែរ៕
