ឯកឧត្តម ម៉េង ប៉ូគន្ធ អគ្គនាយក នៃអគ្គនាយកដ្ឋានកិច្ចការរដ្ឋបាល ចូលរួមក្នុងពិធីបើកវគ្គបណ្តុះបណ្តាលស្តីពីការចូលរួមរបស់កសិករក្នុងការគ្រប់គ្រងប្រព័ន្ធធារាសាស្រ្ត
ភ្នំពេញ៖ នៅថ្ងៃទី៦ ខែសីហា ឆ្នាំ២០២៤ ឯកឧត្តម ម៉េង ប៉ូគន្ធ អគ្គនាយក នៃអគ្គនាយកដ្ឋានកិច្ចការរដ្ឋបាល បានអញ្ជើញចូលរួមក្នុងពិធីបើកវគ្គបណ្តុះបណ្តាលស្តីពី ការចូលរួមរបស់កសិករក្នុងការគ្រប់គ្រងប្រព័ន្ធធារាសាស្រ្ត នៅសាលប្រជុំនៃទីស្តីការក្រសួងធនធានទឹក និងឧតុនិយម។
សូមជម្រាបថា សិក្ខាសាលាបណ្ដុះបណ្ដាលនេះរៀបចំដោយមជ្ឈមណ្ឌលសេវាបច្ចេកទេសប្រព័ន្ធធារាសាស្រ្ត ឧតុនិយម ដែលមានរយៈពេល ៤ថ្ងៃ ចាប់ពីថ្ងៃទី៦ ដល់ថ្ងៃទី៩ ខែសីហា ឆ្នាំ២០២៤នេះ និងមានការចូលរួមពីសិក្ខាកាមសរុបចំនួន ៣០នាក់ មកពីនាយកដ្ឋានចំនួន៥ និងមន្ទីរធនធានទឹក និងឧតុនិយមខេត្ត ចំនួន១០។
ក្នុងឱកាសនោះ ឯកឧត្តមអគ្គនាយក បានបញ្ជាក់ឱ្យដឹងថា ការចូលរួមរបស់កសិករក្នុងការគ្រប់គ្រងប្រព័ន្ធធារាសាស្រ្ត គឺស្របតាមអនុក្រឹត្យ ៣១ ស្តីពីនីតិវិធី នៃការបង្កើត ការរំលាយចោល និងការកំណត់តួនាទីភារកិច្ច ស.ក.ប.ទ សារាចរលេខ ០១ ស្តីពី ការអនុវត្តគោលនយោបាយ និរន្តរភាពនៃប្រព័ន្ធធារាសាស្រ្ត ប្រកាស ៣០៦ របស់ក្រសួងធនធានទឹក និងឧតុនិយម ស្តីពីការប្រើប្រាស់ជាផ្លូវការនូវឯកសារជាមូលដ្ឋានដើម្បីបង្កើត និងអភិវឌ្ឍ ស.ក.ប.ទ។ល។
ឯកឧត្តមអគ្គនាយក សង្ឃឹមយ៉ាងមុតមាំថា វគ្គបណ្តុះបណ្តាលស្តីពី ការចូលរួមរបស់កសិករក្នុងការគ្រប់គ្រងប្រព័ន្ធធារាសាស្រ្ត នឹងចែករំលែកនូវចំណេះដឹង និងបទពិសោធន៍ ថ្មីៗបន្ថែម ដើម្បីជាទុនមួយយកទៅបណ្តុះបណ្តាលបន្តដល់សហគមន៍កសិករប្រើប្រាស់ទឹក នៅតាមរាជធានី-ខេត្ត នីមួយៗ ដើម្បីឱ្យប្រជាពលរដ្ឋចូលរួមយ៉ាងសកម្មក្នុងការគ្រប់គ្រង និងថែទាំប្រព័ន្ធធារាសាស្រ្តឱ្យកាន់តែមានប្រសិទ្ធភាព និងសូមឱ្យសិក្ខាកាមទាំងអស់មេត្តាយកចិត្តទុកដាក់ស្តាប់នូវរាល់ការពន្យល់ ណែនាំ និងបទបង្ហាញផ្សេងៗរបស់គ្រូឧទ្ទេស ដើម្បីបង្កើនចំណេះដឹងបន្ថែម និងចូលរួមចំណែកក្នុងការអភិវឌ្ឍប្រទសជាតិផង៕
