សម្តេចធិបតី ហ៊ុន ម៉ាណែត៖ ពេលដែលយើងមានមន្ទិលសង្ស័យខ្មែរគ្នាឯងនេះហើយ នឹងធ្វើឱ្យងាយស្រួល ក្នុងការដុតឱ្យបែកបាក់ជាតិ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា ភាពមន្ទិលសង្ស័យគ្នានៅក្នុងសង្គមខ្មែរ បានបង្កឱ្យមានការបែកបាក់ជាតិ ។

ក្នុងពិធីសម្ពោធបើកការដ្ឋានសាងសង់ព្រែកជីកហ្វូណនតេជោ នាថ្ងៃទី៥ ខែសីហា ឆ្នាំ២០២៤នេះ សម្តេចធិបតី ហ៊ុន ម៉ាណែត បានមានប្រសាសន៍ថា «បើយើងមិនធ្វើព្រែកជីកនេះឱ្យចេញជារូបភាពឱ្យបងប្អូនបានឃើញនោះទេ បងប្អូនមួយចំនួនអាចនឹងគិតថា កុំតែខ្លួនស្រែកកុំអី រាជរដ្ឋាភិបាលធ្វើព្រែកជីកនេះបាត់ទៅហើយ»។ សម្តេចថា បញ្ហានេះបានបង្កើតឱ្យមន្ទិលសង្ស័យរហូត ហើយការសង្ស័យនេះហើយ ធ្វើឱ្យប្រជាជនខ្មែរ លែងទុកចិត្តគ្នា លែងទុកចិត្តរាជរដ្ឋាភិបាល។

សម្តេចគូសបញ្ជាក់ថា «ពេលដែលយើងមានមន្ទិលសង្ស័យខ្មែរគ្នាឯងនេះហើយ នឹងធ្វើឱ្យងាយស្រួលក្នុងការដុតឱ្យបែកបាក់ជាតិ ហេតុដូច្នេះហើយ ដើម្បីដោះស្រាយបញ្ហាកង្វល់ និងបញ្ហាមន្ទិលសង្ស័យផ្ទៃក្នុងរបស់យើង យើងត្រូវធ្វើគម្រោងនេះឱ្យចេញ ដើម្បីបង្ហាញបងប្អូនឃើញថា គម្រោងនេះធ្វើមែន ចែកគ្នាមើលទាំងអស់គ្នាទៅ តើវាបាត់ឬទេ គឺអត់ទេ ហើយបញ្ជាក់តាមអ្វី បញ្ជាក់តាមសមិទ្ធផលជាក់ស្តែង»។

សម្តេចសង្ឃឹមថា តាមរយៈការបើកការដ្ឋានសាងសង់ព្រែកជីកហ្វូណនតេជោនៅពេលនេះ នឹងលែងមានមន្ទិលសង្ស័យផ្ទៃក្នុងរបស់ខ្មែរ ដែលនាំឱ្យមានការបែកបាក់។ សម្តេចក៏ជំរុញឱ្យការពារ និងទាញយកផលប្រយោជន៍ពីគម្រោងមួយនេះ ដើម្បីអភិវឌ្ឍជាតិ លើកសក្តានុពល ការពារឯករាជ្យជាតិ និងអធិបតេយ្យជាតិផងដែរ៕