អគ្គនាយកដ្ឋានវិទ្យុជាតិកម្ពុជាទទួលបន្ទុកសំខាន់លើប្រព័ន្ធបំពងសំឡេងក្នុង ព្រឹត្តិការណ៍បើកការដ្ឋានព្រែកជីកហ្វូណនតេជោ
ភ្នំពេញ៖ អគ្គនាយកដ្ឋានវិទ្យុជាតិកម្ពុជាត្រៀមលក្ខណ:រួចរាល់ហើយក្នុងការរៀបចំបណ្តាញបំពងសំឡេងក្នុងពិធីបើកការដ្ឋានព្រែកជីកហ្វូណនតេជោនៅព្រឹកថ្ងៃទី៥ខែសីហា ឆ្នាំ២០២៤ដើម្បីឱ្យប្រជាជនទូទាំងប្រទេស និងសកលលោកបានស្តាប់និងទស្សនាពីព្រឹត្តិការណ៍ជាប្រវត្តិសាស្ត្រនេះ។
ក្នុងឱកាសអញ្ជើញចុះត្រួតពិនិត្យការងាររៀបចំបំពងសំឡេងក្នុងពិធីបើកការដ្ឋានព្រែកជីកហ្វូណនតេជោនារសៀលថ្ងៃទី៤ខែសីហា ឆ្នាំ២០២៤ លោកជំទាវឈឹម ពៅសុកាន់ឌី អគ្គនាយិកានៃអគ្គនាយកដ្ឋានវិទ្យុជាតិកម្ពុជាបានមានប្រសាសន៍ថា មន្រ្តីជំនាញ នៃអគ្គនាយកដ្ឋានវិទ្យុជាតិកម្ពុជា បានត្រៀមជាយូរមកហើយបន្ទាប់ពីមានការប្រគល់ភារកិច្ចហើយមកដល់ពេលនេះយើងត្រៀមលក្ខណ:រួចរាល់ហើយក្នុងការរៀបចំបណ្តាញបំពងសំឡេងក្នុងពិធីបើកការដ្ឋានព្រែកជីកហ្វូណនតេជោនៅព្រឹកថ្ងៃទី៥ខែសីហា ឆ្នាំ២០២៤ នៅស្រុកកៀនស្វាយ ខេត្ដកណ្ដាល។
លោកជំទាវឈឹម ពៅសុកាន់ឌី បានបញ្ជាក់ថា ការរៀបចំបណ្តាញបំពងសំឡេងក្នុងពិធីបើកការដ្ឋានព្រែកជីកហ្វូណនតេជោនេះ ដើម្បីធ្វើការផ្សព្វផ្សាយផ្ទាល់ឱ្យកាន់តែទូលំទូលាយ និងឱ្យតាមបណ្ដាស្ថានីយទូរទស្សន៍ និងវិទ្យុនានាក្នុងប្រទេសធ្វើផ្សាយបន្តផ្ទាល់កម្មវិធីនេះ ព្រោះជាប្រវត្ដិសាស្ត្រ និងជាព្រឹត្ដិការណ៍ដ៏ធំបំផុតហើយអស្ចារ្យរបស់ប្រទេសកម្ពុជា។
លោកជំទាវបានបញ្ជាក់ថា គម្រោងព្រែកជីកហ្វូណនតេជោនេះ គឺមានអត្ថប្រយោជន៍យ៉ាងច្រើនសម្រាប់ប្រជាពលរដ្ឋ និងសង្គមជាតិ។ ពិសេស ជាដង្ហើមសេដ្ឋកិច្ចលើការងារដឹកជញ្ជូន ចំណេញទាំងពេលវេលា និងថវិកា។
លោកឆុន វាសនាប្រធាននាយកដ្ឋានបច្ចេកទេស នៃអគ្គនាយកដ្ឋានវិទ្យុជាតិកម្ពុជាបានមានប្រសាសន៍ថា ក្រុមការងារបានរៀបចំបណ្តាញបំពងសំឡេងក្នុងពិធីបើកការដ្ឋានព្រែកជីកហ្វូណនតេជោនៅព្រឹកថ្ងៃទី៥ខែសីហា ឆ្នាំ២០២៤នេះ ដើម្បីធ្វើពិធីនេះមានភាពអធិកអធម និងផ្សព្វផ្សាយឱ្យប្រជាពលរដ្ឋស្ដាប់កាន់តែទូលំទូលាយ។
លោកបញ្ជាក់ថា ក្រៅនៅបរិវេណនៃកន្លែងរៀបចំបើកការដ្ឋានផ្ទាល់ ក្រុមការងារវិទ្យុជាតិកម្ពុជា ក៏ទទួលបន្ទុករៀបចំឧបករណ៍បំពងនៅគោលដៅនៅរាជធានីភ្នំពេញ ដូចជា តំបន់កោះពេជ្រ សួនវិមានឯករាជ្យ សួនមុខវត្តបុទុមវតី មុខរដ្ឋសភា ពីមុខសួនណាហ្គា ព្រះអង្គដងកើរហូតដល់ផ្សាររាត្រី ។
ក្រៅពីនេះ ក្រុមការងារ ក៏រៀបចំឧបករណ៍បំពងសំឡេងនៅបរិវេណក្រសួងព័ត៌មានដែលមានរៀបចំពិធីទូងស្គរអបអរសាទរផងដែរ៕
