អភិបាលខេត្តកំពង់ស្ពឺ ណែនាំឲ្យថ្នាក់ដឹកនាំស្រុកភ្នំស្រួច បន្តខិតខំបម្រើសេវាសាធារណៈ ជូនប្រជាពលរដ្ឋ
ភ្នំពេញ៖ បានរៀបចំពិធីសំណេះសំណាលជាមួយមន្ត្រីរាជការជាថ្នាក់ដឹកនាំ នៃរដ្ឋបាលស្រុកភ្នំស្រួច ខេត្តកំពង់ស្ពឺ ក្រោមអធិបតីភាពឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ សមាសភាពអញ្ជើញអមដំណើរ ឯកឧត្តម អភិបាលរងខេត្ត លោកមេបញ្ជាការកងកម្លាំងទាំងបី លោកអភិបាលស្រុកភ្នំស្រួច លោកនាយករងរដ្ឋបាលសាលាខេត្ត លោក លោកស្រីនាយកនាយករងទីចាត់ការសាលាខេត្ត ប្រធាន អនុប្រធានមន្ទីរនានាជុំវិញខេត្ត គណៈបញ្ជាការការស្រុក និងមន្ត្រីរាជការសាលាស្រុកជាច្រើនរូបទៀតសរុបប្រមាណជា១៧០នាក់ ពិធីប្រារព្ធនៅសាលប្រជុំសាលាស្រុកភ្នំស្រួច ខេត្តកំពង់ស្ពឺ។
ពិធីនេះធ្វើឡើងក្នុងគោលបំណងដើម្បីសិក្សាឈ្វេងយល់អំពីសុខទុក្ខ តម្រូវការនានារបស់មន្ត្រីរាជការរដ្ឋបាលស្រុក និងដាក់ទិសដៅការងារចាំបាច់នានា សំដៅលើកកម្ពស់ប្រសិទ្ធភាពការងារ ពង្រឹងរបៀបរបបបំពេញការងារ ការផ្តល់សេវាសាធារណៈជូនប្រជាពលរដ្ឋ និងការពង្រឹងការងារគ្រប់គ្រងសន្តិសុខសណ្តាប់ធ្នាប់សាធារណៈ និងអនាម័យ រួមទាំងសោភណ្ឌភាពហេដ្ឋារចនាសម្ព័ន្ធរបស់ស្រុក ក្នុងអាណត្តិដឹកនាំរបស់ឯកឧត្តមអភិបាលខេត្តកំពង់ស្ពឺថ្មី។
ឆ្លៀតក្នុងឱកាសនោះដែរ ឯកឧត្តមបណ្ឌិត បានណែនាំនិងដាក់វិធានការចំនួន៦ចំណុចជូនដល់គណៈបញ្ជាការឯកភាពរដ្ឋបាលស្រុកត្រូវអនុវត្តន៍អោយបានក្នុងនោះ (១.បញ្ហាគ្រឿងញៀន ២.ល្បែងសុីសងខុសច្បាប់ ៣.ក្មេងទំនើង ៤.ថែរក្សាព្រៃឈើ ៥.អប់រំ ណែនាំ រឹតបន្តឹងច្បាប់ចរាចរណ៍ ៦.វិស័យទេសចរណ៍ ) ឯកឧត្តមបណ្ឌិតបានបន្ថែបទៀតថា៖ អភិបាលស្រុក ចៅសង្កាត់ ត្រូវគិតគួឡើងវិញ និងពិនិត្យមើលឡើងវិញ ជាពិសេសបម្រើសេវាសាធារណៈជូនប្រជាពលរដ្ឋអោយបានទាន់ពេលវេលា បន្តយកចិត្តទុកដាក់អោយបានខ្ពស់លើវិស័យទេសចរណ៍ ជាពិសេសល្បែងសុីសងដាច់ខាតមិនអោយមានជាដាច់ខាតដើម្បីខេត្ត និងពលរដ្ឋមានសណ្តាប់ធ្នាប់ល្អក្នុងសង្គម៕
