ឯកឧត្តមទេសរដ្ឋមន្ត្រី អៀង មូលី អញ្ជើញចូលរួមសន្និសីទពិភពលោកស្តីអំពីអេដស៍ឆ្នាំ២០២៤ នៅក្រុងមុយនិច

ភ្នំពេញ៖ ចាប់ពីថ្ងៃទី២២ដល់២៦ ខែកក្កដា ឆ្នាំ២០២៤ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍អញ្ជើញចូលរួមសន្និសីទពិភពលោកស្តីអំពីអេដស៍ឆ្នាំ២០២៤ (AIDS 2024) នៅក្រុងមុយនិច សាធារណរដ្ឋសហព័ន្ធអាល្លឺម៉ង់។

សន្និសីទពិភពលោកស្តីអំពីអេដស៍ឆ្នាំ២០២៤(AIDS 2024) ជាវេទិកាដ៏ធំបំផុតក្នុងពិភពលោក ដែលគេរំពឹងថាមានអ្នកចូលរួមប្រមាណមួយម៉ឺននាក់។ នេះជាវេទិកាដែលអ្នកស្រាវជ្រាវវិទ្យាសាស្ត្រ តំណាងសហគមន៍អ្នកផ្ទុកមេរោគអេដស៍ ប្រជាជនគន្លឹះ អ្នកផ្តល់សេវាបង្ការការពារព្យាបាលថែទាំជំងឺ អេដស៍ អ្នករៀបចំគោលនយោបាយ អ្នកផ្តល់ជំនួយ អង្គការក្រៅរដ្ឋាភិបាល តំណាងសង្គមស៊ីវិល អង្គការ អន្តរជាតិ និងអ្នកតំណាងរដ្ឋាភិបាល ផ្លាស់ប្តូរមតិគ្នា ដើម្បីរួមគ្នាទប់ស្កាត់ការរីករាលដាលនៃមេរោគ អេដស៍។

ឯកឧត្តមទេសរដ្ឋមន្ត្រី អៀង មូលី ចូលរួមសម្តែងអំណរសាទរចំពោះការរកឃើញនូវវិធីបង្ការ ការពារការឆ្លងថ្មី តាមរយៈការចាក់ថ្នាំបង្ការការពារ២ដងក្នុងមួយឆ្នាំ (Twice-Yearly HIV Prevention Injection) ប្រកបដោយប្រសិទ្ធភាព១០០%ប្រឆាំងនឹងមេរោគអេដស៍ ដែលប្រកាសឡើងដោយ លោកស្រី Sharon Lewin ប្រធានអង្គការអេដស៍អន្តរជាតិ (International AIDS Society) ក្នុង ឱកាសបើកសន្និសីទពិភពលោកឆ្នាំ២០២៤ (AIDS 2024) នាល្ងាចថ្ងៃ២២ ខែកក្កដា ឆ្នាំ២០២៤។ នេះ ជាសេចក្តីសង្ឃឹមដ៏ធំធេងមួយសម្រាប់មនុស្សជាតិ ក្នុងការទប់ស្កាត់ការរីករាលដាលនៃមេរោគអេដស៍។

ឯកឧត្តមទេសរដ្ឋមន្ត្រី ប្រធានអាជ្ញាធរជាតិប្រយុទ្ធនឹងជំងឺអេដស៍កម្ពុជាស្នើដល់សហគមន៍អ្នកវិទ្យាសាស្ត្រ ឱ្យបន្តយកចិត្តទុកដាក់ស្រាវជ្រាវគ្រប់ជ្រុងជ្រោយបន្ថែមទៀត ដើម្បីឱ្យវិធីបង្ការការពារថ្មីនេះអាចយកទៅ ប្រើប្រាស់បាននៅគ្រប់ទីកន្លែងក្នុងពិភពលោក រួមទាំងនៅកម្ពុជា និងស្នើឱ្យអ្នកផលិតរិះរកមធ្យោបាយ ផលិតដោយតម្លៃថោកសមរម្យ ដើម្បីអាចឱ្យប្រជាជននៃប្រទេសកំពុងអភិវឌ្ឍន៍មានលទ្ធភាពទិញយក ទៅការពារខ្លួនបានផង៕