ពលរដ្ឋ១៧នាក់ ត្រូវបានដឹកមកសង្រ្គោះបន្ទាន់ នៅមន្ទីរពេទ្យបង្អែកស្រុកបរកែវ បន្ទាប់ពីដកផ្សិតម្យ៉ាងមកធ្វើម្ហូប

ភ្នំពេញ៖ លោកវេជ្ជបណ្ឌិត អេង គុណវុឌ្ឍ ប្រធានការិយាល័យជំងឺឆ្លង និងចាក់ថ្នាំបង្ការនៃមន្ទីរសុខាភិបាលខេត្តរតនគិរី បានឲ្យដឹង នៅព្រឹកថ្ងៃទី២១ ខែកក្កដា ឆ្នាំ២០២៤ថា ប្រជាពលរដ្ឋនៅភូមិប៉ក់ប៉ូ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរីចំនួន ១៧នាក់ ត្រូវបានដឹកមកសង្រ្គោះបន្ទាន់ នៅមន្ទីរពេទ្យបង្អែកស្រុកបរកែវ បន្ទាប់ពីពួកគាត់ដកផ្សិតម្យ៉ាង មកធ្វើម្ហូបទទួលទាន។

លោកវេជ្ជបណ្ឌិត បានបន្តថា ក្នុងចំណោមអ្នកជំងឺសរុប ១៧នាក់ (មានស្រី៤នាក់ ក្មេង១នាក់) បានចូលមកមន្ទីរពេទ្យជាបន្តបន្ទាប់ចាប់ពីម៉ោង០១ទៀបភ្លឺថ្ងៃទី២១ ខែកក្កដា ដោយអាការរាគ ក្អួត ចុកពោះខ្លាំង។ ក្នុងចំណោមអ្នកទាំង ១៧នេះ មានក្មេងម្នាក់បានរាគក្អួតខ្លាំង ខាងមន្ទីរពេទ្យបង្អែកស្រុកបរកែវ បានបញ្ជូនបន្តទៅព្យាបាលនៅមន្ទីរពេទ្យបង្អែកខេត្ត។ ចំណែកអ្នកទាំង១៦ ដែលនៅសល់ ក្រោយបានទទួលការព្យាបាល ពួកគាត់មានអាការៈធូរស្រាលហើយ កំពុងពិនិត្យព្យាបាលបន្ត នៅមន្ទីរពេទ្យបង្អែកស្រុកបរកែវ។

ឯកឧត្តម ញ៉ែម សំអឿន អភិបាលខេត្តរតនគិរី បានធ្វើការអំពាវនាវ ដល់ប្រជាពលរដ្ឋ នៅក្នុងខេត្តរតនគិរី សូមមេត្តាប្រុងប្រយ័ត្នកុំបរិភោគផ្សិត ដែលស្គាល់មិនច្បាស់ ពីព្រោះអាចបណ្តាលឱ្យពុល ជាពិសេសផ្សិតដូចក្នុងរូបភាពបង្ហាញជូននេះ ៕