កូនឈើចម្រុះចំនួន៩,៨១៨ដើម ត្រូវបានអាជ្ញាធរជាតិអប្សរាចែកចាយ ដល់ព្រះសង្ឃ សាធារណជនទូទៅ ដើម្បីយកទៅដាំនៅតាមតំបន់ផ្សេងៗ

ភ្នំពេញ៖ កូនឈើចម្រុះសរុប៩ ៨១៨ដើមបន្ថែមទៀត ត្រូវបានអាជ្ញាធរជាតិអប្សរា បានចែកចាយដល់ព្រះសង្ឃ សាធារណជនទូទៅ ចាប់ពីថ្ងៃទី៨ ដល់ថ្ងៃទី១៦ ខែកក្កដា ឆ្នាំ២០២៤ ដើម្បីយកទៅដាំទៅតាមតំបន់ផ្សេងៗ។

ដើមទាំងនោះរួមមាន៖

– ប្រគេនកូនឈើចម្រុះជូនព្រះអង្គ នឹង បូរះ ព្រះគ្រូចៅអធិការវត្តកក់ ចំនួន១,៦០០ដើម ដើម្បីយកទៅដាំលំអក្នុងបរិវេណវត្ត និងតាមសាលារៀន ស្ថិតក្នុងភូមិឬស្សីសាញ់ ឃុំជ្រោយនាងនួន ស្រុកស្រីស្នំ ខេត្តសៀមរាប។ កូនឈើទាំងនោះរួមមាន គគីរ២០០ដើម ដើមយាង ឬឈើទាល២០០ដើម គ្រញូង៣០០ដើម បេង១៥០ដើម ធ្នង់២០០ដើម ច្រេស២០០ដើម លឿងរាជ១០០ដើម ក្ងោក១០០ដើម រាំងភ្នំ៥០ដើម និងរំដួល១០០ដើម។

– ប្រគេនកូនឈើចម្រុះជូនព្រះឥន្ទសី បឿត សុម៉ៅសុវណ្ណរ៉ា ព្រះគ្រូចៅអធិការវត្តវេឡុវ័ន ដោកពោយគោកក្រោល ចំនួន ៦០០ដើម ដើម្បីយកទៅដាំលម្អក្នុងបរិវេណវត្ត និងតាមផ្លូវ ស្ថិតក្នុងភូមិកក់ ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ។ កូនឈើទាំងនោះរួមមាន ធ្នង់២០០ដើម ក្ងោក១០០ដើម ព្កុល១០០ដើម និងរំដួល២០០ដើម។

– ផ្តល់កូនឈើចម្រុះជូនតំណាងលោក រិន ឡូត អភិបាលស្រុកបន្ទាយស្រី ចំនួន១,៥០០ដើម ដើម្បីយកទៅដាំលម្អតាមបណ្តោយផ្លូវ ចាប់ពីភូមិព្រះដាក់ ឃុំព្រះដាក់ ដល់ភូមិបន្ទាយស្រី ឃុំខ្នារសណ្តាយ ស្រុកបន្ទាយស្រី ខេត្តសៀមរាប។ កូនឈើទាំងនោះរួមមាន លឿងរាជ៥០០ដើម ត្របែកព្រៃ២០០ដើម ក្ងោក៣០០ដើម និងឥន្ទនេល៥០០ដើម។

– ផ្តល់កូនឈើចម្រុះជូនតំណាងលោក ពៅ ប៊ុនធឿន អភិបាលស្រុកអង្គរធំ ចំនួន៩០០ដើម ដើម្បីយកទៅដាំលម្អតាមសងខាងផ្លូវ ចាប់ពីកែងភូមិភ្លង់ ឃុំលាងដៃ ដល់ភូមិត្រពាំងទូក ឃុំជប់តាត្រាវ និងក្នុងតំបន់អភិវឌ្ឍន៍ពាក់ស្នែង ស្រុកអង្គរធំ ខេត្តសៀមរាប។ កូនឈើទាំងនោះរួមមាន លឿងរាជ៤០០ដើម ត្របែកព្រៃ២០០ដើម ក្ងោក២០០ដើម និងរំដួល១០០ដើម។

– ផ្តល់កូនឈើចម្រុះ ចំនួន១,៧០០ដើម ដើម្បីយកទៅចូលរួមពិធីពិព័រណ៍ផ្សព្វផ្សាយ និងចែកចាយកូនឈើជូនសាធារណជនទូទៅ នៅមុខទីស្តីការក្រសួងបរិស្ថាន រាជធានីភ្នំពេញ។

– ផ្តល់កូនឈើចម្រុះ ចំនួន១,២៩៨ដើម ដើម្បីយកទៅដាំនៅភូមិមណ្ឌល៣ សង្កាត់ស្លរក្រាម ក្រុងសៀមរាប ខេត្តសៀមរាប។

– ផ្តល់កូនឈើចម្រុះជូនក្រុមហ៊ុនមេនូឡាយហ្វ៍ ខេមបូឌា ភីអិលស៊ី ចំនួន១,១០០ដើម ដើម្បីយកទៅដាំនៅបរិវេណឧទ្យានសហគមន៍អង្គរ មេនូឡាយហ្វ៍នៃរមណីយដ្ឋានអង្គរ។ កូនឈើទាំងនោះរួមមាន គ្រញូង២០០ដើម ធ្នង់២០០ដើម បេង២០០ដើម ច្រេស២០០ដើម ឈើទាល២០០ដើម និងគគីរ១០០ដើម។

– ផ្តល់កូនឈើចម្រុះជូនលោក ហាប់ គឹមអាន ប្រជាពលរដ្ឋរស់នៅខេត្តសៀមរាប ចំនួន៩០ដើម ដើម្បីយកទៅដាំលើដីផ្ទាល់ខ្លួន ស្ថិតនៅភូមិពោធិ៍បន្ទាយជ័យ សង្កាត់សៀមរាប ក្រុងសៀមរាប ខេត្តសៀមរាប។ កូនឈើទាំងនោះរួមមាន គគីរ៣០ដើម ធ្នង់៣០ដើម និងរំដួល៣០ដើម។

– ផ្តល់កូនឈើចម្រុះជូនលោក លន់ ចេនឡា ប្រធានស្នាក់ការអគ្គិសនីពាក់ស្នែង ចំនួន៥៣០ដើម ដើម្បីយកទៅដាំលម្អក្នុងបរិវេណស្នាក់ការប្រចាំការអគ្គិសនីពាក់ស្នែង ស្ថិតក្នុងភូមិអភិវឌ្ឍន៍ពាក់ស្នែង ឃុំពាក់ស្នែង ស្រុកអង្គរធំ ខេត្តសៀមរាប។ កូនឈើទាំងនោះរួមមាន គគីរ១០០ដើម ឈើទាល១០០ដើម បេង១០០ដើម គ្រញូង១០០ដើម ធ្នង់១០០ដើម និងក្ងោក៣០ដើម។

– ផ្តល់កូនឈើចម្រុះជូនលោក ហឿង ហូត នាយកសាលាបឋមសិក្សា សៀងណាំ សណ្តាន់ ចំនួន៥០០ដើម ដើម្បីយកទៅដាំជួស និងដាំបន្ថែមក្នុងបរិវេណសាលា និងនៅសងខាងផ្លូវចូលសាលា ស្ថិតក្នុងភូមិសណ្តាន់ សង្កាត់ទឹកវិល ក្រុងសៀមរាប ខេត្តសៀមរាប។ កូនឈើទាំងនោះរួមមាន កកោះ១០០ដើម គ្រញូង១០០ដើម ធ្នង់១០០ដើម បេង៥០ដើម ច្រេស១០០ដើម និងឥន្ទនេល៥០ដើម៕