ឯកឧត្តមរដ្ឋមន្ត្រី ប៊ិន ត្រឈៃ អញ្ជើញជួបសំណេះសំណាល និងសួរសុខទុក្ខថ្នាក់ដឹកនាំនិងមន្ត្រីរាជការនៃមន្ទីរផែនការខេត្តតាកែវ

ភ្នំពេញ៖ នៅរសៀលថ្ងៃទី១៦ ខែកក្កដា ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ និងសហការីក្រសួងផែនការ បានអញ្ជើញជួបសំណេះសំណាល និងសួរសុខទុក្ខ ថ្នាក់ដឹកនាំនិងមន្ត្រីរាជការនៃមន្ទីរផែនការខេត្តតាកែវ។

ពិធីនេះមានការអញ្ជើញចូលរួមពីលោក ញ៉ែម ស្រស់ អភិបាលរងខេត្តតាកែវ តំណាងឯកឧត្តមអភិបាល នៃគណៈអភិបាលខេត្តតាកែវ ព្រមទាំងថ្នាក់ដឹកនាំ និងមន្ត្រីរាជការនៃមន្ទីរផែនការខេត្តតាកែវ អញ្ជើញចូលរួម។

ជាកិច្ចចាប់ផ្ដើម លោក មឿង រ៉ាដូ ប្រធានមន្ទីរផែនការខេត្តតាកែវ អញ្ជើញឡើងថ្លែងសុន្ទរកថាស្វាគមន៍ និងរបាយការណ៍សង្ខេបជូនគណៈអធិបតី និងអង្គពិធីទាំងមូល។ ថ្លែងក្នុងពិធី លោកប្រធានមន្ទីរ បានគោរពរាយការណ៍ជូនអំពី៖ (១).ស្ថានភាពភូមិសាស្ត្ររដ្ឋបាលខេត្ត, (២).ស្ថានភាព និងតួនាទីភារកិច្ចរចនាសម្ព័ន្ធរបស់មន្ត្រីរាជការនៃមន្ទីរផែនការខេត្តតាកែវ, (៣).លទ្ធផលការងារដែលសម្រេចបានក្នុងឆមាសទី១ ឆ្នាំ២០២៤ និង(៤).សំណូមពរ។

ថ្លែងក្នុងអង្គពិធី ឯកឧត្តមរដ្ឋមន្ត្រី បានអញ្ជើញមានមតិសំណេះសំណាល និងសួរសុខទុក្ខ សមាជិកសមាជិកានៃអង្គពិធីទាំងមូល។ ជាមួយគ្នានេះ ឯកឧត្តមរដ្ឋមន្ត្រី បានពាំនាំនូវការផ្ដាំផ្ញើសួរសុខទុក្ខពីសំណាក់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត មកដល់ថ្នាក់ដឹកនាំនិងមន្ត្រីរាជការ នៃមន្ទីរផែនការខេត្តតាកែវ។

មានប្រសាសន៍ក្នុងអង្គពិធី ឯកឧត្តមរដ្ឋមន្ត្រី បានថ្លែងរំលឹកអំពីអនុសាសន៍ដឹកនាំដ៏ខ្ពង់ខ្ពស់បំផុតរបស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាអតីតនាយករដ្ឋមន្ត្រី ស្ដីអំពី កំណែទម្រង់ ៩៩ភាគរយ “រស់” ១ភាគរយ “ស្លាប់” ផ្ទុយទៅវិញបើមិនកែទម្រង់ ៩៩ភាគរយ “ស្លាប់” ១ភាគរយ “រស់”។

ឯកឧត្តមរដ្ឋមន្ត្រី បានលើកឡើងផងដែរ អំពីកិច្ចខិតខំប្រឹងប្រែងរបស់រាជរដ្ឋាភិបាល នីតិកាលទី៧ ក្រោមការដឹកនាំប្រកបដោយចក្ខុវិស័យវែងឆ្ងាយរបស់សម្ដេចធិបតីនាយករដ្ឋមន្ត្រី រួមទាំងចក្ខុវិស័យរបស់រាជរដ្ឋាភិបាល ក្នុងការសម្រេចបានកម្ពុជាក្លាយជាប្រទេសដែលមានប្រាក់ចំណូលកម្រិតខ្ពស់ ក្នុងឆ្នាំ២០៥០។

បន្ថែមពីនេះ ឯកឧត្តមរដ្ឋមន្ត្រី បានចែករំលែកអំពីសមិទ្ធផលនានា និងទិសដៅការងាររបស់ក្រសួងផែនការ ព្រមទាំងទស្សនៈវិស័យ និងផ្ដល់អនុសាសន៍តម្រង់ទិស សម្រាប់ថ្នាក់ដឹកនាំនិងមន្ត្រីរាជការនៃមន្ទីរផែនការខេត្តតាកែវ។

ជាទីបញ្ចប់ ឯកឧត្តមរដ្ឋមន្ត្រី បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់លោកប្រធានមន្ទីរ ព្រមទាំងថ្នាក់ដឹកនាំ និងមន្ត្រីរាជការទាំងអស់ នៃមន្ទីរផែនការខេត្តតាកែវ។

មុននឹងការអញ្ជើញនិវត្តន៍ ឯកឧត្តមរដ្ឋមន្ត្រី បានអញ្ជើញជួបពិនិត្យ និងសំណេះសំណាលផ្ទាល់ ជាមួយមន្ត្រីជំនាញក្នុងការិយាល័យនានា នៃមន្ទីរផែនការខេត្តតាកែវ ព្រមទាំងថតរូបអនុស្សាវរីយ៍ជាមួយថ្នាក់ដឹកនាំនិងមន្ត្រីរាជការ នៃមន្ទីរផែនការខេត្តតាកែវ។ ពិធីនេះបានបញ្ចប់ ក្នុងបរិយាកាសប្រកបដោយភាពស្និទ្ធស្នាល និងរីករាយបំផុត ៕