តំបន់ប្រតិបត្តិការសឹករងកំពង់ឆ្នាំង ធ្វើពិធីប្រគល់ ទទួល និងធ្វើមាតុភូមិនិវត្តន៍ អដ្ឋិធាតុកងទ័ពស្ម័គ្រចិត្ត និងជំនាញការវៀតណាម
ភ្នំពេញ៖ នៅថ្ងៃទី១៦ ខែកក្កដា ឆ្នាំ២០២៤ នៅទីបញ្ជាការតំបន់ប្រតិបត្តិការសឹករងកំពង់ឆ្នាំង បានរៀបចំពិធីចុះហត្ថលេខាប្រគល់ ទទួល និងធ្វើមាតុភូមិនិវត្តអដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលបានរុករកឃើញ ជីកលើកបាននៅក្នុងភូមិសាស្ត្រខេត្ត ក្នុងជំហានទី២៣ រដូវប្រាំងឆ្នាំ២០២៣-២០២៤ ដែលពិធីនេះស្ថិតក្រោមអធិបតីភាព ឯកឧត្តម ឧត្តមសេនីយ៍ទោ មុំ សុភាព មេបញ្ជាការស្តីទី និងជាអនុប្រធានអចិន្ត្រៃយ៍ គណៈកម្មការជំនាញ យោធភូមិភាគពិសេស ឯកឧត្តម ស្រ៊ន សំឬទ្ធី អភិបាលរង ខេត្តកំពង់ឆ្នាំង តំណាងដ៏ខ្ពង់ខ្ពស់ ឯកឧត្តម ស៊ុន សុវណ្ណារិទ្ធិ និងឧត្តមសេនីយ៍ត្រី ហ្វិញ វ័នង៉ន អនុប្រធាននយោបាយ និងជាប្រធាន គណៈចង្អុលការ៥១៥ យោធភូមិភាគទី៩ នៃកងទ័ពប្រជាជនវៀតណាម ។
ឯកឧត្តម ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង និងជាអនុប្រធានអចិន្ត្រៃយ៍ គណៈកម្មការជំនាញខេត្តកំពង់ឆ្នាំង បានឡើងរាយការណ៍អំពីលទ្ធផល ការលំបាក និងការងាយស្រួល ក្នុងការអនុវត្តភារកិច្ចស្រាវជ្រាវ រុករក ជីកលើកអដ្ឋិធាតុកងទ័ពស្ម័គ្រចិត្ត និងជំនាញការវៀតណាមចាប់ពីជំហានទី១ ឆ្នាំ២០០២-២០០៣ មកបានជីកលើកអដ្ឋិធាតុសរុបចំនួន ៣៧៣សព ដោយឡែក ក្នុងជំហ៊ានទី២៣ រដូវប្រាំងឆ្នាំ២០២៣-២០២៤ នេះទទួលបានលទ្ធផលចំនួន៥អដ្ឋិធាតុ ដែលត្រូវធ្វើមាតុភូមិនិវត្តន៍នៅពេលនេះ ។
ឧត្តមសេនីយ៍ត្រី ហ្វិញ វ័នង៉ន បានថ្លែងអំណរគុណដ៏ជ្រាលជ្រៅជាទីបំផុតចំពោះអាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធទាំងបីប្រភេទ និងប្រជាពលរដ្ឋក្នុងមូលដ្ឋាន ដែលបានសហការរុករកជីកលើកអដ្ឋិធាតុកងទ័ពស្ម័គ្រចិត្តវៀតណាម ដើម្បីធ្វើមាតុភូមិនិវត្តន៍ទៅកាន់មាតុប្រទេសវិញ ទទួលបានលទ្ធផលនាពេលនេះ ។
ឯកឧត្តម ស្រ៊ន សំឬទ្ធី អភិបាលរងខេត្តកំពង់ឆ្នាំង បានលើកឡើងអំពីការលំបាក និងាយស្រួល ក្នុងដំណើរការស្រាវជ្រាវ រុករក ជីកលើក អដ្ឋិធាតុក្នុងជំហានទី២៣នេះ និងបានដាក់ចេញនូវផែនការ និងសំណូមពរមួយចំនួន ដល់អាជ្ញាធរមូលដ្ឋានក្រោមឱវាទ ដើម្បីទទួលបានលទ្ធផលបន្ថែមទៀតនៅជំហានទី២៤ រដូវប្រាំងឆ្នាំ២០២៤-២០២៥ ខាងមុខនេះ ។
ឯកឧត្តម ឧត្តមសេនីយ៍ទោ មុំ សុភាព បានថ្លែង អំណរគុណយ៉ាងជ្រាលជ្រៅចំពោះវីរភាពរបស់កងទ័ពស្ម័គ្រចិត្តវៀតណាម ដែលបានលះបង់សាច់ស្រស់ឈាមស្រស់ សហការជាមួយកងទ័ពរណសិរ្សសាមគ្គីសង្គ្រោះជាតិកម្ពុជាវាយរំដោះប្រទេសកម្ពុជាពីរបបប្រល័យពូជសាសន៍ ប៉ុល ពត ។
ចុងបញ្ចប់នៃកម្មវិធី ប្រតិភូនៃប្រទេសទាំងពីរ កម្ពុជា-វៀតណាម បានប្តេជ្ញារក្សាកិច្ចសហប្រតិបត្តិការចំណងមិត្តភាព សាមគ្គីភាព រវាងគ្នានិងគ្នា ឲ្យស្ថិតស្ថេរចីរកាល និងបានថ្លែងអំណរគុណ ជូនពរ ព្រមទាំងបានជូនវត្ថុអនុស្សាវរីយ៍ទៅវិញទៅមកផងដែរ ៕
