ក.ប.ប. សហការជាមួយស្ថាប័នអយ្យការអមសាលាដំបូងរាជធានីភ្នំពេញ និង GIZ រៀបចំវគ្គបណ្តុះបណ្តាលស្តីពី «ក្រមព្រហ្មទណ្ឌ ក្រមនីតិវិធីព្រហ្មទណ្ឌ និងនីតិវិធីនៃការកសាងសំណុំរឿងទៅតុលាការ»

ភ្នំពេញ៖ នាថ្ងៃទី១៥ ខែកក្កដា ឆ្នាំ២០២៤ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» សហការជាមួយស្ថាប័នអយ្យការអមសាលាដំបូងរាជធានីភ្នំពេញ និងទីភ្នាក់ងារសហប្រតិបត្តិការអាល្លឺម៉ង់ (GIZ) បានរៀបចំវគ្គបណ្តុះបណ្តាលស្តីពី «ក្រមព្រហ្មទណ្ឌ ក្រមនីតិវិធីព្រហ្មទណ្ឌ និងនីតិវិធីនៃការកសាងសំណុំរឿងទៅតុលាការ» ក្រោមអធិបតីភាព លោក ឃួន សាវុធ អគ្គនាយករង នៃអគ្គនាយកដ្ឋាន ក.ប.ប. តំណាង ឯកឧត្តម ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. ឯកឧត្តម សេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និង លោកស្រី សេង ដាលីន ទីប្រឹក្សាសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍន៍វិស័យឯកជន (GIZ)។

វគ្គបណ្តុះបណ្តាលនេះ មានការអញ្ជើញចូលរួមពី លោក-លោកស្រីអនុប្រធានសាខា ប្រធានការិយាល័យ នៃសាខា ក.ប.ប. រាជធានី ខេត្ត សរុបចំនួនប្រមាណ ១៥០រូប។

គោលបំណងនៃវគ្គបណ្ដុះបណ្ដាលនេះគឺដើម្បីពង្រឹង និងបំពេញបន្ថែមនូវចំណេះដឹង និងជំនាញពាក់ព័ន្ធនឹងនីតិវិធីនៃការត្រួតពិនិត្យ ស៊ើបអង្កេត និងបច្ចេកទេសនៃការកសាងសំណុំរឿងទៅតុលាការ ដល់មន្ត្រីរបស់អគ្គនាយកដ្ឋាន ក.ប.ប. ដែលទទួលបាននីតិសម្បទាជាមន្រ្តីនគរបាលយុត្តិធម៌ ដើម្បីធានាឱ្យការអនុវត្តច្បាប់និងបទប្បញ្ញត្តិទទួលបាននូវប្រសិទ្ធភាព និងប្រសិទ្ធផល។

សូមបញ្ជាក់ផងដែរថា នេះជាវគ្គបណ្ដុះបណ្ដាលលើកទី៦ ដែលធ្វើឡើងដើម្បីឆ្លើយតបទៅនឹងកម្មវិធីតេស្តសមត្ថភាព កាលពីថ្ងៃទី១៤-១៦ ខែកុម្ភៈ ឆ្នាំ២០២៤ ដែលអគ្គនាយកដ្ឋាន ក.ប.ប. បានរៀបចំនូវការធ្វើតេស្តសមត្ថភាពមន្រ្តីទាំងអស់នៅអគ្គនាយកដ្ឋាន ក.ប.ប. ម្តងរួចហើយ ដើម្បីអាចវាស់ស្ទង់អំពីសមត្ថភាពជាក់ស្តែង ចំណុចខ្លាំង និងចំណុចខ្សោយ ពាក់ព័ន្ធនឹងការយល់ដឹងអំពីច្បាប់ស្តីពីការប្រកួតប្រជែង ច្បាប់ស្តីពីកិច្ចការពារអ្នកប្រើប្រាស់ ច្បាប់ស្តីពីសុវត្ថិភាពម្ហូបអាហារ និងបទប្បញ្ញត្តិពាក់ព័ន្ធ ព្រមទាំងបទពិសោធន៍នៅក្នុងការអនុវត្តច្បាប់ផងដែរ៕