គ្រួសារសពក្មេងស្រី៣នាក់ ដែលរងគ្រោះដោយករណីលង់ទឹកស្រះស្លាប់ នៅភូមិកោះគ សង្កាត់រកាខ្ពស់ បានទទួលអំណោយមនុស្សធម៌ពីសាខាកាកបាទក្រហមកម្ពុជាខេត្តកណ្ដាល
ភ្នំពេញ៖ គ្រួសារសពក្មេងស្រី៣នាក់ដែលរងគ្រោះដោយករណីលង់ទឹកស្រះស្លាប់ នៅភូមិកោះគ សង្កាត់រកាខ្ពស់ ក្រុងតាខ្មៅ បានទទួលអំណោយមនុស្សធម៌ពីសាខាកាកបាទក្រហមកម្ពុជាខេត្តកណ្ដាល នាថ្ងៃទី១០ ខែកក្កដា ឆ្នាំ២០២៤។
ឯកឧត្តម គង់ សោភ័ណ្ឌ ប្រធានគណៈកម្មាធិការសាខាកាកបាទក្រហមកម្ពុជាខេត្តកណ្តាល បានចាត់ឱ្យលោក ទៀង សុគន្ធ នាយកសាខា ដឹកនាំប្រតិភូសាខា ,អនុសាខាក្រុង និងមន្ទីរសង្គមកិច្ចខេត្ត បានចុះសួរសុខទុក្ខ និងនាំយកអំណោយសមនុស្សធម៌ទៅចូលរួមរំលែកទុក្ខជាមួយក្រុមគ្រួសារសពក្មេងស្រីទាំង៣ដល់លំនៅឋានផ្ទាល់។
មានមតិសំណេះសំណាលនាឱកាសនោះ លោក ទៀង សុគន្ធ បាននាំមកនូវប្រសាសន៍ផ្ដាំផ្ញើសាកសួរសុខទុក្ខពីសំណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម គង់ សោភ័ណ្ឌ ប្រធានគណៈកម្មាធិការសាខា ដោយក្ដីនឹករលឹក និងក្តីអាណិតអាសូរក្រៃលែង។
លោកនាយកបានបន្តទៀតថា កាកបាទក្រហមកម្ពុជាដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន ជានិច្ចកាលសម្ដេចតែងបានគិតគូរជានិច្ចអំពីសុខទុក្ខរបស់បងប្អូនប្រជាពលរដ្ឋទូទៅនៅគ្រប់ទីកន្លែងនិងគ្រប់ពេលវេលា ពិសេសសម្តេចក៏បានណែនាំជាប្រចាំដល់មន្រ្តីនៅថ្នាក់មូលដ្ឋានទាំងអស់ ត្រូវពិនិត្យមើលពីជីវភាពរស់នៅរបស់បងប្អូនប្រជាពលរដ្ឋទូទៅ ហើយត្រូវចុះសួរសុខទុក្ខដោយផ្ទាល់ដល់ជនងាយរងគ្រោះបំផុត និងជនរងគ្រោះមហន្តរាយផ្សេងៗនៅតាមសហគមន៍ ដោយគ្មានការប្រកាន់នូវវណ្ណៈ ពូជសាសន៍ សាសនា ប្រពៃណី ពណ៌សម្បុរ ឬនិន្នាការនយោបាយអ្វីឡើយ។
នៅក្នុងឱកាសនោះដែរ លោកនាយកសាខាក៏បានសម្តែងនូវការចូលរួមរំលែកដ៏ក្រៀមមក្រំ និងសោកស្តាយជាពន់ពេកជាមួយគ្រួសាររងគ្រោះទាំងអស់ ព្រមទាំង បានផ្តល់នូវការលើកទឹកចិត្ត សូមបងប្អូនទាំងអស់មេត្តាកាត់ចិត្តទប់អារម្មណ៍ព្រោះរឿងអ្វីៗ វាក៏បានកន្លងហួសផុតទៅហើយអ្វីយើងត្រូវគិតនោះគឺ បងប្អូនត្រូវខិតខំប្រកបរបររកស៊ីសម្រាប់ក្រុមគ្រួសារនីមួយៗបន្តទៀត ដើម្បីគ្រួសាររស់នៅបានសមរម្យសម្រាប់សេចក្តីសុខក្សេមក្សាន្តនាថ្ងៃខាងមុខបន្តទៀត។
សម្ភារនិងថវិកា ដែលប្រតិភូសាខាបានឧបត្ថម្ភជូនគ្រួសារជនរងគ្រោះដោយក្នុង១គ្រួសារៗបានទទួលមាន៖ អង្ករ ៥០ គីឡូក្រាម ,មី ២កេស ,ទឹកសុទ្ធ ២កេស ភេសជ្ជៈ ២កេស ,ទឹកត្រី ២យួរ , ទឹកស៊ីអុីវ ២យួរ និងថវិកាចំនួន ៦០ម៉ឺនរៀល។ ជាមួយគ្នានេះ អនុសាខា កក្រក ក្រុងតាខ្មៅ បានផ្តល់អំណោយបន្ថែមជូនក្នុង១គ្រួសារនូវ អង្ករ ៥០គីឡូក្រាម ,ទឹកត្រី ១យួរ ,ថវិកា ២០ម៉ឺនរៀល ,មន្ទីរសង្គមកិច្ចខេត្ត ថវិកាក្នុង១គ្រួសារ ចំនួន ១០ម៉ឺនរៀល និងសមាគមមិត្តដើម្បូីមិត្ត បានផ្តល់ជូន ថវិកា ១០ម៉ឺនរៀលក្នុង១គ្រួសារៗផងដែរ៕
