សម្តេចធិបតី បង្ហាញមោទនភាព និងប្រកាសថាកម្ពុជា ជាបេក្ខភាពរៀបចំកិច្ចប្រជុំកំពូលហ្វ្រង់កូហ្វូនី នៅឆ្នាំ២០២៦ នៅទីក្រុងប្រវត្តិសាស្ត្រនៃខេត្តសៀមរាប

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងដោយមោទនភាព និងបានប្រកាសថាកម្ពុជា គឺជាបេក្ខភាពរៀបចំកិច្ចប្រជុំកំពូលហ្វ្រង់កូហ្វូនី នៅឆ្នាំ២០២៦ នៅទីក្រុងប្រវត្តិសាស្ត្រ នៃខេត្តសៀមរាប។

ក្នុងឱកាសអញ្ជើញជាអធិបតីបើកវេទិកាធុរកិច្ចកម្ពុជា-បារាំងជាលើកទី២ នាថ្ងៃទី៨ ខែកក្កដា ឆ្នាំ២០២៤នេះ សម្តេចធិបតី ហ៊ុន ម៉ាណែត បានបញ្ជាក់ «ខ្ញុំមានមោទនភាព និងសូមប្រកាសថាកម្ពុជា គឺជាបេក្ខភាពរៀបចំកិច្ចប្រជុំកំពូលហ្វ្រង់កូហ្វូនី នៅឆ្នាំ២០២៦ នៅទីក្រុងប្រវត្តិសាស្ត្រនៃខេត្តសៀមរាប ព្រឹត្តិការណ៍ដ៏មាន កិត្យានុភាពនេះ នឹងបង្ហាញពីបេតិកភណ្ឌវប្បធម៌ និងការប្ដេជ្ញាចិត្តរបស់កម្ពុជា ចំពោះគុណតម្លៃនៃហ្វ្រង់កូហ្វូនី កិច្ចប្រជុំកំពូលនេះ គឺជាឱកាសមួយ ក្នុងការបង្ហាញពីសមិទ្ធផលរបស់ប្រទេសយើង»។

សម្តេចធិបតី ហ៊ុន ម៉ាណែត បានថ្លែងថា កិច្ចប្រជុំកំពូលហ្វ្រង់កូហ្វូនី ដែលធ្វើឡើងនៅលើទឹកដីអង្គរដ៏បវររបស់កម្ពុជា គឺបានលើកកម្ពស់ភាពសម្បូរបែបនេះនៃវប្បធម៌ និងភាសារបស់ជាតិ។ ជាពិសេសការពង្រឹងទំនាក់ទំនងជាមួយបណ្តាប្រទេសហ្វ្រង់កូហ្វូនី ដ៏ទៃទៀត។

សម្តេចធិបតី គូសបញ្ជាក់ថា ការសម្រេចចុងក្រោយរបស់កម្ពុជានឹងត្រូវនៅខែតុលា ឆ្នាំ២០២៤ ហើយសង្ឃឹមថានឹងទទួលបាននូវលទ្ធផល តាមការរំពឹងទុកផងដែរ។
សម្តេចធិបតី ហ៊ុន ម៉ាណែត ក៏បានថ្លែងអំណរគុណដល់ប្រធានាធិបតី បារាំង លោក ម៉ាក្រុង ដែលបានគាំទ្របេក្ខភាពកម្ពុជា ដើម្បីធ្វើជាម្ចាស់ផ្ទះហ្វ្រង់កូហ្វូនី ២០២៦ជាដើម ៕