ភ្នំពេញ៖ កាលពីថ្ងៃទី៤ ខែកក្កដា ឆ្នាំ២០២៤ វេលាម៉ោង១១និង០០នាទី មានករណីក្មេងប្រុស១នាក់ លង់ទឹកអាងក្នុងបន្ទប់ទឹកស្លាប់ កើតហេតុ នៅចំណុចអាងទឹកក្នុងបន្ទប់ទឹកខាងក្រោយផ្ទះចម្ងាយ១០ម៉ែត្រ ស្ថិតនៅភូមិសារវន្ត ឃុំស្នាអន្សា ស្រុកក្រគរ ខេត្តពោធិ៍សាត់ សពឈ្មោះ ម៉ើ សេងមួយ ហៅមួយ ភេទប្រុស អាយុ២ខួប៥ខែ ជនជាតិខ្មែរ មុខរបរក្នុងបន្ទុកមានទីលំនៅភូមិឃុំកើតហេតុខាងលើ។
របាយការណ៍របស់អធិការដ្ឋាននគរបាលស្រុកក្រគរបានឲ្យដឹងថាយោងកំណត់ហេតុបំភ្លឺរបស់ឈ្មោះ ជុក មុត ភេទប្រុស អាយុ៤៤ ត្រូវជាឪពុកបង្កើតនៃសព រស់នៅភូមិឃុំកើតហេតុខាងលើ កាលពីថ្ងៃទី៤ ខែកក្កដា ឆ្នាំ ២០២៤ វេលាម៉ោង១១នឹង០០នាទី ខ្លួនកំពុងរៀបឥដ្ឋនៅឯទ្រុងជ្រូកនៅខាងក្រោយផ្ទះចម្ងាយប្រហែល២០ម៉ែត្រ ពេលខ្លួនកំពុងរៀបឥដ្ឋ ស្រាប់តែប្រពន្ធរបស់ខ្លួនបានសួរខ្លួនថា ឃើញកូនឬអត់ ខ្លួនបានតបទៅវិញថាអត់បានឃើញទេ ហើយក៏បាននាំគ្នាដើររក បន្ទាប់មកខ្លួនក៏បានចូលរកក្នុងបន្ទប់ទឹក ខាងក្រោយផ្ទះស្រាប់តែ ឃើញកូនអណ្ដែតក្នុងអាងទឹក ក្នុងបន្ទប់ទឹក វេលាប្រហែលម៉ោង១១និង ២០នាទី ហើយខ្លួនក៏លើកកូនរលាក់ រួចហើយក៏ស្រែកហៅ ប្រពន្ធមកជួយ តែកូននៅតែមិនដឹងខ្លួន រួចក៏នាំយកទៅមណ្ឌលសុខភាពឃុំស្នាអន្សា ពេលទៅដល់គ្រូពេទ្យក៏បានពិនិត្យ ហើយគ្រូពេទ្យប្រាប់ថា កូនប្អូនឯងសង្គ្រោះលែងបានហើយ ខ្លួននឹងក្រុមគ្រួសារក៏យកសពកូនមកផ្ទះ ធ្វើបុណ្យតាមប្រពៃណីនៅផ្ទះតែម្ដង។
យោងតាមកំណត់ហេតុបំភ្លឺរបស់ឈ្មោះ អ៊ុក ស្រីអែម ភេទស្រី អាយុ ៣៤ឆ្នាំ ជនជាតិខ្មែរ ត្រូវជាម្ដាយរបស់សពរស់នៅភូមិឃុំកើតហេតុខាងលើ បានឲ្យដឹងថា កាលពីថ្ងៃទី៤ ខែកក្កដា ឆ្នាំ២០២៤ វេលាម៉ោង១១និង០០នាទី នាងខ្ញុំបានទុកកូន ឈ្មោះ ម៉ើ សេងមួយ នៅក្រោមផ្ទះតែម្នាក់ឯង ហើយនាងខ្ញុំ ក៏បានយកសម្លរទៅឲ្យប្អូនឈ្មោះ ពុទ្ធា នៅខាងកើតផ្ទះចម្ងាយប្រហែល៣០ម៉ែត្រ ហើយខ្លួនក៏ត្រឡប់មកដល់ផ្ទះវិញ ប្រហែលម៉ោង១១និង១៥ នាទី ចំពេលកូនពីរនាក់ទៀត មកពីសាលារៀន ហើយខ្លួនក៏ឃើញបាត់កូនឈ្មោះ ម៉ើ សេងមួយ ពេលនោះនាងខ្ញុំក៏បានស្រែកសួរប្ដីដែលកំពុងរៀបឥដ្ឋ នៅទ្រុង ជ្រូកក្រោយផ្ទះ ហើយប្ដីឆ្លើយថាមិនបានឃើញទេ បន្ទាប់មកក៏បាននាំគ្នាដើររក រហូតដល់វេលាម៉ោងប្រហែល ១១និង២០ នាទី ស្រាប់លឺប្ដីស្រែកពីបន្ទប់ទឹក ថាកូនបានលង់ទឹកក្នុងអាងហើយមកជួយផង បន្ទាប់មកក៏បានដឹងកូនទៅមណ្ឌលសុខភាពឃុំស្នាអន្សា ពេលទៅដល់គ្រូពេទ្យបានមកពិនិត្យរួចហើយ ប្រាប់ថាកូនរបស់នាងខ្ញុំបានស្លាប់បាត់ហើយ។បន្ទាប់មកខ្លួននឹងក្រុមគ្រួសារបាននាំសពកូនមកផ្ទះធ្វើបុណ្យតាមប្រពៃណីតែម្ដង។ ក្រោយពិនិត្យបំភ្លឺជុំវិញកន្លែងកើតហេតុ និងសពរួចមកក្រុមការងារអាចសណ្ឋានបានថាករណីខាងលើពុំពាក់ព័ន្ធករណីឃាតកម្មទេ។
រួចធ្វើកំណត់ហេតុប្រគល់សាកសពអោយទៅក្រុមគ្រួសារដើម្បីធ្វើបុណ្យតាមប្រពៃណី តាមបញ្ជារឯកឧត្ដម កូយ កាន់យ៉ា ព្រះរាជអាជ្ញាអមសាលាដំបូងខេត្តពោធិ៍សាត់ចុះថ្ងៃទី៤ ខែកក្កដា ឆ្នាំ២០២៤ វេលាម៉ោង១៧និង១៩នាទី៕
