សម្តេចធិបតី ហ៊ុន ម៉ាណែត៖ គុណភាពមនុស្សជាកត្តាកំណត់ នៃសមត្ថភាពប្រទេសអភិវឌ្ឍន៍ ទាល់តែមនុស្សខ្លាំង ទើបការអភិវឌ្ឍន៍ខ្លាំង
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានអះអាងថា សមត្ថភាពរបស់មនុស្សជាកត្តាកំណត់សម្រាប់ការអភិវឌ្ឍប្រទេសជាតិ ព្រោះទាល់តែមនុស្សមានសមត្ថភាពខ្លាំង ទើបប្រទេសជាតិមួយមានការអភិវឌ្ឍខ្លាំងដូចគ្នានេះដែរ។
ក្នុងឱកាសអញ្ជើញសម្ពោធដាក់ឲ្យប្រើប្រាស់អគារស្នាក់នៅរបស់គ្រូ ព្រមទាំងប្រគល់សញ្ញបត្រជូនគរុសិស្ស-និស្សិត នៅវិទ្យាស្ថានគរុកោសល្យរាជធានីភ្នំពេញ នាថ្ងៃទី៤ ខែកក្កដា ឆ្នាំ២០២៤ សម្ដេចធិបតី គូសបញ្ជាក់ថា «គុណភាពមនុស្សជាកត្តាកំណត់ នៃសមត្ថភាពប្រទេសអភិវឌ្ឍន៍ ទាល់តែមនុស្សខ្លាំង បានយើងអភិវឌ្ឍន៍ខ្លាំង។ បើប្រជាជនអត់ចេះកុំព្យូទ័រ ភាសាអង់គ្លេស តើទៅយកកុំព្យូទ័រមកប្រើយ៉ាងមិចកើត? កត្តាកំណត់ធនធានមនុស្ស គឺការអប់រំបណ្ដុះបណ្ដាល មនុស្សកំណត់អ្វីៗទាំងអស់ បើមិនពង្រឹងធនធានមនុស្សដើរមិនទាន់គេឡើយ»។
សម្ដេចធិបតី ហ៊ុន ម៉ាណែត ថ្លែងថា ប្រសិនបើគ្រូបង្រៀនមិនខ្លាំងពូកែ នោះសិស្សដែលបញ្ចប់ការសិក្សាចេញទៅបំពេញការងារផ្សេងៗ ក៏មិនពូកែ និងខ្លាំងនោះដែរ ហើយនាំឲ្យការប្រកួតប្រជែងក៏នៅមានកម្រិត។ ទាំងអស់នេះ បានបង្ហាញឲ្យឃើញថា គ្រូ និងគ្រឹះស្ថានបណ្ដុះបណ្ដាល ជាកត្តាមួយដ៏សំខាន់។
សម្ដេចធិបតី ហ៊ុន ម៉ាណែត បានលើកឡើងថា រាជរដ្ឋាភិបាលកម្ពុជា នៅតែបន្ដយកចិត្តទុកដាក់ក្នុងការធ្វើកំណែទម្រង់វិស័យអប់រំ។ ក្នុងន័យនេះ សម្ដេចក៏បានកោតសរសើរ និងវាយតម្លៃខ្ពស់ ចំពោះក្រសួងអប់រំ យុវជន និងកីឡា ដែលបានដាក់ចេញនូវគោលនយោបាយ និងកម្មវិធីកំណែទម្រង់វិស័យអប់រំ ដើម្បីឲ្យធានានូវប្រសិទ្ធភាព និងគុណភាពខ្ពស់ នៃការបណ្ដុះបណ្ដាលគ្រូបង្រៀននៅកម្ពុជា។
សម្ដេចធិបតីបានកត់សម្គាល់ថា នៅក្នុងដំណាក់កាលប្រទេសកំពុងជួបនូវវិបត្តិសង្គ្រាម ថវិការបស់រាជរដ្ឋាភិបាលបានទម្លាក់ទៅវិស័យការពារជាតិ មានទំហំមួយដែលធំជាងគេ ប៉ុន្ដែក្រោយបញ្ចប់សង្គ្រាមថវិកាត្រូវបានទម្លាក់ទៅវិស័យអប់រំ មានការកើនឡើង។ សម្ដេចបន្ថែមថា កាលពីឆ្នាំ២០២០ ថវិកាជាតិដែលផ្ដល់ទៅវិស័យអប់រំ មាន៣.២ទ្រីលានរៀល ហើយមកដល់ឆ្នាំ២០២៤ តម្លើងរហូតដល់៣.៧ទ្រីលានរៀល៕
