អភិបាលខេត្តស្ទឹងត្រែង ជំរុញលើកទឹកចិត្តដល់អាជ្ញាធរ និងកម្លាំងសមត្ថកិច្ចត្រូវខិតខំយកចិត្តទុកដាក់លើការរក្សាសន្តិសុខ សណ្តាប់ធ្នាប់ និងពង្រឹងការអនុវត្តគោលនយោបាយភូមិឃុំសង្កាត់មានសុវត្ថិភាព

ភ្នំពេញ៖ ឯកឧត្តម ស្វាយ សំអ៊ាង អភិបាលនៃគណៈអភិបាលខេត្តស្ទឹងត្រែង បានជំរុញលើកទឹកចិត្តបន្ថែមទៀតដល់អាជ្ញាធរ និងកងកម្លាំងសមត្ថកិច្ចគ្រប់លំដាប់ថ្នាក់ទាំងអស់ត្រូវបង្កើនការខិតខំយកចិត្តទុកដាក់បន្តទៀតលើការរក្សាសន្តិសុខ សណ្តាប់ធ្នាប់ និងពង្រឹងការអនុវត្តគោលនយោបាយភូមិឃុំសង្កាត់មានសុវត្ថិភាព នៅតាមក្រុង/ស្រុកនានាក្នុងខេត្តស្ទឹងត្រែង និងណែនាំដល់មន្ទីរអង្គភាព ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធទាំងអស់ ត្រូវចេះសាមគ្គីភាពគ្នា ឯកភាពផ្ទៃគ្នា ក្នុងការងារអនុវត្តការងារ ដើម្បីឲ្យខេត្តស្ទឹងត្រែងបន្តឆ្ពោះទៅកាន់ការអភិវឌ្ឍជាបន្តទៀត។

ក្នុងឱកាសអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការងារប្រចាំខែមិថុនា ឆ្នាំ២០២៤ និងលើកទិសដៅអនុវត្តភារកិច្ចបន្ត នារសៀលថ្ងៃទី០៣ ខែកក្កដា ឆ្នាំ២០២៤ ឯកឧត្តម ស្វាយ សំអ៊ាង បានថ្លែងនូវការកោតសរសើរនិងវាយតម្លៃខ្ពស់ចំពោះថ្នាក់ដឹកនាំ មន្ត្រីរាជការ មន្ទីរអង្គភាពរួមទាំងកងកម្លាំងប្រដាប់អាវុធទាំង៣ប្រភេទ ដែលបានខិតខំអនុវត្តតួនាទីភារកិច្ចប្រកបដោយប្រសិទ្ធិភាព ជាពិសេសបានចូលរួមក្នុងការថែរក្សាសន្តិសុខ សណ្តាប់ធ្នាប់សាធារណៈ សុខសន្តិភាព ការបម្រើសេវាសាធារណៈបានល្អ។

គួបញ្ជាក់ថា នៅក្នុងកិច្ចប្រជុំត្រួតពិនិត្យវឌ្ឍនភាពការងារប្រចាំខែមិថុនា ឆ្នាំ២០២៤ និងលើកទិសដៅអនុវត្តភារកិច្ចការងារបន្តរបស់រដ្ឋបាលខេត្តស្ទឹងត្រែងនេះដែរ អង្គប្រជុំបានពិភាក្សានិងត្រួតពិនិត្យយ៉ាងច្បាស់លាស់នៅលើរបាយការណ៍ផែនការសកម្មភាពការងារប្រចាំខែរបស់មន្ទីរអង្គភាពនីមួយៗ ដើម្បីបន្តដាក់ជូនដល់ក្រុមប្រឹក្សាខេត្តសម្រេចនិងអនុម័ត៕