រដ្ឋមន្ត្រីអប់រំ ចូលរួមប្រជុំ គ.ជ.ផ.ក ស្តីពី “វឌ្ឍនភាពអំពីការអភិវឌ្ឍ និងអនុវត្តយន្តការតាមដាន វាស់វែង និងវាយតម្លៃរបស់ គ.ជ.ផ.ក.” នៃក្របខណ្ឌគោលនយោបាយជាតិ ផលិតភាពសេដ្ឋកិច្ចកម្ពុជា
ភ្នំពេញ៖ នាថ្ងៃទី៣ ខែកក្កដា ឆ្នាំ២០២៤ នៅទីស្ដីការក្រសួងសេដ្ឋកិច្ច និងហិរញ្ញវត្ថុ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញចូលរួមក្នុងកិច្ចប្រជុំគណៈកម្មាធិការជាតិផលិតភាពសេដ្ឋកិច្ចកម្ពុជា (គ.ជ.ផ.ក) ស្តីពី “លទ្ធផលនៃវឌ្ឍនភាពអំពីការអភិវឌ្ឍ និងអនុវត្តយន្តការតាមដាន វាស់វែង និងវាយតម្លៃ” នៃក្របខណ្ឌគោលនយោបាយជាតិផលិតភាពសេដ្ឋកិច្ចកម្ពុជា ដឹកនាំដោយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធាន គ.ជ.ផ.ក និងមានការចូលរួមពីសំណាក់ ឧបនាយករដ្ឋមន្ត្រី រដ្ឋមន្ត្រី ឯកឧត្តម លោកជំទាវ តំណាងក្រសួងស្ថាប័នជាសមាជិក សមាជិកា នៃ គ.ជ.ផ.ក និងមន្ត្រីមកពីអង្គភាពពាក់ព័ន្ធ។
គោលបំណងនៃកិច្ចប្រជុំនេះ គឺដើម្បី (ក). ពិនិត្យ និងពិភាក្សាអំពីវឌ្ឍនភាពនៃការអនុវត្តការងារជូន គ.ជ.ផ.ក. និង (ខ). ពិនិត្យ ពិភាក្សា និងសម្រេចលើសេចក្តីព្រាងនៃការជ្រើសរើស និងចម្រាញ់ផែនការសកម្មភាព និងសូចនាករឆ្នាំ ២០២៣-២០២៥ សម្រាប់អនុវត្តយន្តការតាមដាន វាស់វែង និងវាយតម្លៃរបស់ គ.ជ.ផ.ក. ដើម្បីឈានទៅ លើកកម្ពស់ប្រសិទ្ធភាពក្នុងការអនុវត្តការងារ (Performance) និងគុណតម្លៃបន្ថែម ស្វែងរកគម្លាតក្នុងការអនុវត្តការងារ និងរកដំណោះស្រាយឆ្លើយតប ឆ្ពោះទៅលើកកម្ពស់ផលិតភាពសេដ្ឋកិច្ចកម្ពុជាប្រកបដោយចីរភាព៕
