ឯកឧត្តមរដ្ឋមន្ត្រី ថោ ជេដ្ឋា អញ្ជើញចូលរួមក្នុងកម្មវិធីបុណ្យអប់រំសីលធម៌ព្រះពុទ្ធសាសនា បំបួសកុលបុត្រ កុលធីតា នៅវត្តភ្នៀតសិម្ពលី រាជធានីភ្នំពេញ
ភ្នំពេញ៖ នៅរសៀលថ្ងៃសៅរ៍ ៨រោច ខែជេស្ឋ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៩ ខែមិថុនា ឆ្នាំ២០២៤ នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំ ឯកឧត្តម លោកជំទាវ លោក លោកស្រី ជាថ្នាក់ដឹកនាំ និងមន្ត្រីរាជការក្រសួង អញ្ជើញចូលរួមក្នុងកម្មវិធីបុណ្យអប់រំសីលធម៌ព្រះពុទ្ធសាសនា បំបួសកុលបុត្រ កុលធីតា នៅវត្តភ្នៀតសិម្ពលី ក្នុងសង្កាត់ស្នោ ខណ្ឌកំបូល រាជធានីភ្នំពេញ។
សូមជម្រាបថា កម្មវិធីបុណ្យបំបួសកុលបុត្រ កុលធីតា រយៈពេល ៧ថ្ងៃ វគ្គទី១១ ឆ្នាំទី១១ នៅពេលនេះ មានការចូលរួមពីលោកជំទាវអគ្គមហាឧបាសិកាពុទ្ធសាសនូបត្ថម្ភក៍ពហុវុឌ្ឍា ម៉ែន នារីវុឌ្ឍី ហូសិទ្ធី អនុប្រធានអចិន្រ្តៃយ៍ ពុទ្ធិកសមាគមកម្ពុជរដ្ឋ និងជាទីប្រឹក្សាក្រសួងធម្មការ និងសាសនា ព្រមទាំងសមាជិក សមាជិកា នៃពុទ្ធិកសមាគមកម្ពុជរដ្ឋ ព្រះចៅអធិការ ព្រះសង្ឃ លោកអាចារ្យ គណៈកម្មការ និងពុទ្ធបរិស័ទចំណុះជើងវត្តភ្នៀតសិម្ពលីជាច្រើនអង្គ/នាក់។
សូមបញ្ជាក់ថា ពិធីបំបួសកុលបុត្រ កុលធីតា នាឱកាសនេះមានចំនួន ៥០០អង្គ/នាក់ ដោយកម្មវិធីចាប់ផ្តើមពីថ្ងៃទី២៩ ខែមិថុនា រហូតដល់ថ្ងៃទី៧ ខែកក្កដា ឆ្នាំ២០២៤ ជាថ្ងៃចុងក្រោយ លាចាកសិក្ខាបទ។ ការប្រារព្វកម្មវិធីបុណ្យអប់រំសីលធម៌ព្រះពុទ្ធសាសនា បំបួសកុលបុត្រ កុលធីតា គឺដើម្បីអប់រំចិត្តគំនិត ក៏ដូចជា ដើម្បីរក្សានូវវប្បធម៌ ប្រពៃណី ទំនៀមទម្លាប់ដ៏ល្អរបស់បុព្វបុរសខ្មែរ ដែលគោរពតាមព្រះពុទ្ធសាសនាជាយូរអង្វែងណាស់មកហើយ និងអប់រំបណ្តុះនិស្ស័យតាមបែបពុទ្ធសាសនា ជាការតបស្នងសងគុណចំពោះមាតាបិតា និងចំពោះជាតិ សាសនា ព្រះមហាក្សត្រ ៕
