បាងកក៖ មនុស្ស៦នាក់ត្រូវបានចាប់ខ្លួនពីបទរត់ការគេហទំព័រលេងល្បែងដើម្បីទទួលការភ្នាល់លើប្រាក់អឺរ៉ូ ការប្រកួតបាល់ទាត់ឆ្នាំ២០២៤ កំឡុងការវាយឆ្មក់របស់ប៉ូលីសនៅលើទីតាំងចំនួន៤ នៅឈៀងរ៉ៃ និងប៉ាធុម ខេត្តថានី។
នាយឧត្តមសេនីយ៍ Athip Pongsiwapai មេបញ្ជាការផ្នែកបង្ក្រាបឧក្រិដ្ឋកម្មបច្ចេកវិទ្យា (TCSD) បានឲ្យដឹងថា ទីតាំងចំនួន៣ នៅឈៀងរ៉ៃ និងមួយកន្លែងនៅខេត្ត Pathum Thani ត្រូវបានស្វែងរកពាក់ព័ន្ធនឹងទីតាំងល្បែង Autowin888។
ស្ត្រី៤នាក់ និងបុរស២នាក់ ត្រូវបានចាប់ខ្លួនតាមដីកាដែលចេញដោយតុលាការព្រហ្មទណ្ឌ ក្រោមការចោទប្រកាន់ពីប្រតិបត្តិការល្បែងស៊ីសងតាមប្រព័ន្ធអនឡាញ និងលាងលុយកខ្វក់។
ពួកគេត្រូវបានគេស្គាល់ថា៖ ទី១.ឈ្មោះ Patcha Natesungnoen អាយុ៤១ឆ្នាំ, Patthraporn Saemon អាយុ 25 ឆ្នាំ; ទី២.ឈ្មោះ Sudarat Kerdkaewuangmul អាយុ៣៦ឆ្នាំ, ទី៣.ឈ្មោះ Wannapha Thephakhum អាយុ២៨ឆ្នាំ, ទី៤.ឈ្មោះ Chaichanadet Jantakhad អាយុ២៩ឆ្នាំ និងទី៥.ឈ្មោះ Kawinphat Sirisapyakhun អាយុ២៦ឆ្នាំ។
រឹបអូសបានកុំព្យូទ័រចំនួន ២គ្រឿង, ទូរស័ព្ទចំនួន ២៩គ្រឿង, សៀវភៅធនាគារចំនួន ២២ក្បាល, កាតអេធីអឹមចំនួន ១៩កាត, ឡានចំនួន ២គ្រឿង, លុយចំនួន ៣.៦លានបាត, ប័ណ្ណកម្មសិទ្ធិដី ២ប័ណ្ណ, កាំភ្លើងខ្លី ១ដើម និងវត្ថុមានតម្លៃមួយចំនួនទៀត។
នាយឧត្តមសេនីយ៍ Athip Pongsiwapai បានបញ្ជាក់ថា ល្បែងស៊ីសងបានកើតមានយ៉ាងពេញបន្ទុកក្នុងអំឡុងការប្រកួតភ្នាល់លើប្រាក់អឺរ៉ូ រហូតមកដល់ពេលនេះ ហើយប៉ូលីសបានបង្កើនការស៊ើបអង្កេតលើគេហទំព័រល្បែងស៊ីសង។
មេបញ្ជាការ TCSD បានឲ្យដឹងថា ពួកគេបានរកឃើញថា Autowin888 ដែលមានការិយាល័យនៅឈៀងរ៉ៃ និងប៉ាធុមថានី មានចំណូល ១៦១លានបាតនៅចន្លោះខែតុលាឆ្នាំមុនដល់ខែមេសាឆ្នាំនេះ។
ប៉ូលីសបានឲ្យដឹងថា ជនសង្ស័យទាំង៦នាក់បានចូលសារភាពក្នុងការចោទប្រកាន់។ ម្នាក់ក្នុងចំណោមពួកគេ គឺលោក Kawinphat ជាម្ចាស់គេហទំព័រ។
លោក Kawinphat បានធ្វើការជាបុគ្គលិកនៃគេហទំព័រល្បែងមួយក្នុងប្រទេសមីយ៉ាន់ម៉ា មុនពេលបង្កើតអាជីវកម្មផ្ទាល់ខ្លួនរបស់គាត់កាលពីខែកក្កដាឆ្នាំមុន នេះបើយោងតាមចម្លើយសារភាពរបស់គាត់។
ជនសង្ស័យទាំងអស់ត្រូវបានសមត្ថកិច្ចឃុំខ្លួនបណ្ដោះអាសន្នដើម្បីចាត់ការតាមផ្លូវច្បាប់។
