ឯកឧត្ដម ស្វាយ សំអ៊ាង វាយតម្លៃខ្ពស់ចំពោះភាគីពាក់ព័ន្ធទាំងអស់ ដែលចូលរួមអនុវត្តយ៉ាងសកម្ម ក្នុងការប្រយុទ្ធប្រឆាំងគ្រឿងញៀន រហូតទទួលលទ្ធផលល្អប្រសើរ គួរឱ្យកត់សម្គាល់នៅគ្រប់ដំណាក់កាល

ភ្នំពេញ៖ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង និងជាប្រធានគណៈកម្មាធិការ ត្រួតពិនិត្យគ្រឿងញៀនខេត្ត បានថ្លែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធគ្រប់ប្រភេទ មន្ទីរ-អង្គភាពពាក់ព័ន្ធ អង្គការ-សមាគមជាតិ អន្តរជាតិ វិស័យឯកជន សប្បុរសជន និងបងប្អូនប្រជាពលរដ្ឋ នៅទូទាំងខេត្ត ដែលបានយកអស់កម្លាំងកាយចិត្ត និងចូលរួមអនុវត្តយ៉ាងសកម្ម ប្រកបដោយស្មារតី ទទួលខុសត្រូវខ្ពស់ទៅតាមតួនាទី និងភារកិច្ច ក្នុងការប្រយុទ្ធប្រឆាំងគ្រឿងញៀន ក្នុងក្របខ័ណ្ឌនៃ រដ្ឋបាលថ្នាក់ក្រោមជាតិនាពេលកន្លងមក ក៏ដូចជាពេលបច្ចុប្បន្ន រហូតធ្វើឱ្យការងារប្រយុទ្ធប្រឆាំង គ្រឿងញៀន ពិសេស ការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ដំណើរការ ទៅដោយរលូន និងទទួលបានលទ្ធផលល្អប្រសើរគួរឱ្យកត់សម្គាល់នៅគ្រប់ដំណាក់កាល។

ក្នុងឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា ២០២៤ នាព្រឹកថ្ងៃទី២៦ ខែមិថុនា ឆ្នាំ២០២៤ ឯកឧត្តម ស្វាយ សំអ៊ាង បានមានប្រសាសន៍ថា ថ្ងៃនេះ ក្នុងនាមថ្នាក់ដឹកនាំខេត្ត និងជាប្រធានគណៈកម្មាធិការត្រួតពិនិត្យគ្រឿងញៀនខេត្ត ឯកឧត្ដមមានកិត្តិយស និងសេចក្តីសោមនស្សរីករាយ សូមសម្តែងនូវមនោសញ្ចេតនាស្វាគមន៍យ៉ាងកក់ក្តៅ ចំពោះវត្តមានរបស់ ឯកឧត្តម លោកជំទាវ លោក លោកស្រី លោកគ្រូ អ្នកគ្រូ បងប្អូនប្រជាពលរដ្ឋ ក្មួយៗនិស្សិត គរុសិស្ស និងសិស្សានុសិស្សទាំងអស់ ក្នុងពិធីអបអរសាទរទិវាអន្តរជាតិប្រយុទ្ធប្រឆាំង គ្រឿងញៀនថ្ងៃទី២៦ ខែមិថុនា ឆ្នាំ២០២៤ ដ៏ឱឡារឹក ក្រោមប្រធានបទ “ភស្តុតាងបង្ហាញច្បាស់ថាការវិនិយោគលើការបង្ការ គឺជាការចាំបាច់” ដែលជាប្រធានបទកំណត់ដោយការិយាល័យអង្គការ សហប្រជាជាតិទទួលបន្ទុកកិច្ចការគ្រឿងញៀន និងឧក្រិដ្ឋកម្មគ្រឿងញៀន (UNODC) ហើយសម្រាប់ កម្ពុជារបស់យើង ក៏បានសម្រួចខ្លឹមសារនៃប្រធានបទរបស់ខ្លួន ដើម្បីឱ្យមានសង្គតិភាព និងភាព ប្រទាក់ក្រឡាគ្នា នោះគឺ “រួមគ្នាវិនិយោគលើការបង្ការ ទប់ស្កាត់ និងលើកកម្ពស់ការអប់រំ ដើម្បីសហគមន៍គ្មានគ្រឿងញៀន” ប្រកបដោយអត្ថន័យ នាពេលនេះ។

ឯកឧត្ដម ស្វាយ សំអ៊ាង ក៏បានយកឱកាសដ៏ថ្លៃថ្លានេះ សម្តែងអំណរគុណយ៉ាងជ្រាលជ្រៅចំពោះវត្តមានរបស់ឯកឧត្តម លោកជំទាវ លោក លោកស្រី សមាជិក សមាជិកានៃអង្គពិធីទាំងមូល ដែលបានចំណាយពេល វេលាដ៏មមាញឹក និងមានតម្លៃអញ្ជើញចូលរួមអបអរសាទរទិវាអន្តរជាតិប្រយុទ្ធប្រឆាំងគ្រឿងញៀនក្នុង ថ្ងៃនេះ ញុំាងឱ្យពិធីនេះកាន់តែមានភាពអធិកអធម។

ឯកឧត្ដមអភិបាលខេត្តបញ្ជាក់ថា វត្តមានចូលរួមរបស់ឯកឧត្តម លោកជំទាវ លោក លោកស្រី និងអ្នកពាក់ព័ន្ធគ្រប់លំដាប់ថ្នាក់ឱកាសនេះ បានឆ្លុះបញ្ចាំងយ៉ាងច្បាស់ពីស្មារតីរួបរួមគ្នាជាធ្លុងមួយ ក្នុងការចាត់ទុកបញ្ហាគ្រឿងញៀនជាបញ្ហារបស់សង្គមជាតិទាំងមូល ពោលគឺពុំមែនជាបញ្ហារបស់ក្រសួង ស្ថាប័ន ឬជាសមត្ថកិច្ចរបស់អ្នកណាមួយផ្តាច់មុខនោះទេ ប៉ុន្តែវាជាបញ្ហារួម ដែលទាមទារឱ្យយើងទាំង អស់គ្នាត្រូវចូលរួមលុបបំបាត់ និងប្រយុទ្ធប្រឆាំងស្របតាមទិសស្លោក និងទស្សនវិស័យរបស់រាជ រដ្ឋាភិបាល គឺ “ចូលរួមទាំងអស់គ្នា ដើម្បីជីវិត និងសហគមន៍គ្មានគ្រឿងញៀន” ៕