ឯកឧត្តមបណ្ឌិត ម៉ី វ៉ាន់ ប្រគល់លិខិតឧទ្ទេសនាមអាហារូបករណ៍នៃសមាគម (អ.ម.ត) ដល់សិស្សនិស្សិត ១៧៤នាក់ មកពីសាកលវិទ្យាល័យចំនួន៣
ភ្នំពេញ៖ ឯកឧត្តមបណ្ឌិត ម៉ី វ៉ាន់ ប្រធានក្រុមគ្រប់គ្រងនិស្សិត អ.ម.ត (ក្រុមទី៦) ឯកឧត្តម ពេញ ភារម្យ តំណាងដ៏ខ្ពង់ខ្ពស់លោកជំទាវទី១នៃកម្ពុជា បណ្ឌិត ពេជ ចន្ទមុន្នី ហ៊ុនម៉ាណែត ប្រធានសមាគមសិស្ស-និស្សិតរអាហារូបករណ៍ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បានអញ្ជើញជាអធិបតីភាពក្នុងពិធីសំណេះសំណាល និងបញ្ចូលសមាជិក-សមាជិកា សមាគម អ.ម.ត (ក្រុមទី៦) ថ្មី ចំនួន១៧៤នាក់ នៅសាលប្រជុំសាលាជាតិគយ នាព្រឹកថ្ងៃទី២៣ ខែមិថុនា ឆ្នាំ២០២៤។
សិស្សនិស្សិតមកពីសកលវិទ្យាល័យចំនួន៣រួមមាន៖ សាកលវិទ្យាល័យបញ្ញាជាតិ សាកលវិទ្យាល័យបញ្ញាសាស្ត្រ និងសាកលវិទ្យាល័យភូមិន្ទនីតិសាស្ដ្រ វិទ្យាសាស្រ្តសេដ្ឋកិច្ច ថ្មី ដែលត្រូវទទួលបានលិខិតឧទ្ទេសនាមអាហារូបករណ៍របស់សមាគម អ.ម.ត (ក្រុមទី៦) មានចំនួន១៧៤នាក់ សមាជិក-សមាជិកាចាស់ ចំនួន៧៦នាក់ និងអ្នកចូលសរុបទាំងអស់២៥០នាក់។
ជាកិច្ចចាប់ផ្តើមនៃកម្មវិធី លោក ហេង សុបញ្ញា អនុប្រធានក្រុមការងារគ្រប់គ្រងនិស្សិតសមាគម អ.ម.ត (ក្រុមទី៦) បានប្រកាសនូវសេចក្តីសម្រេចរបស់ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានគណៈកម្មាធិការអាហារូបករណ៍ ស្តីពីការបញ្ចូល និងទទួលស្គាល់សមាជិក-សមាជិកា សមាគម អ.ម.ត ខណៈ លោក មួង ដារ៉ា អនុប្រធានក្រុមការងារគ្រប់គ្រងនិស្សិត សមាគម អ.ម.ត (ក្រុមទី៦) បានឡើងអានបញ្ជីឈ្មោះសិស្សនិស្សិតដែលត្រូវទទួលបានលិខិតឧទ្ទេសនាម ជូនគណៈអធិបតីជ្រាប។
ថ្លែងទៅកាន់សិស្សនិស្សិត និងអង្គពិធី ឯកឧត្តមបណ្ឌិត ម៉ី វ៉ាន់ បានមានប្រសាសន៍ផ្តាំផ្ញើដល់ប្អូនៗសិស្សនិស្សិតទាំង៣សាកលវិទ្យាល័យ ដោយត្រូវប្រណិបត្តិខ្លួនឱ្យក្លាយជាកូនល្អ មិត្តល្អ និងសិស្សល្អ ត្រូវបង្កើនការពង្រីកសាមគ្គីភាពក្នុងសមាគម ក៏ដូចជាការដឹងគុណពីអ្នកថែរក្សាបីបាច់ប្អូនៗពីតូចរហូតធំ និងការបង្ហាត់បង្រៀន ផ្តល់ចំណេះដឹងពីលោកគ្រូ អ្នកគ្រូ ដើម្បីជាទុនសម្រាប់ប្អូនៗស្វែងរកពន្លឺអនាគត ក្រោយបញ្ចប់ការសិក្សា។ បន្ថែមលើនេះ ឯកឧត្តមបណ្ឌិត ក៏បានក្រើនរំឭកដល់ប្អូនៗសិស្សនិស្សិតទាំងអស់ ត្រូវសិក្សាស្វែងយល់អំពីគុណតម្លៃរបស់ប្រមុខរាជរដ្ឋាភិបាលកម្ពុជា ដែលថ្នាក់ដឹកនាំទាំងពីរ ដែលមាន សម្តេចធិបតី ហ៊ុន ម៉ាណែត ជាប្រធានកិត្តិយសសមាគម អ.ម.ត និងលោកជំទាវទី១នៃកម្ពុជា ជាប្រធានសមាគម អ.ម.ត បានផ្តល់អាហារូបករណ៍ដល់ប្អូនៗសិស្សនិស្សិត បន្តការសិក្សាថ្នាក់បរិញ្ញាបត្រដោយមិនបង់ថ្លៃ។
បន្ថែមលើនេះ ឯកឧត្តមបណ្ឌិត បានគូសបញ្ជាក់ដល់ប្អូនៗសិស្សនិស្សិតថា ក្នុងនាមជាកុលបុត្រ-កុលធីតាខ្មែរ ត្រូវត្រង់ត្រាប់ស្តាប់ការអប់រំទូហ្មានរបស់លោកគ្រូ អ្នកគ្រូ ថ្នាក់ដឹកនាំនៃសមាគម អ.ម.ត (ក្រុមទី៦) ដើម្បីអភិវឌ្ឍចំណេះដឹងរបស់ខ្លួនឱ្យក្លាយជាទំពាំងស្នងឫស្សី ដើម្បីចូលរួមកសាងសង្គមជាតិជាមួយមុខប្រមុខរាជរដ្ឋាភិបាល និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលជាប្រធានគណៈកម្មាធិការអាហារូបករណ៍ដល់សិស្សនិស្សិតសមាគម អ.ម.ត ទូទាំងប្រទេស។ ក្រៅតែពីផ្តល់សារអប់រំ លើកកម្ពស់គុណវឌ្ឍិការសិក្សា ឯកឧត្តមបណ្ឌិត ម៉ី វ៉ាន់ ក៏បានជំរុញឱ្យសិស្សនិស្សិតទាំងអស់ ត្រូវចេះរួបរួមគ្នាជាធ្លុងមួយក្នុងក្រុម អ.ម.ត (ក្រុមទី៦) ដោយត្រូវចេះយកអាសារគ្នាទៅវិញទៅមក ចេះអប់រំទូហ្មានគ្នានៅពេលឃើញមិត្តរួមក្រុមណាម្នាក់ដើរផ្លូវខុស ហើយអ្វីដែលសំខាន់នោះ គឺត្រូវរក្សាបាននូវសាមគ្គីភាពផ្ទៃក្នុងឱ្យបានល្អប្រសើរ គឺជារឿងដែលចាំបាច់បំផុត ៕
