ឯកឧត្តម អ៊ូច ភា ចុះសួរសុខទុក្ខ និងនាំយកអំណោយសម្ភារគ្រឿងឧបភោគបរិភោគ និងថវិកា ប្រគល់ជូន មជ្ឈមណ្ឌលព្យាបាល និងស្ដារនីតិសម្បទាអ្នកញៀនគ្រឿងញៀន របស់កងពលតូចថ្មើរជើងលេខ៣១ ក្នុងស្រុកជុំគិរី

ភ្នំពេញ៖ នាព្រឹកថ្ងៃអាទិត្យ ទី២៣ ខែមិថុនា ឆ្នាំ២០២៤ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ រួមជាមួយ លោក លោកស្រី អភិបាលរងខេត្ត ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្ត លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្ត លោកវរសេនីយ៍ទោ សុខ តារា មេបញ្ជាការរងកងរាជអាវុធហត្ថខេត្ត និងលោក លោកស្រី ប្រធានមន្ទីរអង្គភាពជុំវិញខេត្ត បានដឹកនាំគណៈប្រតិភូរដ្ឋបាលខេត្តតាកែវ បានអញ្ជើញជួបសំណេះសំណាល សួរសុខទុក្ខ និងនាំយកគ្រឿងឧបភោគបរិភោគ ថវិកា ប្រគល់ជូន មជ្ឈមណ្ឌលព្យាបាល និងស្ដារនីតិសម្បទាអ្នកញៀនគ្រឿងញៀន របស់កងពលតូចថ្មើរជើងលេខ៣១ ស្ថិតនៅភូមិបាក់នឹម ឃុំច្រេស ស្រុកជុំគិរី ខេត្តកំពត ដែលកំពុងមានជនរងគ្រោះកំពុងសម្រាកព្យាបាលសរុប ២៩៤នាក់។

ពិធីនេះក៏មានការអញ្ជើញទទួលស្វាគមន៍ដោយ លោកឧត្តមសេនីយ៍ទោ ផង់ យ៉ុត មេបញ្ជាការ មេបញ្ជាការកងពលថ្មើជើងលេខ៣១ លោកឧត្តមសេនីយ៍ត្រី គឹម កុសល ប្រធានមជ្ឈមណ្ឌលព្យាបាល និងស្ដារនីតិសម្បទាអ្នកញៀនគ្រឿងញៀន ព្រមទាំងនាយទាហាន ពលទាហាន ជាច្រើនរូបផងដែរ។

បើតាមការបញ្ជាក់ពី ឯកឧត្តម អ៊ូច ភា អភិបាលខេត្ត បានឱ្យដឹងថា សម្ភារៈ និងថវិកា នាំយកទៅប្រគល់ជូនរួមមាន៖ អង្ករ ៨តោន ក្នុងនោះ ឯកឧត្តមព្រះរាជអាជ្ញា អង្ករ ៥តោន, ទឹកក្រូច ៣០កេស, មី ១០០កេស, ទឹកត្រី ១០០យួរ, ទឹកស៊ីអ៊ីវ ១០០យួរ, ទឹកសុទ្ធ ៥០កេស, ពងទា សាប ប្រៃ ៨០០គ្រាប់, ថ្នាំពេទ្យ និងបរិក្ខាពេទ្យ ១៨មុខ គិតជាទឹកប្រាក់ជាង ១៣លានរៀល និងថវិកា ១០,០០០,០០០រៀល ផងដែរ ៕