ភ្នំពេញ៖ គិតត្រឹមដំណាច់ត្រីមាសទី១ ឆ្នាំ២០២៤ កម្ពុជាមានសន្និធិបំណុលសាធារណៈសរុបចំនួន១១,០៩ប៊ីលានដុល្លារអាម៉េរិក ដោយគិតទាំងបំណុលមរតក ក្នុងនោះ៩៩,១២ភាគរយជាបំណុលសាធារណៈក្រៅប្រទេស (ក្របខ័ណ្ឌទ្វេភាគីប្រមាណ៦៤ភាគរយ និងក្របខ័ណ្ឌពហុភាគីប្រមាណ៣៦ភាគរយ)។
បើតាមការអះអាងក្នុងព្រឹត្ដិបត្រស្ថិតិបំណុលសាធារណៈកម្ពុជា លេខ២២ ដែលចេញដោយក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ប្រទេស ចិន នៅ តែ ជា ម្ចាស់ បំណុល ធំជាង គេ នៃ បំណុល សាធារណៈ ក្រៅ ប្រទេសរបស់ កម្ពុជា ដោយមាន ចំនួន សរុប ជិត ៤ ពាន់ លាន ដុល្លារ ស្មើ នឹង ៣៦ភាគរយនៃ បំណុល សរុប ក្រៅ ប្រទេស។ សមាសភាគបំណុលសាធារណៈទាំងអស់នោះរួមមាន៖ ៤៦ភាគរយជាដុល្លារអាម៉េរិក, ១៩ភាគរយជាអេសដេអ៊ែរ, ១១ភាគរយជាយ័នចិន, ១១ភាគរយជាយេនជប៉ុន, ៧ភាគរយជាអឺរ៉ូ, និង ៥ភាគរយទៀត ជារូបិយវត្ថុជាតិ និងរូបិយបណ្ណផ្សេងៗ។ យ៉ាងណាមិញ ឥណទានទាំងនេះ សុទ្ធសឹងជាឥណទានមានកម្រិតសម្បទានខ្ពស់ ដោយមានធាតុអំណោយជាមធ្យមប្រមាណ៤០ភាគរយ។ គោលដៅនៃការចុះកិច្ចព្រមព្រៀងឥណទានថ្មីទាំងនេះ គឺសម្រាប់បំពេញតម្រូវការហិរញ្ញប្បទានក្នុងវិស័យអាទិភាពរបស់រាជរដ្ឋាភិបាល សំដៅរួមចំណែកទ្រទ្រង់ចីរភាពនៃកំណើនរយៈពេលវែង និងបង្កើនផលិតភាពសេដ្ឋកិច្ច ឬផលិតភាពផលិតកម្ម។ បន្ថែមពីនេះ ក្នុងត្រីមាសទី១ ឆ្នាំ២០២៤ រាជរដ្ឋាភិបាលបានចុះកិច្ចព្រមព្រៀងឥណទានសម្បទានថ្មី ជាមួយដៃគូអភិវឌ្ឍនានាសរុបចំនួន៤៥០៤លានដុល្លារអាម៉េរិក ដើម្បីធ្វើហិរញ្ញប្បទានគាំទ្រគម្រោងវិនិយោគសំដៅលើកស្ទួយកំណើន និងផលិតភាពសេដ្ឋកិច្ច។
យ៉ាងណាមិញ លទ្ធផលបឋមនៃការវិភាគចីរភាពបំណុលរហូតដល់ ដំណាច់ឆ្នាំ២០២៤ បង្ហាញថា បើទោះបីជាសេដ្ឋកិច្ចកម្ពុជា ទទួលរងនូវផលប៉ះពាល់ពីការរីករាលដាលនៃវិបត្តិជំងឺកូវីដ-១៩ និងពីកត្តាខាងក្រៅផ្សេងទៀតក្ដី ក៏ស្ថានភាពបំណុលសាធារណៈកម្ពុជា នៅតែស្ថិតក្នុងភាពអាចគ្រប់គ្រងបាន ពោលគឺនៅតែមាន «ចីរភាព» និង «ហានីភ័យកម្រិតទាប» ដដែល ដោយរាល់សូចនាករបំណុលគន្លឹះៗទាំងអស់ សុទ្ធតែស្ថិតក្រោម អនុបាតគោល ក្នុងនោះអនុបាតតម្លៃបច្ចុប្បន្ននៃបំណុលសាធារណៈក្រៅប្រទេសធៀបនឹង ផសស មានត្រឹមកម្រិត១៩ភាគរយធៀបនឹងអនុបាតគោល៤០ភាគរយ។
នៅក្នុងត្រីមាសទី១ ឆ្នាំ២០២៤នេះ រាជរដ្ឋាភិបាលបានទូទាត់សេវាបំណុលសរុបចំនួន១៨១,៥៥លានដុល្លារអាម៉េរិក រួមមាន៖ ១.ក្របខ័ណ្ឌបំណុលសាធារណៈក្រៅប្រទេសមានចំនួនប្រមាណ១៨១លានដុល្លារ (ប្រាក់ដើម១៤២,៤០លានដុល្លារ និងការប្រាក់ និងកម្រៃផ្សេងៗ៣៨,៦០លានដុល្លារ)។ និង២.ក្របខ័ណ្ឌបំណុលសាធារណៈក្នុងប្រទេសមានចំនួនប្រមាណ ០,៥៥លានដុល្លារ (ជាការប្រាក់ទាំងអស់)៕
