ភ្នំពេញ៖ យោងតាមរបាយការណ៍របស់អគ្គនាយកដ្ឋានកសិកម្ម បង្ហាញនៅថ្ងៃទី២០ ខែមិថុនា ឆ្នាំ២០២៤ បានឱ្យដឹងថា ក្រោយផ្ទុះករណីដង្កូវហ្វូង និងសត្វល្អិតចង្រៃបំផ្លាញដំណាំកសិករ មន្ត្រីជំនាញនៃមន្ទីរកសិកម្មរកឃើញថា ស្រូវប្រជាកសិករចំនួន៤៩៨៦,៣ហិកតា ក្នុងខេត្ត ព្រះវិហារ កំពង់ធំ កំពង់ចាម កំពង់ឆ្នាំង បានរងនូវការបំផ្លាញពីដង្កូវហ្វូង និងសត្វល្អិតចង្រៃ។
អគ្គនាយកដ្ឋានកសិកម្ម បញ្ជាក់ថា គិតត្រឹមថ្ងៃទី១៩ ខែមិថុនា ឆ្នាំ២០២៤ ដំណាំកសិករក្នុងខេត្តទាំង៤ រងផលប៉ះពាល់ដោយសត្វល្អិតចង្រៃ ដង្កូវហ្វូង និងដង្កូវមូស្លឹកនោះរួមមាន៖ ខេត្តព្រះវិហារ ដំណាំស្រូវចំនួន១២២១ហិកតា និងដំណាំដំឡូងមីចំនួន៣៣៧១ហិកតា។ ខេត្តកំពង់ធំ ដំណាំស្រូវចំនួន៣៦៣៦ហិកតា។ ខេត្តកំពង់ចាម ដំណាំស្រូវចំនួន១១៨ហិកតា និងខេត្តកំពង់ឆ្នាំង ដំណាំស្រូវចំនួន១១,៣០ហិកតា។
យ៉ាងណា អគ្គនាយកដ្ឋានកសិកម្ម បានសង្កត់ធ្ងន់ថា៖ «ស្ថានភាពនៃការបំផ្លាញដោយប្រជាករ ដង្កូវហ្វូង និងដង្កូវមូស្លឹក នេះកំពុងតែស្ថិតនៅក្នុងស្ថានភាពតាមដាន និងអន្តរាគមន៍បន្ត ដើម្បីឈានទៅរកស្ថានភាពដែលអាចគ្រប់គ្រងបាន»។ ទន្ទឹមនឹងការបង្ហាញពីតួលេខដំណាំរងការបំផ្លាញពីសត្វល្អិតចង្រៃ ក្រុមការងារជំនាញនៃនាយកដ្ឋានការពារដំណាំ អនាម័យ និងភូតគាមអនាម័យនៃអគ្គនាកដ្ឋានកសិកម្ម បានសហការជាមួយមន្ទីរកសិកម្ម រុក្ខាប្រមាញ់ និងនេសាទខេត្តទាំង៤ ព្រមទាំងអាជ្ញាធរដែនដីតាមមូលដ្ឋានក្នុងខេត្ត បានណែនាំកសិករពីវិធានការមួយចំនួន ដើម្បីអាចគ្រប់គ្រងដង្កូវហ្វូង និងដង្កូវមូស្លឹកផងដែរ។
វិធានការទាំងនោះរួមមាន៖ យុទ្ធនាការផ្សព្វផ្សាយស្តីពី «វិធានការការពារ និងកម្ចាត់ដង្កូវហ្វូង ដែលស៊ីបំផ្លាញដំណាំកសិកម្មរបស់ប្រជាកសិករ» ក្នុងគោលបំណង គឺដើម្បីផ្សព្វផ្សាយពីវិធីការពារ និងកម្ចាត់ដង្កូវហ្វូង ដែលស៊ីបំផ្លាញដំណាំស្រូវ និងដំឡូងមីនៅខេត្តព្រះវិហារ មានអ្នកចូលរួមសរុបចំនួន១៥៦នាក់។ ណែនាំកសិករឱ្យបន្តតាមដានវត្តមានរបស់សមាសភាពចង្រៃ ដែលកំពុងកើតមាននៅក្នុងស្រែ-ចម្ការជាប្រចាំ និងធ្វើការរាយការណ៍ដល់មន្រ្តីបច្ចេកទេសកសិកម្ម។ ណែនាំដល់បងប្អូនប្រជាកសិករអំពីវិធានការការពារ លើការប្រើប្រាស់អន្ទាក់ជូរអែម ប្រើប្រាស់វិធីសាស្ដ្រមេកានិចដោយយកប្រេងម៉ាសូតលាយជាមួយដីខ្សាច់ដើម្បីបាចចំពោះស្រែមានទឹក និងកម្ចាត់ដង្កូវហ្វូង ដើម្បីទទួលបានប្រសិទ្ធភាពខ្ពស់។
អគ្គនាយកដ្ឋានកសិកម្ម ក៏បានណែនាំដល់កសិករដែលកំពុងប្រើប្រាស់ថ្នាំកសិកម្មក្នុងការកម្ចាត់សត្វល្អិតចង្រៃត្រូវជ្រើសរើស ប្រើប្រាស់ថ្នាំកសិកម្មឱ្យបានត្រឹមត្រូវ និងផ្លាស់ប្ដូរសារធាតុសកម្មដើម្បីកុំឱ្យសត្វល្អិតចង្រៃមានភាពស៊ាំនឹងថ្នាំកសិកម្ម។ បន្ថែលើនោះអ្នកជំនាញក៏បានចែកសៀវភៅ និងឯកសារបច្ចេកទេសស្តីពីវិធានការការពារ និងកម្ចាត់សមាសភាពចង្រៃលើដំណាំស្រូវជូនដល់មន្ត្រីមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង មន្ត្រីកសិកម្មឃុំ ព្រមទាំងបងប្អូនប្រជាកសិករ ព្រមទាំងបណ្តុះបណ្តាលស្តីពីដង្កូវហ្វូង និងវិធានការកម្ចាត់ដល់មន្ត្រីកសិកម្មឃុំ ក្រុមប្រឹក្សាឃុំ និងជំនួយការឃុំ ក្នុងភូមិសាស្ត្រស្រុកព្រះនេត្រព្រះ ផងដែរ។
គួរជម្រាបថា ដង្កូវហ្វូងត្រូវបានចាត់ទុកជាសត្វល្អិតចង្រៃចម្បងនៅអាស៊ី។ នៅប្រទេសកម្ពុជា ជារៀងរាល់ឆ្នាំមានដំណាំជាច្រើនមុខដូចជា ស្រូវ សណ្តែក ដំឡូងមី ពោត ជាដើម តែងរងនូវការបំផ្លាញដោយដង្កូវហ្វូងនេះ។ ជាក់ស្តែង គិតត្រឹមថ្ងៃទី១៩មិថុនា ឆ្នាំ២០២៤ ក្រសួងកសិកម្មបានរកឃើញវត្តមានដង្កូវប្រភេទនេះ ក្នុងខេត្ត ត្បូងឃ្មុំ សៀមរាប ក្រចេះ ឧត្តរមានជ័យ ស្ទឹងត្រែង ព្រះវិហារ កំពង់ធំ កំពង់ចាម កំពង់ឆ្នាំង និងខេត្តបន្ទាយមានជ័យ៕
