លោកជំទាវ ឡោក ខេង ជំរុញឱ្យអាជ្ញាធរខេត្តឧត្តរមានជ័យធ្វើការពង្រឹងលើវិស័យសុខាភិបាល វិស័យសង្គមកិច្ច វិស័យការងារ និងបណ្តុះបណ្តាលវិជ្ជាជីវៈ និងវិស័យកិច្ចការនារី
ភ្នំពេញ៖ នារសៀលថ្ងៃទី១១ ខែមិថុនា ឆ្នាំ២០២៤ ដោយមានការអនុញ្ញាតពីសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា លោកជំទាវ ឡោក ខេង បានដឹកនាំគណៈប្រតិភូគណៈកម្មការទី៨នៃរដ្ឋសភា និងមានការអញ្ជើញចូលរួមពី ឯកឧត្ដម នៅ សំ តំណាងរាស្ត្រមណ្ឌលខេត្តឧត្តរមានជ័យ បានអញ្ជើញចុះពិនិត្យស្វែងយល់ពីប្រសិទ្ធភាពនៃការអនុវត្តច្បាប់ និងគោលនយោបាយនានា ពាក់ព័ន្ធនឹងវិស័យសុខាភិបាល សង្គមកិច្ច អតីតយុទ្ធជន និងយុវនីតិសម្បទា វិស័យការងារ និងបណ្តុះបណ្តាលវិជ្ជាជីវៈ និងកិច្ចការនារី នៅសាលប្រជុំសាលាខេត្តឧត្តរមានជ័យ។
លោក ឃិន ញ៉ាណ អភិបាល នៃគណៈអភិបាលខេត្តឧត្តរមានជ័យស្តីទី បានរាយការណ៍ជូនគណៈប្រតិភូពីស្ថានភាពការងារ និងសមិទ្ធផលសំខាន់ៗទាក់ទងនឹងវិស័យទាំង៤ ដែលខេត្តសម្រេចបានមានវិស័យសុខាភិបាល វិស័យសង្គមកិច្ច វិស័យការងារ និងបណ្តុះបណ្តាលវិជ្ជាជីវៈ និងវិស័យកិច្ចការនារី។
លោកបានបន្តទៀតថា ប្រជាពលរដ្ឋបានមកទទួលសេវាពិនិត្យសុខភាពតាមមន្ទីរពេទ្យបង្អែកចំនួន០២ មណ្ឌលសុខភាពចំនួន៣៧ និងបុស្តិ៍សុខភាពចំនួន០១ ដោយប្រើប្រាស់ប័ណ្ណ ប.ស.ស នៅមានចំនួនតិច (ភាគច្រើនជាមន្ត្រីរាជការ) ប័ណ្ណសមធម៌មានចំនួនច្រើន និងមានការបង់ប្រាក់ដោយផ្ទាល់ខ្លួនផងដែរ។ ជាមួយគ្នានេះ ខេត្តបានអនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារក្រោមអាយុ២ឆ្នាំ បានបង្កើតសមាគមមនុស្សចាស់ចំនួន ២៤កន្លែងទូទាំងខេត្ត និងបានសាងសង់ផ្ទះចំនួន ៣៩០ខ្នង ជូនអតីតយុទ្ធជន ព្រមទាំងបានធ្វើការចុះបញ្ជីសហគ្រាស គ្រឹះស្ថាន សិប្បកម្មចំនួន៣២៤សហគ្រាស និងបានអនុវត្តគោលនយោបាយ ប.ស.ស ដែលមានកម្មករ-និយោជិតសរុប ១៣,៥៦៨នាក់ និងបានបើកវគ្គបណ្ដុះបណ្ដាលបច្ចេកទេសដល់ប្រជាពលរដ្ឋបានមួយវគ្គមាន៣ជំនាញទទួលបានសិក្ខាកាម៥០នាក់ នៅក្នុងគម្រោង១លាន៥សែននាក់។ ជាមួយគ្នានោះ ខេត្តបានជំរុញឱ្យមានវេទិកាស្ត្រីក្នុងភាពជាអ្នកដឹកនាំ និងអភិបាលកិច្ច ការបញ្រ្ជាបយេនឌ័រ ការលើកកម្ពស់សីលធម៌សង្គម តម្លៃស្ត្រី និងគ្រួសារ ការលើកកម្ពស់សុខុមាលភាពរបស់ស្ត្រី និងក្មេងស្រី រួមទាំងស្ត្រី និងការប្រែប្រួលអាកាសធាតុ។
លោកបានបញ្ជាក់ថា ទន្ទឹមនឹងការអភិវឌ្ឍន៍គួរឱ្យកត់សម្គាល់ខេត្តជួបបញ្ហាប្រឈមមួយចំនួនពិសេសកង្វះខាតធនធានមនុស្ស (ពេទ្យជំនាញឯកទេស, គ្រូបង្គោលជំនាញបច្ចេកទេស) សម្ភារៈបរិក្ខារបច្ចេកទេស កន្លែងស្នាក់នៅ ឬអន្តេវាសិកដ្ឋាន។
ក្រោយពីបានស្តាប់របាយការណ៍របស់រដ្ឋបាលខេត្ត ក៏ដូចជាមន្ទីរជំនាញពាក់ព័ន្ធរួចមក លោកជំទាវ ឡោក ខេង បានធ្វើការកោតសរសើរ និងវាយតម្លៃខ្ពស់ចំពោះអាជ្ញាធរខេត្ត ដែលបានខិតខំបំពេញការងារជូនប្រជាពលរដ្ឋស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ដែលបានដាក់ចេញនូវអភិក្រម៥គឺ មនុស្ស ផ្លូវ ទឹក ភ្លើង និងបច្ចេកវិទ្យា និងបានដាក់ចេញនូវគោលនយោបាយ៦ចំណុចបន្ថែមទៀត រួមមាន ការពង្រឹងវិជ្ជាជីវៈបច្ចេកទេស ការប្រើប្រាស់ប័ណ្ណប.ស.ស ប័ណ្ណសមធម៌ ការលើកម្ពស់សុខុមាលភាពសង្គម ការអភិវឌ្ឍឯកជនទាក់ទងនឹងការងារ ប.ស.ស ការអភិវឌ្ឍ សហគ្រាសធនតូច និងមធ្យម សហគ្រិនភាព ការអភិវឌ្ឍទីផ្សារការងា និងសេដ្ឋកិច្ចក្រៅប្រព័ន្ធ ការអភិវឌ្ឍដោយភាពធន់ចីរភាព ការពង្រឹងផលលាភវិទ្យាសាស្ត្រ និងការលើកកម្ពស់សមភាពយេនឌ័រ។
លោកជំទាវក៏បានជំរុញឱ្យអាជ្ញាធរខេត្តក៏ដូចជាមន្ទីរជំនាញពាក់ព័ន្ធទាំងអស់ត្រូវខិតខំធ្វើការផ្សព្វផ្សាយឱ្យប្រជាពលរដ្ឋបានយល់ដឹងកាន់តែច្បាស់អំពីជំងឺមិនឆ្លង ក៏ដូចជាជំងឺផ្សេងៗ ជាពិសេសគឺការលើកទឹកចិត្តឱ្យប្រជាជនដែលជាបុគ្គលស្វ័យនិយោជន៍មានការស្ម័គ្រចិត្តចុះឈ្មោះជាសមាជិក ប.ស.ស ដើម្បីងាយស្រួលទទួលយកនូវសេវាសុខាភិបាល។
លោកជំទាវក៏បានផ្តល់យុទ្ធសាស្ត្រ និងបច្ចេកទេសថ្មីៗដល់សាលាពហុបច្ចេកទេសខេត្ត ក្នុងការទាក់ទាញសិក្ខាកាមមករៀន និងស្វែងរកសម្ភារៈបរិក្ខារដល់សិក្ខាកាមយកមកសិក្សារៀនសូត្របន្ថែមទៀតផងដែរ ៕
