ភ្នំពេញ៖ ឯកឧត្តម ឡេង ជីវិន អគ្គនាយកចំណេះនិងព័ត៌មានបរិស្ថាន បានលើកឡើងថា បរិស្ថាន គឺជាជីវិតរបស់យើង មនុស្សម្នាក់ៗត្រូវមានបរិស្ថាននៅក្នុងខ្លួន ហេតុនេះ យើងទាំងអស់គ្នា ត្រូវរួបរួមគ្នាថែរក្សាបរិស្ថាន។ ឯកឧត្តមបានលើកឡើងបែបនេះក្នុងឱកាសអញ្ជើញជួបសំណេះសំណាល និងចែករំលែកចំណេះដឹងបរិស្ថានជាមួយសិស្សានុសិស្សវិទ្យាល័យ ហ៊ុន សែន ទេពនិម្មិត ក្រុងប៉ៃលិន មុនមួយថ្ងៃនៃការប្រារព្ធទិវាបរិស្ថានជាតិ និងបរិស្ថានពិភពលោក ៥មិថុនា ដែលនឹងប្រព្រឹត្តទៅនៅថ្ងៃទី១០ ខែមិថុនា ឆ្នាំ២០២៤ នៅខេត្តប៉ៃលិន។ ពិធីសំណេះសំណាល និងផ្សព្វផ្សាយចំណេះដឹងបរិស្ថាន ក៏មានការអញ្ជើញចូលរួមពីរដ្ឋបាលក្រុង ស្រុក តំណាងក្រុមហ៊ុនវឌ្ឍនៈ ប្រ៊ូវើរី មន្ទីរស្ថាប័នជុំវិញខេត្ត អង្គការដៃគូ លោកគ្រូអ្នកគ្រូ សិស្សានុសិស្សយ៉ាងច្រើនកុះករ។ ឆ្លៀតក្នុងឱកាសនោះដែរ ឯកឧត្តម បានថ្លែងអំណរគុណដល់លោកគ្រូអ្នកគ្រូ សិស្សានុសិស្សទាំងអស់ ដែលបានចូលរួម និងមានការយល់ដឹងច្រើនអំពីកិច្ចការពារបរិស្ថាន។គោលដៅរបស់យើង គឺធ្វើយ៉ាងណាឱ្យមានបរិស្ថានល្អ និងមាននិរន្តរភាពបរិស្ថាន។ ជាមួយគ្នានេះ ឯកឧត្តមអគ្គនាយក បានគូសបញ្ជាក់ឱ្យដឹងថា ក្រោមការដឹកនាំរបស់ឯកឧត្តមបណ្ឌិត អ៊ាង សុផល្លែត ក្រសួងបរិស្ថាន បានដាក់ឱ្យអនុវត្តយុទ្ធសាស្រ្តចក្រាវិស័យបរិស្ថាន ដែលផ្តោតលើមុំយុទ្ធសាស្រ្ត៣ គឺស្អាត បៃតង និងចីរភាព ដែលក្នុងនោះបន្តកិច្ចសហការជាមួយ រដ្ឋបាលខេត្ត មន្ទីរ អង្គភាពពាក់ព័ន្ធ និងអាជ្ញាធរមូលដ្ឋានគ្រប់ថ្នាក់ ដើម្បីជំរុញការអប់រំនិងផ្សព្វផ្សាយពីបញ្ហាបរិស្ថាន ឱ្យបានច្រើនឡើងថែមទៀត។ គួរបញ្ជាក់ឱ្យដឹងទៀតថា កម្មវិធីផ្សព្វផ្សាយចំណេះដឹងបរិស្ថាន រៀបចំដោយ នាយកដ្ឋានព័ត៌មាននិងផ្សព្វផ្សាយបរិស្ថាន នៃអគ្គនាយកដ្ឋានចំណេះដឹងនិងព័ត៌មានបរិស្ថាន ក៏មានកម្មវិធីសំណួរចម្លើយពាក់ព័ន្ធជាមួយនឹងចំណេះដឹងបរិស្ថាន ហើយមានការចូលរួមយ៉ាងផុសផុលពីសិស្សានុសិស្ស ដោយមានការចោទជាសំណួរ និងឆ្លើយ ដែលបានបង្ហាញពីការយល់ដឹងរបស់សិស្សានុសិស្សអំពីបរិស្ថាន។ បន្ថែមពីនេះ គណៈអធិបតី លោកគ្រូ អ្នកគ្រូ សិស្សានុសិស្ស និងអ្នកចូលរួមទាំងអស់ បានដាំដើមឈើទុកជាអនុស្សាវរីយ៍ផងដែរ៕
