អភិបាលខេត្តក្រចេះ អញ្ជើញក្រុងពាលីបញ្ចុះបឋមសិលាសាងសង់អាគារព្យាបាលកុមារ គាំទ្រដោយអង្គការមជ្ឈមណ្ឌលថែទាំសុខភាពកុមារចេនឡា

ភ្នំពេញ៖ នៅព្រឹកថ្ងៃព្រហស្បតិ៍ ១៥រោច ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០៦ ខែមិថុនា ឆ្នាំ២០២៤ ឯកឧត្តម វ៉ា ថន អភិបាលខេត្តក្រចេះ រួមនិងអង្គការម្ចាស់ជំនួយ បានអញ្ជើញជាអធិបតីក្នុងពិធីក្រុងពាលីបញ្ចុះបឋមសិលាសាងសង់អាគារព្យាបាលកុមារ ដែលគាំទ្រដោយអង្គការមជ្ឈមណ្ឌលថែទាំសុខភាពកុមារចេនឡា ដើម្បីពង្រីកពង្រឹង និងលើកកម្ពស់ការផ្តល់សេវាថែទាំជូនកុមារ។

ឯកឧត្តម វ៉ា ថន អភិបាលខេត្ត មានប្រសាសន៍ថ្លែងអំណរគុណដល់លោកប្រធានអង្គការ និងសប្បុរសជននានា ដែលបានជួយផ្តល់នូវសមិទ្ធផលដ៏ធំធេងនេះដល់កុមារកម្ពុជា ជាពិសេសកុមារនៅខេត្តក្រចេះ ដែលអគារនេះមានកម្ពស់ ០២ជាន់ មានបន្ទប់ពិគ្រោះជំងឺក្រៅចំនួន ០៣បន្ទប់ គ្រែសម្រាប់សម្រាកព្យាបាលជំងឺធ្ងន់ចំនួន០៨គ្រែសម្រាប់សម្រាកពេទ្យចំនួន២៣ គ្រែសម្រាប់ទារកទេីបនឹងកើតចំនួន២០ ហើយអគារនេះគ្រោងនឹងប្រេីប្រាស់ថវិការសរុប ៩១៥,០០០ដុល្លារ និងប្រើរយៈពេលសាងសង់ ចន្លោះ៨-១០ខែ។

លោក ឡុង ចន្តា នាយកប្រចាំប្រទេសនៃមជ្ឈមណ្ឌលថែទាំសុខភាពកុមារចេនឡា បានឲ្យដឹងថា មជ្ឍមណ្ឌលថែទាំសុខភាពកុមារចេនឡា គឺជាអង្គការមិនរកប្រាក់ចំណូល មានមូលដ្ឋានធំនៅសហរដ្ឋអាមេរិក និងនៅទីតាំងខេត្តក្រចេះ និងបានបន្តសាខាពង្រីកនៅខេត្តមណ្ឌលគីរី និងស្ទឹងត្រែង។ ដោយឃើញថាតម្រូវការមកទទួលសេវាថែទាំរបស់កុមារមានការកើនឡើង មិនអាចផ្តល់បានគ្រប់គ្រាន់ ទើបអង្គការរួមនិងសហគមន៍សម្រេចផ្តល់នូវអាគារថ្មី។ ហើយចំពោះការចូលមកសម្រាកព្យាបាលនេះ គឺមិនមានការបង់សេវានោះទេ បន្ថែមពីនេះបងប្អូនប្រជាពលរដ្ឋ ដែលមានបណ្ណសមធម៌ក្រីក្រ គឺមិនតម្រូវឲ្យបង់នោះដែរ ៕