ភ្នំពេញ៖ នាព្រឹកថ្ងៃទី៦ ខែឧសភា ឆ្នាំ២០២៤ ក្រុមប្រឹក្សាខេត្តកំពង់ធំ បើកកិច្ចប្រជុំសាមញ្ញលើកទី៦០ ជាលើកចុងក្រោយនៃអាណត្តិទី៣ តាមប្រតិទិនដែលបានគ្រោងទុក្ខ ក្រោមអធិបតីភាពឯកឧត្តម ឈុន ឈន់ ប្រធានក្រុមប្រឹក្សាខេត្ត និងលោក ចាន់ តារា អភិបាលរងនៃគណៈអភិបាលខេត្តកំពង់ធំ នៅសាលាប្រជុំសាលាខេត្តកំពង់ធំ។
របៀបវារៈនៃកិច្ចប្រជុំនេះ រួមមាន៖
១- ពិនិត្យ និងអនុម័ត កំណត់ហេតុនៃកិច្ចប្រជុំសាមញ្ញលើកទី ៥៩ របស់ក្រុមប្រឹក្សាខេត្ត
២- ពិនិត្យ និងឯកភាព របាយការណ៍បញ្ចប់អាណត្តិ ៥ឆ្នាំ របស់ក្រុមប្រឹក្សាខេត្ត អាណត្តិទី៣ (២០១៩-២០២៤)
៣- ពិនិត្យ និងឯកភាព របាយការណ៍ប្រចាំខែ ឧសភា ឆ្នាំ២០២៤ របស់រដ្ឋបាលខេត្ត
៤- បញ្ហាផ្សេងៗ
ក្រោយពីបានស្តាប់ការលើកឡើងនូវរបៀបវារៈ និងបញ្ហាសំខាន់ៗ របស់សមាជិកក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាព រដ្ឋបាលស្រុក ក្រុង ក្នុងកិច្ចប្រជុំរួចមក សមាជិកនៃកិច្ចប្រជុំ បានអនុម័តទៅលើពង្រាងរបាយការណ៍ ប្រចាំខែឧសភា ឆ្នាំ២០២៤របស់រដ្ឋបាលខេត្តកំពង់ធំ ។
ជាមួយគ្នានោះដែរ ឯកឧត្តម ឈុន ឈន់ មានប្រសាសន៍លើកឡើងថា កិច្ចប្រជុំនៅថ្ងៃនេះ ជាឆ្នាំចុងក្រោយនៃអាណត្តិទី៣ រយៈពេល៥ឆ្នាំ ចាប់ពីឆ្នាំ២០១៩ ដល់ឆ្នាំ២០២៤ របស់ក្រុមប្រឹក្សាខេត្តកំពង់ធំ ព្រមទាំងលើកឡើងនូវសមិទ្ធផលការងារ ដែលរដ្ឋបាលខេត្ត មន្ទីរអង្គភាពជំនាញជុំវិញខេត្ត រដ្ឋបាលក្រុងស្រុក រដ្ឋបាល ឃុំ សង្កាត់ សម្រេចបានក្នុងរយៈពេល៥ឆ្នាំ ក្នុងអាណត្តិទី៣ របស់ក្រុមប្រឹក្សាខេត្ត។
ឯកឧត្តម ឈុន ឈន់ បានសម្តែងនូវការកោតសរសើរដល់ថ្នាក់ដឹកនាំ មន្ត្រីរាជការ និងកងកម្លាំងប្រដាប់អាវុធគ្រប់បណ្តាកងឯកភាព ដែលបាននឹងកំពុងខិតខំអនុវត្តតួនាទី ភារកិច្ចរបស់ខ្លួនប្រកបដោយប្រសិទ្ធិភាព តម្លាភាព និងភាពយុត្តិធម៌ត្រឹមត្រូវ។ នេះគឺជាការរួមចំណែកយ៉ាងធំធេង ក្នុងការថែរក្សាការពារសន្តិសុខ សណ្តាប់ធ្នាប់ និងការបម្រើសេវាសាធារណៈនានាបានល្អប្រសើរ ជាទំនុកចិត្តរបស់ប្រជាពលរដ្ឋ មកលើរដ្ឋបាលខេត្ត ក៏ដូចប្រមុខរាជរដ្ឋាភិបាល ក្រោមការដឹកនាំរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
នៅក្នុងឱកាសនោះឯកឧត្តម ក៏បានផ្តាំផ្ញើដល់ថ្នាក់ដឹកនាំ មន្ត្រីរាជការទាំងអស់ ត្រូវបន្តខិតខំប្រឹងប្រែងអនុវត្តនូវតួនាទី ភារកិច្ចបន្ថែមទៀតក្នុងន័យបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋ ដែលផ្តោតសំខាន់ក្នុងការសម្របសម្រួល និងដោះស្រាយបញ្ហាប្រឈមនានា និងការបម្រើសេវាសាធារណៈឱ្យបានឆាប់រហ័ស និងមានប្រសិទ្ធិភាព៕
