ឯកឧត្តម ស្វាយ សំអ៊ាង ស្នើឲ្យមន្ទីរអង្គភាពពាក់ព័ន្ធ ជួយតាមដាន និងក្ដាប់សភាពការណ៍ កើតមានឡើងធ្វើឱ្យប៉ះពាល់ដល់សន្តិសុខ សណ្ដាប់ធ្នាប់ សុវត្ថិភាពសង្គម
ភ្នំពេញ៖ ឯកឧត្ដម ស្វាយ សំអ៊ាង អភិបាលខេត្តស្ទឹងត្រែង និងជាប្រធានគណៈបញ្ជាការឯកភាពរដ្ឋាបាលខេត្ត បានថ្លែងស្នើឲ្យមន្ទីរអង្គភាពពាក់ព័ន្ធ ជួយតាមដាន និងក្ដាប់សភាពការណ៍ដែលកើតមានឡើង ធ្វើឱ្យប៉ះពាល់ទៅដល់សន្តិសុខ សណ្ដាប់ធ្នាប់ សុវត្ថិភាពសង្គម ។
ក្នុងឱកាសអញ្ជើញដឹកនាំកិច្ចប្រជុំស្ដីពីការពង្រឹងការគ្រប់គ្រងសណ្ដាប់ធ្នាប់សាធារណៈ និងក្មេងទំនើង នាថ្ងៃទី៥ មិថុនានេះ ឯកឧត្ដម ស្វាយ សំអ៊ាង បានថ្លែង ថ្លែងអំណរគុណ កោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់កងកម្លាំងប្រដាប់អាវុធរបស់យើងទាំងថ្នាក់ខេត្ត ទាំងថ្នាក់ក្រុង ស្រុក ក៏ដូចជាប៉ុស្តិ៍នគរបាល រដ្ឋបាល និងអាជ្ញាធរទាំងអស់ នេះក៏ជាការចូលរួមចំណែកមួយក្នុងភារកិច្ចជាកងកម្លាំង ជាអាជ្ញាធរក្នុងការការពារសន្តិសុខ សណ្ដាប់ធ្នាប់ សុវត្ថិភាពជូនប្រជាពលរដ្ឋរបស់នូវក្នុងមូលដ្ឋាន។ ហើយក៏ជាការពង្រឹងនូវវិធានការមួយទៀតដែលអនុវត្តទៅតាមបទបញ្ជារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អំពីការរឹតបន្តឹងការចាត់វិធានការបង្ក្រាបទបស្កាត់ចំពោះក្រុមក្មេងទំនើមដែលបង្កភាពអុកឡុកប៉ះពាល់ទៅដល់សន្តិសុខ សណ្ដាប់ធ្នាប់សង្គម បង្កនូវអំពើហិង្សា បង្កនូវបញ្ហាជម្លោះទាស់ទែង ធ្វើឱ្យបាត់បង់សណ្ដាប់ធ្នាប់នូវក្នុងសង្គម។
ជាមួយគ្នានោះ ឯកឧត្តម ស្វាយ សំអ៊ាង បានបន្តថា ក្រោយពីបានដាក់បទបញ្ជា និងវិធាការ ក៏ដូចជាគោលការណ៍ណែនាំរបស់គណៈបញ្ជាការឯកភាពរដ្ឋបាលខេត្ត ដែលបានដាក់ចេញកន្លងមកនេះ យើងឃើញថា កងកម្លាំងរបស់យើងបានខិតខំធ្វើការងារនេះយ៉ាងសកម្មដោយមានការទទួលខុសត្រូវ ក្នុងនោះក៏យើងឃើញថាបានបង្ក្រាបទប់ស្កាត់តាមបណ្ដាក្រុង ស្រុក ជាពិសេសក្នុងក្រុងស្ទឹងត្រែងនេះ ហើយក៏ជាចំណុចគោលដៅសំខាន់ដែលជាបេះដូងនៃខេត្តស្ទឹងត្រែងទាំងមូល និងតាមបណ្ដាក្រុង ស្រុក។
ឯកឧត្តម ស្វាយ សំអ៊ាង ក៏បានជំរុញបន្ថែមថា ពាក់ព័ន្ធនឹងការងារនេះ យើងត្រូវធ្វើយ៉ាងម៉ឺងម៉ាត់ និងរួមគ្នាទបស្កាត់រាល់បញ្ហាបាតុភាពដែលបង្កឡើងដោយក្រុមក្មេងទំនើង ឬបទល្មើសអ្វីក៏ដោយដែលកើតមានឡើងនៅក្នុងមូលដ្ឋានរបស់យើងនេះ។
ឯកឧត្តម ស្វាយ សំអ៊ាង សូមឱ្យមន្ទីរអង្គភាពពាក់ព័ន្ធ ជួយតាមដានក្ដាប់នូវសភាពការណ៍ដែលកើតមានឡើង ដែលធ្វើឱ្យប៉ះពាល់ទៅដល់សន្តិសុខ សណ្ដាប់ធ្នាប់ សុវត្ថិភាពសង្គម ឬបទល្មើសអ្វីក៏ដោយដែលយើងបានដឹង ឬក៏បានព័ត៌មានថា ឥឡូវវាអាចមានក្រុមណាមួយកំពុងធ្វើបាតុភាពបែបនេះ បែបនោះឡើង ក៏សូមឱ្យជួយសហការគ្នាផ្ដល់ព័ត៌មានទៅដល់គណៈបញ្ជាការឯកភាពក្រុង ស្រុក ឬក៏កម្លាំងសមត្ថកិច្ចដែលមាន នគរបាល អាវុធហត្ថ យោធា ហើយផ្នែកនៅស្រុក មានអភិបាលស្រុក អធិការ ជាដើម សូមឱ្យជួយសហការគ្នា ដើម្បីយើងនឹងចាត់វិធានការអន្តរាគមន៍ ក៏ដូចជាចាត់វិធានការទៅលើសកម្មភាពទាំងនោះឱ្យបានទាន់ពេលវេលា ៕
