ឯកឧត្តម សួស យ៉ារ៉ា ធ្វើបទបង្ហាញស្តីពីតួនាទី និងភារកិច្ចរបស់រដ្ឋសភា និងគោលនយោបាយការបរទេសដល់សាស្ត្រាចារ្យ និងនិស្សិតសាកលវិទ្យាល័យប៊ែលធីអន្តរជាតិ
ភ្នំពេញ៖ ឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា និងមានការអញ្ជើញចូលរួមពីឯកឧត្តម សន សារ៉ាណា សមាជិកគណៈកម្មការទី៥ នៃរដ្ឋសភា ឯកឧត្តម ឃុត ចាន់ដារ៉ា សមាជិកគណៈកម្មការទី៩ នៃរដ្ឋសភា ឯកឧត្តម ឡេង ប៉េងឡុង អគ្គលេខាធិការរដ្ឋសភា ឯកឧត្តម ព្រហ្ម វិរ: អគ្គនាយកទំនាក់ទំនងអន្តរជាតិ ពិធីការ និងព័ត៌មាន បានអញ្ជើញផ្តល់កិត្តិយសធ្វើបទបង្ហាញស្តីពីតួនាទី និងភារកិច្ចរបស់រដ្ឋសភា និងគោលនយោបាយការបរទេសដល់សាស្ត្រាចារ្យ និងនិស្សិតនៃសាកលវិទ្យាល័យប៊ែលធីអន្តរជាតិចំនួន១២៦រូប។
ឯកឧត្តមសាស្រ្តាចារ្យបណ្ឌិត ឈុន វណ្ណៈ បានមានប្រសាសន៍ជម្រាបជូនពីគោលបំណងដែលដឹកនាំសាស្ត្រាចារ្យ ក៏ដូចជានិស្សិតមកទស្សនកិច្ចឈ្វេងយល់ពីតួនាទី និងភារកិច្ចរបស់រដ្ឋសភានាពេលនេះ គឺដើម្បីបំពេញសេចក្តីត្រូវការពីកង្វះខាតមួយចំនួននៃការសិក្សា និងដើម្បីឈ្វេងយល់បន្ថែមលើនីតិវិធីនៃការបង្កើតច្បាប់ ការអនុវត្តន៍ច្បាប់ និងការដោះស្រាយបញ្ហាប្រឈមនានា ជាពិសេសរៀនសូត្រដកពិសោធន៍នូវអ្វីល្អៗពីសំណាក់ឯកឧត្តមវាលគ្មិនដើម្បីយកចំណេះដឹងទាំងអស់នេះសម្រាប់ត្រៀមខ្លួននៅពេលអនាគត។
ឯកឧត្តម សួស យ៉ារ៉ា បានធ្វើបទបង្ហាញពីប្រវត្តិនៃការកកើតរដ្ឋសភាកម្ពុជា ដែលមកទល់ពេលបច្ចុប្បន្ននេះ គឺរដ្ឋសភាបានដំណើរការអស់រយៈពេល៧អាណត្តិមកហើយ ហើយអាណត្តិនីមួយៗមានរយៈពេល៥ឆ្នាំ សមាជិក សមាជិការដ្ឋសភាកើតឡើងដោយការបោះឆ្នោតជាសកលពីសំណាក់ប្រជាពលរដ្ឋ ហើយរដ្ឋសភាជាអ្នកបោះឆ្នោតបង្កើតរាជរដ្ឋាភិបាលក្នុងអាណត្តិនីមួយៗ ចំពោះអាណត្តទី៧នេះ គណបក្សនយោបាយក្នុងរដ្ឋសភា សេរីពហុបក្ស មានចំនួន ១២៥អាសនៈ ដែលមានពីរគណបក្សគឺគណបក្សប្រជាជនកម្ពុជា និងគណបក្សហ៊្វុនស៊ិនប៉ិច។ ឯកឧត្តមបានគូសបញ្ជាក់ថា រដ្ឋសភាមានតួនាទីភារកិច្ចចំនួន៣៖ ភារកិច្ចក្នុងការតាក់តែងច្បាប់ ការត្រួតពិនិត្យតាមដានការអនុវត្តន៍ច្បាប់ និងភាពជាអ្នកតំណាង ជាពិសេសមានសិទ្ធិក្នុងការធ្វើសេចក្តីស្នើធ្វើច្បាប់ និងវិសោធនកម្មច្បាប់។
ក្រៅពីការកសាង និងអនុម័តច្បាប់នៅក្នុងរដ្ឋសភា សមាជិក សមាជិការដ្ឋសភា បានចុះស្វែងយល់ពីសុខទុក្ខតម្រូវការរបស់ពលរដ្ឋនៅតាមមូលដ្ឋាន។ រដ្ឋសភាបានបំពេញតួនាទីនៅលើកិច្ចការការទូតសភាក្នុងតំបន់ និងឆាកអន្តរជាតិផងដែរ។ វិស័យការទូតសភា (រដ្ឋសភា ព្រឹទ្ធសភា) គឺជាការងារការទូតច្រកទី២ (track 2) ហើយត្រូវអនុវត្តយ៉ាងទៀងទាត់តាមនីតិកាលនីមួយៗ ស្របតាមគោលនយោបាយរបស់គណបក្ស និងកម្មវិធីនយោបាយការទូតរបស់រាជរដ្ឋាភិបាលក្នុងគោលបំណងការពារផលប្រយោជន៍ជាតិ ឯករាជ្យ អធិបតេត្យភាព បូរណភាពទឹកដី និងការអភិវឌ្ឍន៍សេដ្ឋកិច្ច ជាពិសេស បង្កើតកិច្ចសហប្រតិបត្តិការរវាងសភាកម្ពុជាជាមួយសភាបណ្តាប្រទេសនានាជាលក្ខណៈទ្វេរភាគី ឬពហុភាគី ដូចជាតាមរយៈអង្គការ ឬវេទិកាអន្តរសភាផ្សេងៗជាដើម។
ក្នុងឱកាសនោះ ឯកឧត្តម សន សារ៉ាណា និងឯកឧត្តម ឃុត ចាន់ដារ៉ា បានចូលរួមចែករំលែកនូវបទពិសោធន៍មួយចំនួនពាក់ព័ន្ធនឹងការងារសភា ក៏ដូចជាការងារសង្គមមួយចំនួន ជាពិសេសពាក់ព័ន្ធនឹងភាពជោគជ័យក្នុងអាជីពជាអ្នកនយោបាយ ដោយមានការខិតខំប្រឹងប្រែងតស៊ូរៀនសូត្រយកចំណេះដឹង ហើយចំណេះដឹងទាំងនេះជាស្ពានចម្លងជីវិតឱ្យទទួលបាននូវលទ្ធផលល្អ។
ឯកឧត្តម ឡេង ប៉េងឡុង បានមានប្រសាសន៍ថា អគ្គលេខាធិការដ្ឋានរដ្ឋសភា គឺជាសេនាធិការរបស់រដ្ឋសភា ដែលមានតួនាទីភារកិច្ចផ្តល់សេវាបច្ចេកទេស សម្ភារៈ និងធនធានមនុស្សដល់សមាជិករដ្ឋសភា ពោលគឺអគ្គលេខាធិការដ្ឋានរដ្ឋសភា ត្រូវធានាដល់ដំណើរការជាអចិន្ត្រៃយ៍របស់រដ្ឋសភា ក្នុងការផ្តល់លទ្ធភាពជូនសមាជិក សមាជិការដ្ឋសភា បំពេញភារកិច្ចជូនប្រទេសជាតិទៅតាមរដ្ឋធម្មនុញ្ញដែលបានកំណត់ ៕
