សម្តេចធិបតី ណែនាំដល់ក្រសួងស្ថាប័នពាក់ព័ន្ធ ត្រូវចូលរួមអភិរក្ស និងអភិវឌ្ឍបរិស្ថានធម្មជាតិនៅមជ្ឈមណ្ឌលវប្បធម៌ព្រះពុទ្ធសាសនាកម្ពុជា

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងណែនាំដល់ក្រសួងស្ថាប័នពាក់ព័ន្ធ ត្រូវចូលរួមអភិរក្ស និងអភិវឌ្ឍបរិស្ថានធម្មជាតិនៅមជ្ឈមណ្ឌលវប្បធម៌ព្រះពុទ្ធសាសនាកម្ពុជា មានទីតាំងក្នុងភូមិសាស្រ្តភូមិថ្មី ឃុំចំបក់ ស្រុកភ្នំស្រួច ខេត្តកំពង់ស្ពឺ តំបន់ឧទ្យានជាតិព្រះសុរាម្រិត-កុសមៈ «គិរីរម្យ»។

សម្តេចធិបតី ហ៊ុន ម៉ាណែត បានណែនាំបែបនេះ ក្នុងឱកាសដែលសម្តេចអញ្ជើញសម្ពោធដាក់ឱ្យប្រើប្រាស់សមិទ្ធផលមួយចំនួននៅមជ្ឈមណ្ឌលវប្បធម៌ព្រះពុទ្ធសាសនាកម្ពុជា ស្ថិតនៅឧទ្យានជាតិព្រះសុរាម្រិត-កុសមៈ «គិរីរម្យ» នាព្រឹកថ្ងៃទី៣០ ខែឧសភា ឆ្នាំ២០២៤នេះ។

សម្តេចធិបតី ហ៊ុន ម៉ាណែត ក៏បានថ្លែងណែនាំឲ្យក្រសួងស្ថាប័នពាក់ព័ន្ធត្រូវចូលរួមជួយគាំទ្រផ្ដល់យោបល់លើលក្ខណៈបច្ចេកទេស ទម្រង់ និង រចនាបទ សម្រាប់ការកសាងសំណង់នានា ព្រះត្រៃបិដកចម្លាក់ពីថ្មម៉ាប និងព្រះបដិមាជាដើម ធ្វើយ៉ាងណា ឱ្យត្រឹមត្រូវតាមលក្ខណៈសាសនា វប្បធម៌ជាតិ ដើម្បីបានជាមរតកដ៏ថ្លៃថ្លា និងមានតម្លៃសម្រាប់កូនចៅ យើងជំនាន់ក្រោយ។

សម្តេចធិបតី នាយករដ្ឋមន្ត្រី ក៏ណែនាំក្រៅពីរួមគ្នាអភិរក្ស និងអភិវឌ្ឍ ក៏ត្រូវរួមគ្នាប្រើប្រាស់ទីកន្លែងនេះឱ្យបានផលប្រយោជន៍ ច្រើនបំផុតសម្រាប់បម្រើឱ្យការអភិវឌ្ឍសង្គម សេដ្ឋកិច្ចរបស់ប្រទេសជាតិយើង ជាពិសេស ទីកន្លែងនេះ ស័ក្តិសមបំផុតសម្រាប់ការអប់រំលើកម្ពស់សីលធម៌សង្គម និងការបដិបត្តិសមាធិអប់រំចិត្ត។

សម្តេចធិបតី នាយករដ្ឋមន្ត្រី បានណែនាំឲ្យមជ្ឈមណ្ឌលវប្បធម៌ព្រះពុទ្ធសាសនាកម្ពុជា ត្រូវសហការជាមួយ គណៈសង្ឃនាយក ក្រសួង ធម្មការ និងសាសនា ដើម្បីប្រើប្រាស់ទីកន្លែងនេះ ជាកន្លែងពហុវិស័យក្នុងការបម្រើផលប្រយោជន៍សម្រាប់ ពុទ្ធសាសនា បូជនីយដ្ឋានទេសចរណ៍សាសនា និងជាកន្លែងបណ្តុះនូវគុណធម៌ សីលធម៌ ចរិយាធម៌ និង បដិបត្តិសមាធិ ដល់យុវជន និងពុទ្ធបរិស័ទ ទាំងជាតិ និងអន្តរជាតិ ៕