ឯកឧត្តម ប្រាក់ សំអឿន៖ ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ជាដំណើរការបោះឆ្នោតដ៏មានសារៈសំខាន់ ដើម្បីបន្តជំរុញ និងលើកកម្ពស់លទ្ធិប្រជាធិបតេយ្យសេរីពហុបក្ស

ភ្នំពេញ៖ ឯកឧត្តម ប្រាក់ សំអឿន រដ្ឋលេខាធិការក្រសួងមហាផ្ទៃ បានលើកឡើងថា ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ គឺជាដំណើរការបោះឆ្នោតដ៏មានសារៈសំខាន់ ដើម្បីបន្តជំរុញ និងលើកកម្ពស់លទ្ធិប្រជាធិបតេយ្យសេរីពហុបក្ស និងបន្តជំរុញដំណើរការនៃកំណែទម្រង់អភិបាលកិច្ចនៅថ្នាក់ក្រោមជាតិ ស្របតាមគោលនយោបាយវិមជ្ឈការ​ និងវិសហមជ្ឈការ ។

ក្នុងពិធីបិទកិច្ចប្រជុំផ្សព្វផ្សាយលិខិតបទដ្ឋាន និងគោលការណ៍ណែនាំនានាសម្រាប់ត្រៀមរៀបចំកិច្ចប្រជុំចូលកាន់តំណែងរបស់ក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក
ក្រុមប្រឹក្សាខណ្ឌ អាណត្តិទី៤ នាថ្ងៃទី២៧ ខែឧសភា ឆ្នាំ២០២៤នេះ ឯកឧត្តម ប្រាក់ សំអឿន បានមានប្រសាសន៍ថា ជាការពិតណាស់ ព្រឹត្តិការណ៍នៃការបោះឆ្នោតជ្រើសរើសក្រុមប្រឹក្សាកាលពីម្សិលមិញនេះ បានឆ្លុះបញ្ចំាងអំពីការអនុវត្តយ៉ាងទៀងទាត់រៀងរាល់ ៥ឆ្នាំម្ដង នៅក្នុងការរៀបចំបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ស្របតាមច្បាប់រៀបចំអង្គការទាំង២ ខាងលើបានកំណត់ និងបង្ហាញពីភាពចាស់ទុំខាងនយោបាយនៅរដ្ឋបាលថ្នាក់ក្រោមជាតិ ជាពិសេសដំណើរការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិបានចាក់ឫសគល់បានល្អដល់ថ្នាក់មូលដ្ឋាន។

ឯកឧត្ដមថ្លែងថា រាប់ចាប់តាំងពីថ្ងៃបើកយុទ្ធនាការឃោសនាការបោះឆ្នោត រហូតមកដល់ថ្ងៃបោះឆ្នោតដែលប្រព្រឹត្តទៅម្សិលមិញនេះ បានបង្ហាញឱ្យយើងទាំងអស់គ្នាឃើញថា ដំណើរការនៃការរៀបចំបោះឆ្នោតបានប្រព្រឹត្តទៅដោយរលូន ស្របតាមច្បាប់ បទបញ្ជានីតិវិធី និង​​ប្រតិទិននៃការបោះឆ្នោតដែលកំណត់ដោយគណៈកម្មាធិការជាតិរៀបចំការបោះឆ្នោត ក្នុងបរិយាកាសដ៏ល្អប្រសើរ គ្មានអំពើហិង្សា រក្សាបានសន្តិសុខ និងស​ណ្ដា​ប់​​ធ្នាប់សាធារណៈ។

ឯកឧត្ដម ប្រាក់ សំអឿន គូសបញ្ជាក់ថា «ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ គឺជាដំណើរការបោះឆ្នោតដ៏មានសារៈសំខាន់ ដើម្បីបន្តជំរុញ និងលើកកម្ពស់លទ្ធិប្រជាធិបតេយ្យសេរីពហុបក្ស និងបន្តជំរុញដំណើរការនៃកំណែទម្រង់អភិបាលកិច្ចនៅថ្នាក់ក្រោមជាតិ ស្របតាមគោលនយោបាយវិមជ្ឈការ​ និងវិសហមជ្ឈការ ដំណើរការពង្រឹងរដ្ឋបាលថ្នាក់ក្រោមជាតិ ឱ្យក្លាយជារដ្ឋបាលដ៏រឹងមាំ ប្រកបដោយសក្ដានុពល ដើម្បីលើកកម្ពស់ការផ្ដល់សេវារដ្ឋបាល សេវាសាធារណៈ ការអភិវឌ្ឍន៍មូលដ្ឋាន ឆ្លើយតបទៅនឹងសេចក្ដីត្រូវការរបស់ប្រជាពលរដ្ឋគ្រប់ៗរូបនៅក្នុងសង្គមជាតិ» ៕