សមត្ថកិច្ចស្រុកមោងឫស្សីឃាត់ខ្លួនបុរស០៣នាក់ ករណីហិង្សាប្រើប្រាស់ដំបងវាយលើបុរសម្នាក់ទៀតអោយរងរបួសធ្ងន់
ភ្នំពេញ៖ កាលពីថ្ងៃទី២៣ ខែឧសភា ឆ្នាំ២០២៤ វេលាម៉ោង១៩និង៣០នាទី ស្ថិតនៅចំណុចក្រុមទី៧ ភូមិស្ទឹងចក ឃុំព្រៃតូច ស្រុកមោងឫស្សី ខេត្តបាត់ដំបង មានករណីហិង្សាដោយចេតនាមានស្ថានទម្ងន់ទោស (ប្រើកាំបិតកាប់ និងដំបង) មួយកើតឡើង បង្កដោយជនសង្ស័យចំនួន ០៣នាក់ រួមមាន៖ ១.ឈ្មោះ វ៉ាន់ វណ្ណា ហៅធឿក ភេទប្រុស អាយុ២៩ឆ្នាំ (ប្រដាប់ដោយដំបងឫស្សី) ជាជនដៃដល់, ២.ឈ្មោះ វ៉ាន់ តុលា ហៅបឺក ភេទប្រុ អាយុ២៧ឆ្នាំ (ប្រដាប់ដោយកាំបិតច្នៃ) ជាបក្ខពួក និង៣.ឈ្មោះ ឡុង ង៉ា ភេទប្រុស អាយុ១៩ឆ្នាំ (ប្រដាប់ដោយកាំបិតច្នៃ) ជាបក្ខពួក អ្នកទាំងបីរស់នៅភូមិស្ទឹងចក ឃុំព្រៃតូច ស្រុកមោងឫស្សី ខេត្តបាត់ដំបង ដោយជនសង្ស័យទាំង០៣នាក់ បានទៅធ្វើសកម្មភាពរករឿងជនរងគ្រោះឈ្មោះ ប៊ិន ហុង ភេទប្រុស អាយុ៦១ឆ្នាំ រស់នៅចំណុចកើតហេតុ ក្នុងពេលនោះក្រុមជនសង្ស័យម្នាក់ ឈ្មោះ វ៉ាន់ វណ្ណា បានយកដំបងឫស្សីវាយទៅលើជនរងគ្រោះ ជាច្រើនដំបង បណ្ដាលអោយរងរបួសក្បាល ០១កន្លែង ដេរ០៩ថ្នេរ, ហើមដៃទាំងសងខាង បន្ទាប់មកបក្ខពួកជនសង្ស័យ០២នាក់ទៀត (វ៉ាន់ តុលា,ឡុង ង៉ា) ដែលប្រដាប់ដោយកាំបិតគ្រប់ដៃ បំរ៉ុងធ្វើសកម្មភាពកាប់ទៅលើជនរងគ្រោះបន្ថែម តែត្រូវបានគ្រួសារជនរងគ្រោះចេញមកស្រែកអោយគេជួយ ទើបក្រុមជនសង្ស័យគេចខ្លួនអស់តែម្ដង។
ក្រោយពីបានទទួលបណ្តឹងពីជនរងគ្រោះ អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់លោកឧត្តមសេនីយ៍ត្រី លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ និងមានការសម្របសម្រួលនីតិវិធីពីឯកឧត្តម កែវ សុជាតិ ព្រះរាជអាជ្ញាអមសាលាដំបូងខេត្តបាត់ដំបង កម្លាំងផ្នែកនគរបាលយុត្តិធម៌ រួមជាមួយកម្លាំងប៉ុស្តិ៍នគរបាលរដ្ឋបាលព្រៃតូច នៃអធិការដ្ឋាននគរបាលស្រុកមោងឫស្សី ដឹកនាំដោយលោកវរសេនីយ៍ឯក ស គឹមឡង អធិការនគរបាលស្រុកមោងឫស្សី បានចុះធ្វើការស្រាវជ្រាវឃាត់ខ្លួនជនសង្ស័យទាំង០៣នាក់ នៅនឹងផ្ទះជនសង្ស័យ នៅចំណុចភូមិស្ទឹងចក ឃុំព្រៃតូច ស្រុកមោងឫស្សី ខេត្តបាត់ដំបង យកមកសាកសួរនៅអធិការដ្ឋាននគរបាលស្រុកមោងឫស្សី។
ក្រោយពីបានសាកសួរជនសង្ស័យ បានឆ្លើយសារភាពថាខ្លួនបានធ្វើសកម្មភាព ប្រេីប្រាស់ដំបងឫស្សីវាយ ទៅលើជនរងគ្រោះ ពិតប្រាកដមែន។ មូលហេតុដោយសារ ខឹងជនរងគ្រោះស្តីអោយរឿងពួកគេ (ជនសង្ស័យ) ឆក់ត្រីនៅចំណុចមុខផ្ទះជនរងគ្រោះ។
បច្ចុប្បន្ន ជនសង្ស័យខាងលេីត្រូវសមត្ថកិច្ចជំនាញ កំពុងកសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធី ៕
