រដ្ឋមន្ត្រីក្រសួងអប់រំ បញ្ជាក់ថា សាកលវិទ្យាល័យបារាំង ត្រូវបានទទួលស្គាល់ថា ជាផ្ទះទីពីររបស់អតីតសិស្សអាហារូបករណ៍គ្រប់រូប

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២៤ ខែឧសភា ឆ្នាំ២០២៤ បានអញ្ជើញចូលរួមកម្មវិធី Journ’ee mondiale des Alumis ដែលប្រារព្ធនៅនិវេសនដ្ឋានបារាំង ដោយមាន ការចូលរួមពី Monsieur Fabrice ETIENNE, Chargé d’affaires de l’Ambassade de France au Cambodge ឯកឧត្តម លោកជំទាវ លោក លោកស្រី និងអតីតសិស្សដែលសិក្សានៅប្រទេសបារាំងទាំងអស់ សរុបប្រមាណ ៤០០នាក់។

ពិធីជួបជុំអតីតនិស្សិតដែលធ្លាប់បានសិក្សានៅប្រទេសបារាំងនាពេលនេះបានឆ្លុះបញ្ចាំងឱ្យឃើញនូវភាពរាក់ទាក់ ក៏ដូចជាភាពឈានមុខនៃការបណ្តុះបណ្តាលរបស់បារាំងទាំងផ្នែកឧត្តមសិក្សា និងការស្រាវជ្រាវ និងជាឱកាសបង្ហាញឱ្យឃើញនូវភាពរស់រវើកនៃកិច្ចសហប្រតិបត្តិការផ្នែកសាកលវិទ្យាល័យរវាងបារំាង និងកម្ពុជា
នៅក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណចំពោះស្ថានទូតបារាំងដែលបានរៀបចំកម្មវិធីដ៏រីករាយ និងកក់ក្តៅនេះឡើង ព្រោះនេះមិនត្រឹមតែជាពេលនៃការជួបជុំ ដោយនឹករលឹកប៉ុណ្ណោះទេ ប៉ុន្តែក៏ជាឱកាសមួយដើម្បីឆ្លុះបញ្ចាំងពីអ្វីដែលអតីតសិស្សានុសិស្សបានធ្វើក្នុងអំឡុងពេលសិក្សា និងភាពជោគជ័យរបស់អតីតសិស្សានុសិស្សនៅថ្ងៃនេះផងដែរ។ បន្ថែមពីនេះទៀត ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី មានមោទនភាពយ៉ាងខ្លាំងចំពោះអតីតនិស្សិតទាំងអស់ ដែលបានក្លាយខ្លួនជាធនធានដ៏សំខាន់មួយសម្រាប់ប្រទេសកម្ពុជា និងអាចសម្រេចជោគជ័យបានស្ទើរតែគ្រប់វិស័យនៃជីវិតទាំងអស់។

បន្ថែមពីនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានគូសបញ្ជាក់ថា សាកលវិទ្យាល័យបារាំង ត្រូវបានទទួលស្គាល់ថាជាផ្ទះទីពីររបស់អតីតសិស្សអាហារូបករណ៍គ្រប់រូប ដែលដើរតួនាទីយ៉ាងសំខាន់ក្នុងការអភិវឌ្ឍផ្នែកបច្ចេកទេស វិជ្ជាជីវៈ និងភាសាទាំងក្នុងនាមជាបុគ្គល និងជាធនធានមនុស្សសម្រាប់ការអភិវឌ្ឍមាតុភូមិរបស់យើង។ លើសពីការពង្រឹងជំនាញវិជ្ជាជីវៈ បច្ចេកទេស និងភាសា សាកលវិទ្យាល័យបារាំង ក៏បានផ្តល់ឱកាសដល់អតីតនិស្សិតរបស់យើង ស្វែងយល់ពីពិភពលោកខាងក្រៅ និងរបៀបរស់នៅផ្សេងៗគ្នា បង្ហាញពីភាពក្លាហាន និងភាពមោះមុតក្នុងការទទួលយកបទពិសោធន៍ថ្មីៗ។

សារជាថ្មីម្តងទៀត ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលបារាំងសម្រាប់ការគាំទ្រ សហការណ៍ក្នុងការអភិវឌ្ឍទាំងវិស័យអប់រំផ្សេងៗទៀតជាច្រើនក្នុងប្រទេសកម្ពុជាកន្លងមក ជាពិសេសកម្មវិធីអាហារូបករណ៍ថ្នាក់ឧត្តមសិក្សា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី សង្ឃឹមជឿជាក់ថាកិច្ចសហការយ៉ាងជិតស្និទ្ធនេះ ស្ថិតស្ថេរជារៀងរហូត និងអាចសម្រេចបាននូវគោលដៅចម្បងនាពេលអនាគ៕