អនុរដ្ឋលេខាធិការក្រសួងសុខាភិបាល ដឹកនាំក្រុមការងារអញ្ជើញចូលរួម កិច្ចប្រជុំតុមូលសម្រាប់តំបន់អាស៊ីអគ្នេយ៍ស្តីពីសន្តិសុខសុខភាព នៅសឹង្ហបុរី
ភ្នំពេញ៖ ដោយបានទទួលការអនុញ្ញាតដ៏ខ្ពង់ខ្ពស់ពី ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល ឯកឧត្តមវេជ្ជបណ្ឌិត ម៉ៅ តាន់អ៊ាង អនុរដ្ឋលេខាធិការក្រសួងសុខាភិបាល បានដឹកនាំក្រុមការងារអញ្ជើញចូលរួមក្នុងកិច្ចប្រជុំតុមូលសម្រាប់តំបន់អាស៊ីអាគ្នេយ៍ ស្តីពីសន្តិសុខសុខភាព (Southeast Asia Health Security Roundtable Series –Improving Regional Health Security through Knowledge Exchange and Collaboration ) ក្រោមការគាំទ្រពីក្រសួងសុខាភិបាល នៃប្រទេសសឹង្ហបុរី ដែលសហការរៀបចំដោយសាកលវិទ្យាល័យជាតិសឹង្ហបុរី (NUS) រួមជាមួយនឹង Health Intervention and Technology Assessment Program (HITAP, Thailand)និង Universitas Padjadjaran (UNPAD, Indonesia) ដែលប្រព្រឹត្តទៅចាប់ពីថ្ងៃទី២៤ ដល់ថ្ងៃទី២៥ ខែមេសា ឆ្នាំ២០២៤ នៅប្រទេសសឹង្ហបុរី។
អង្គប្រជុំផ្តោតសំខាន់លើប្រធានបទចំនួនបី(១) បទពិសោធន៍ផ្សេងៗគ្នា តាមបណ្តាប្រទេសពិសេសក្នុងតំបន់អាស៊ីអាគ្នេយ៍ នៅអំឡុងពេលនៃការប្រយុទ្ធនឹងការរាតត្បាតជំងឺកូវីដ-១៩ (២) គំរូទាំងឡាយនៃភាពជាអ្នកដឹកនាំក្នុងការគ្រប់គ្រង លើបញ្ហាប្រឈមពាក់ព័ន្ធនឹងសន្តិសុខសុខភាព នៅលំដាប់ប្រទេស តំបន់ និងសកលលោក (៣) ការត្រៀមជាស្រេច ក្នុងការទប់ទល់ការរាតត្បាត និងការគាំទ្រការកសាងសមត្ថភាពកម្រិតតំបន់ និងជាតិ ចំពោះការរាតត្បាត នៃជំងឺឆ្លងនាពេលអនាគត ។
គោលបំណងជាក់លាក់របស់កិច្ចប្រជុំតុមូលមានដូចជា៖ (១)ចែករំលែកបទពិសោធន៍ ក្នុងការសហការសម្របសម្រួល និងការគ្រប់គ្រងការរាតត្បាតនៃជំងឺកូវីដ-១៩ ពាក់ព័ន្ធនឹងយុទ្ធសាស្ត្រ និងរចនាសម្ព័ន្ធទំនាក់ទំនង (២)ស្វែងយល់ដឹងស៊ីជម្រៅលើភាពជាអ្នកដឹកនាំ និងការទំនាក់ទំនងពេលមានវិបត្តិសកលខ្លាំង ដែលមានលក្ខណ:បត់បែនរហ័ស (៣)ចែករំលែកបទពិសោធន៍តាមប្រទេសក្នុងការអនុម័តយកការប្រតិបត្តិល្អៗ ទាក់ទិននឹងយុទ្ធសាស្ត្រនៃការទំនាក់ទំនង និងបែបទ នៃភាពជាអ្នកដឹកនាំ។
គួរបញ្ជាក់ផងដែរថា ប្រតិភូសុខាភិបាលកម្ពុជា រួមមាន ឯកឧត្តមអនុរដ្ឋលេខាធិការ និងលោកស្រីវេជ្ជបណ្ឌិត តេង ស្រី អនុប្រធាននាយកដ្ឋានប្រយុទ្ធនឹងជំងឺឆ្លងក៏បានរួមចំណែក ចូលរួមយ៉ាងសកម្មក្នុងកិច្ចប្រជុំតុមូលនេះ ពិសេសតាមរយៈការធ្វើបទបង្ហាញ និងការផ្តល់យោបល់ ដែលជាធាតុចូលសម្រាប់កិច្ចប្រជុំកំពូលដ៏មានសារៈសំខាន់នេះផងដែរ ។
សូមបញ្ជាក់ដែរថា កិច្ចប្រជុំតុមូលនេះ មានការចូលរួមពីថ្នាក់ដឹកនាំ និងតំណាងពីក្រសួងសុខាភិបាល តំណាងស្ថាប័នពាក់ព័ន្ធ អ្នកជំនាញសុខាភិបាល តាមប្រទេសមួយចំនួន ព្រមទាំង តំណាងមកពីភាគីពាក់ព័ន្ធនឹងការងារខាងលើនេះ អញ្ជើញមកពីប្រទេសចំនួន ១២ និងសរុបមានអ្នកចូលរួមប្រមាណ ៥៦ រូប ៕
